An baton han Biblia

 Bisan kon diri detalyado nga ginhihisgotan han Biblia ini nga topiko, waray hito igdiri an paggamit hin makeup, alahas, o iba pa nga pampahusay. Pero imbes nga magpokus ha pisikal nga hitsura, gin-aaghat han Biblia nga gamiton an “diri nadudunot nga pampahusay pinaagi han hilom ngan malumo nga espiritu.”—1 Pedro 3:3, 4.

Waray igdiri an pisikal nga pagpahusay

•   An matinumanon nga kababayin-an ha Biblia nagpahusay han ira kalugaringon. Hi Rebeca, nga asawa han anak ni Abraham nga hi Isaac, nagsul-ot hin bulawan nga singsing ha irong, mga bulawan nga purseras, ngan iba pa nga marahalon nga alahas nga iya nakarawat sugad nga regalo tikang ha iya magigin ugangan nga lalaki. (Genesis 24:22, 30, 53) Ha pariho nga paagi, hi Esther nakakarawat hin “programa han pagpahusay” para iandam hiya sugad nga potensyal nga rayna han Imperyo han Persia. (Esther 2:7, 9, 12) Ini nga programa posible nga nag-uupod hin paggamit hin “mga kosmetik,” o “iba-iba nga klase hin makeup.”—New International Version; Easy-to-Read Version.

•   Gin-gamit ha mga ilustrasyon ha Biblia an alahas ha pagkompara. Halimbawa, an tawo nga naghahatag hin maopay nga sagdon iginkompara ha “ariyos nga bulawan . . . ngada ha talinga nga namamati.” (Proberbios 25:12) Sugad man, iginkompara mismo han Dios an iya pagtratar ha nasud han Israel ha usa nga bana nga gin-aadornohan an iya maarasawa hin mga purseras, kwintas, ngan mga ariyos. Ini nga pag-adorno ‘nagpahusay gud’ ha nasud.—Ezekiel 16:11-13.

Mga sayop nga panhunahuna parte ha makeup ngan alahas

 Sayop nga panhunahuna: An pagbutang hin kolorete ha mata han maraot nga hi Rayna Jezebel nagpapakita nga sayop an paggamit hin makeup.—2 Hadi 9:30.

 An tinuod: Hi Jezebel, nga nagbuhat hin pamarang ngan pamatay, ginhukman tungod han iya magraot nga buhat, diri han iya hitsura.—2 Hadi 9:7, 22, 36, 37.