Yaalepelinwaaya Aheberi 9:1-28
9 Nivarihano nakhalayi naakhalano malamulo aya a moota woovara muteko nipuro nootteela valaponi vaava.
2 Ni yaatekiwa etenta ni yaakhala eparte yoopatxera yiitthaniwa, Nipuro Nootteela, mwemmo waaraayamo onyaari, emeesa ni ipaawu saaveleeliwa.
3 Mene ottuli wa ekortiina yanaaveeli, naakhala nipuro niitthaniwa Nootteelaxa.
4 Nipuro nno, aakhala altaari a ewooru aahisiwaawevo rupani ni Ekaaxa ya Nivarihano yeeyo yaakhuneelinwe ni ewooru, nave-tho yaakhala exaaru ya ewooru yaahelinwaayamo mana, ekopo ya Arao yeeyo yaaphunwe ifuloore ni itthaapwa sa nivarihano;
5 ni vasulu va ekaaxa eyo, yaakhalavo makerupi oovuwa yaawo yaakhuneela etampa weera eniiraanihe ni Muluku. Menento, viinaano va khaiyene etempu weera nihimeke itthu sene seiya moottattarika.
6 Menento, moota ene yoola yaapakinwaaya, yannaweeriha anamakeya ovolowa veeli-veeli ekwaartu yoopatxera weera yavare muteko wa Muluku mutentani mmo;
7 menento ekwaartu yanaaveeli aavolowa paahi namakeya mutokweene, ekwaha emoha vayaakhani, annavolowa akunxeene ephome weera aveleele ntoko makeya ooleveleliwa soottheka sawe ni soottheka sa atthu yaapakaaya ehisuwelaka.
8 Hiiho munepa wootteela wohoonihera weera, nipuro nootteela nlelo neera nihinaaye wooniheriwa nnaamweera etenta yoopatxera* yaakhanle.
9 Etenta eyo* ethoonyero ya mahiku ahu ala. Moovarihana ni mareherero ene yaala, hiyo ninnawera woona weera soovaha ni amakeya khaiyene itthu sene seiya simmweeriha mutthu onvara muteko wootteela wa Muluku okhalano murima wooreera.
10 Mene amakeya awo ni soovaha envarihana ni sootxa, owura, ni moota woohiyana-hiyana wooreeriha itthu ni waareeriha atthu. Mene itthu iya soopereriwa ni nlamulo na Mose, saavarihana ni erutthu mene saavahinwe weera seetteliweke mpaka ophiyera etempu yoorehereriwa itthu.
11 Menento, Kristu awaakaru ntoko namakeya mutokweene a itthu sooreera soohooneya, owo oovolowa etenta etokweene ni yoomalela yeeyo ehipakinwe ni matata aatthu, eyo tiiyo, ehineerela eparte sa soopattuxiwa.
12 Owo oovolowa nipuro nootteela khaiyene ni ephome ya ipuri naari ya imompe, mene ovolonwe akunxeene ephome awe ni owo oonivuluxa ekwaha emoha mene wa mahiku ootheene.
13 Anamakeya ennavarihela muteko ephome ya ipuri ni ya imompe ni ennavarihela muteko ettuura ya emompe weera yaattikitthele ale erino mwiikho ni yootthuna weera eweerihe okhala ootteela vamaithoni va Muluku.
14 Menento, ephome ya Kristu ti yootepa okhalano mwiitti. Owo akhaviheriwaka ni munepa wootteela wa Muluku ohimmala, Kristu ohiivaherera wa Muluku ntoko makeya oomalela. Ephome awe ennaneeriha okhalano yoosuweliha ya murima yooreera ni ennatxipiha soottheka sintannyera okhwa, hiiho nnoowera onvarela muteko Muluku mukumi.
15 Tivawonto owo oraawe mulipa oowiiraaniha a nivarihano nnyowani weera ale yiitthaninwe yaakhele yoohiyeriwa aya yoohimala, eyo enimweereya mwaha wa ole okhwiiye ni yootthuna weera evuluxiwe moorweela mwa nlivo olinvaawe weera eleveleliwe soottheka yaapankaaya khalayi emaara yaattharaaya nivarihano nakhalayi.
16 Wakhala weera nookhala nivarihano, ontthuneya weera mutthu owo opanke nivarihano nno akhwe toko weera nivarihano nno nlipe.
17 Mwaha wooweera nivarihano ninvara muteko wakhala weera mutthu opanke nivarihano nno ohookhwa, woona weera nno khaninvara muteko mutthu opanke nivarihano nno oreene mukumi.
18 Nave-tho nivarihano nakhalayi, khanaapatxenre* woohikhala ephome.
19 Mose aaleelakaru atthu ootheene woohima sa Nlamulo, owo aakuxa ephome ya ipuri ni ya imompe ni aatakansera ni maahi. Avinyaka aakuxa mapururu ooxeera atthukelela vamutathini ni aamisera valiivuruni* ephome ele ya nivarihano ni aahaamisera atthu ootheene,
20 eeraka: “Ephome ela nivarihano Muluku oolamulenlaaweni weera mutthareke.”
21 Nave-tho aamisera etenta* ni itthu sootheene saavareliwa muteko wa Muluku.
22 Moovarihana ni Nlamulo, itthu sootheene sinnatteelihiwa ni ephome, yaahiyeehiwa ephome khiyaavo yoottheka eneera eleveleliwe.
23 Tivawonto, waari wootthuneya weera ithoonyero sa wiirimu itteelihiwe mwa mukhalelo ene yoola. Menento itthu sa wiirimu sintthuneya makeya ootepaxa oreera ompwaha ola.
24 Mene Kristu khavolonwe nipuro nootteela nipakinwe ni atthu, yeeyo eri ethoonyero ya etthu ya ekhaikhai, menento ovolonwe wiirimu. Tivawonto, owo onweraawe orowa ohoolo wa Muluku weera hiyo nttottele mureerelo.
25 Owo khaakela wiivaherera ikwaha sintxipale ntoko hiihaale eeraaweno namakeya mutokweene aavolowaawe nipuro nootteela iyaakha sootheene ni ephome yaahaakhanle yawawe.
26 Waari hiiho, owo aamutthuneya ohaawa ikwaha sintxipale ovinyera epatxerero ya elapo. Mene vano mahiku ala oomalihera,* owo iisoonihenre ekwaha emoha paahi mwa ikwaha soothesene weera amalihe yoottheka iivahereraka mwaneene awe ntoko makeya.
27 Ntoko hiihaale mutthu onkhwaawe ekwaha emoha paahi, ni muhoolo mwaya anathorihiwa,
28 hiiho-tho Kristu ovahererinwe mwa ekwaha emoha paahi ntoko nlivo weera amalihe soottheka sa atthu antxipale; emaara yanaaveeli owo onkelaawe owa, owo khanweela soottheka, mene onweela waavuluxa atthu ale enanweherera.
