Yaalepelinwaaya Aheberi 2:1-18
2 Tivawonto nintthuneya ahu wiiwexexa nnene itthu niiwalaahu, ntoko yookhovelela weera nihihapuxiwe.
2 Wakhala weera masu yuulummwale evareliwaka muteko malaika a ekhaikhai, ole ohiniiwelela nlamulo ni opanke yoottheka ottaruxinwe moovarihana ni exariya.
3 Vanonto, woona weera mitthenka iyo sipatxenre olaleiwa ni Pwiya ahu ni noororomelihiwa ni atthu ale yiiwale. Vanonto, moota heeni nneeraahu nramuse ovuluxiwa otokweene?
4 Woona weera Muluku aari vamoha ni yaawosa, ahelelaka onamoona moorweela mwa ithoonyero, miiriira, miteko sintxipale sootikhiniha ni aavahakasa owera wa munepa wootteela moovarihana ni yootthuna awe.
5 Muluku khathanlale malaika weera elamuleleke elapo enyowani yeeyo enwa, yeeyo ninlaleyaahu.
6 Namoona mmoha oolepa mwa eparte emoha mwa soolepa eeraka: “Mutthu taani weera mmuupuweleke, naari mwaana a mutthu taani weera mmukosoopeke?
7 Nyuwo mompaka owo mukhaanini opwaha malaika ni monwariha nampurutxi a* ovuwa ni nttittimiho ni monvaha owera woolamulela itthu sootheene mpankaanyu ni matata anyu.
8 Nyuwo moheeriha itthu sootheene okhala vathi vamanaani awe.” Muluku anvahaka owera woolamulela itthu sootheene, owo khahiñye naari etthu emoha mano ehimwiiwelelaka. Nnaamweera vareene hiiho, hiyo khanimmoona Yesu alamulelaka itthu sootheene.
9 Mene hiyo ninnamoona anwanreene nampurutxi a* ovuwa ni nttittimiho mwaha woohaawa mpaka okhwa, yoowo oyevihinwe opwaha malaika, weera mwaha wa oreera murima otokweene wa Muluku weera akhwe mwaha wa atthu ootheene.
10 Itthu sootheene sookhala weera sinvuwiheke Muluku, nave sikhanle mwaha wa yoowo, menento weera anamwane antxipale yaakhele ovuwa, onnatthuneya weera Muhooleli Mutokweene akhale oomalela, weera Muluku aavuluxe moorweela mwa Muhooleli mutokweene owo.
11 Yesu vamoha ni ale owo owiitthannaawe erino Tiithi mmoharu paahi, tivawonto owo ohinuuliwaawe muru owiitthana asinnaka
12 eeraka: “Kinoosuweliha nsina nanyu wa asinnaka, ni variyari va muloko kinimoovuwihani ni itxipo.”
13 Nave-tho onnahima eeraka: “Miyo kinaamuroromele Muluku.” Nave-tho onneera: “Mukooneke! Miyo ni anamwane Yehova* okivanhaawe.”
14 Woona weera “anamwane” enneerela eparte ephome ni erutthu, owo-tho oheerela eparte itthu sene seiya, weera moorweela mwa okhwa wawe amunyaanye ole ontannyera okhwa, eyo tiiyo, Diabo.
15 Ni weera aataphule atthu ootheene yaale ekumi aya yootheene yaari akaporo mwaha woowoova okhwa.
16 Menento owo khankhavihera mwaha wa malaika, mene onkhavihera mwaha wa osuulu wa Abrahamu.
17 Tivawonto aatthuneyaawe okhala oolikana ni “asinnawe” mwa mikhalelo sootheene, weera akhale namakeya mutokweene oomoriwa ikharari ni oororomeleya onvara muteko wa Muluku ni yootthuna weera anvahe makeya ookwaneleene weera sileveleliwe soottheka sa atthu.
18 Woona weera owo aahaawa emaara eereriwaawe, owo onoowera waakhavihera ale eneereriwa.
