Yaalepelinwaaya Aheberi 11:1-40
11 Nroromelo, ororomela weera mweekhaikhai sinimweereya itthu iyo ninwehereraahu, ni yoowoonihera ya ekhaikhai weera ele hiyo nihinoonaahu yookhala.
2 Atthu akhalayi,* aavahiwa onamoona* mwaha wa nroromelo.
3 Mwaha wa nroromelo, hiyo noosuwela weera itthu sootheene wiirimu ni elapo ela* ya vathi sirehererinwe ni masu a Muluku, moota ene yoola avarelaka muteko itthu nihinweraahu woona owo oopaka itthu ninweraahu woona.
4 Mwaha wa nroromelo, Abeli anvaha Muluku makeya amwiitti vantxipale ompwaha Kaim. Nto mwaha wa ororomela iwo, owo ooheleliwa onamoona weera aari naxariya, woona weera Muluku aahaakhulela soovaha sawe. Nto nnaamweera Abeli akhwiiyeene, nlelo owo onnuuluma moorweela mwa nroromelo nawe.
5 Mwaha wa nroromelo, Inoki aathaamihiwa weera ahihaawe okhwa ni owo khaaphwanyinwe nipuro nri poothe, woona weera Muluku aamuthaamiha; mene ahinaaye othaamihiwa; owo aaheleliwa onamoona weera aari mutthu aamusiveliha Muluku.
6 Opwaha mwa yeeyo, woohikhalano nroromelo, khonwereya omusiveliha Muluku, woona weera ale emmwaattamela Muluku, entthuneya weera eroromeleke weera owo ookhala ni onnaatthuvela ale emmwaasa ni murima wootheene.
7 Mwaha wa nroromelo, Nowa aleeliwakaru itthu saakela weereya nnaamweera ahonne itthu iyo, owo aahoonihera omoova Muluku ni aapaka nikula weera avuluxe emusi awe; nto mwaha wa nroromelo nawe, owo oothoriha elapo ni ookhalihiwa naxariya.
8 Mwaha wa nroromelo, Abrahamu iitthaniwakaru, aahiiwelela arowaka nipuro nenno aakelaawe waakhela ntoko yoohiyeriwa; owo aattimula nnaamweera ahaasuwela nipuro aakelaawe.
9 Mwaha wa nroromelo, owo aakhala elapo yoohiyeriwa ntoko namawa elapo yeeyo alaiherinwaawe, akhalaka mutentani* vamoha ni Isaki ni Yakobe yaawo yaakela waakhela yoohiyeriwa vamoha ni yoowo.
10 Woona weera owo annaweherera esidade erino alserse* ekhaikhai, yeeyo elepelelinwe ni etekinwe ni Muluku.
11 Nave-tho, Sara mwaha wa nroromelo, nnaamweera uuluvanle owo aahaakhela owera woomuyara ole aalaiherinwe,* woona weera annamuroromela Ole aalaihenre.
12 Tivawonto, moorweela mwa mutthu mmoha yoowo ahaawera waayara anamwane, aayariwa anamwane antxipale ntoko ithenyeeri sa wiirimu ni ehinkontareya ntoko ihaava sa muxerexere mwa ephareya.
13 Nnaamweera yahaakhenle soolaiheriwa saya, atthu ootheene ala yaavirelela okhala oororomeleya mpaka okhwa; nnaamweera itthu iya yaakela waakhela muhoolo, menento mwaha wa nroromelo naya, waakhala ntoko weera awo ahaakhela, nave awo yannaaleela atthu weera awo yaari anamawa yaavira elapo ele.
14 Ale enuuluma hiiha ennoonihera weera ennaasaasa ni murima aya wootheene nipuro entthunaaya weera emake;
15 mwa yeeyo, waakhanle weera awo yannavirelela wuupuwelela mapuro yaakhummaaya, awo yaamutthikela mapuro awo.
16 Mene mwaha wooweera atthu ala yaasaasa nipuro nooreera, eyo tiiyo, nipuro ninkhuma wiirimu. Tivawonto, Muluku ohinwuuleliwaawe muru atthu ala wiitthaneliwa Muluku aya,* woona weera owo ohaarehererela esidade.
17 Emaara Abrahamu eereriwaawe, owo aahoonihera nroromelo nawe eereraka onvaherera Isaki mwanawe mmoha ene yoowo aakela waakhela moohakalala soolaiheriwa.
18 Nnaamweera Muluku aamulenle weera: “Osuulu* awe waakela oweela moorweela mwa Isaki.”
19 Mene owo annaroromela weera Muluku anwera onvinyereriha Isaki mwa alipa ookhwa, mene owo aamwaakhela mwanawe ntoko aari mookhwani; yooniheraka ele enkela weereya muhoolo.
20 Mwaha wa nroromelo, Isaki aamureeliha Yakobe ni Esawu aaleelaka itthu sinkela weereya muhoolo.
21 Mwaha wa nroromelo, Yakobe emaara aahalelaawe okhwa, owo aahaareeliha anamwane ootheene a Yosefe ni iilipiheraka ni muttootto awe, owo aamukokhorela Muluku.
22 Mwaha wa nroromelo, Yosefe ahalelaka vakhaaniini okhwa, owo aahuuluma woohima sa ottimula wa ana a israeli wExipitu ni aahaavaha miruku woohima sa etthu yaakelaaya otekela makhuva awe.
23 Mwaha wa nroromelo, Mose ayariwakaru, asipapawe yaamwiipithiha mpuwa mwa minyeeri miraru, woona weera mwaana ole aari ooreera, tivawonto yahiiwelenlaaya Nlamulo na mwene.
24 Mwaha wa nroromelo, Mose unnuwakaru, owo aakhootta wiitthaniwa mwaana a mwaana mwaamuthiyana a Farawo,
25 athanlaka ohasuliwa vamoha ni atthu a Muluku ohiya opuha mwa etempu vakhaaniini miteko sa soottheka,
26 woona weera owo aahoona othanyiwa wa Kristu okhala etthu yootepa otthuneya opwaha mihakhu sa wExipitu, mwaha wooweera owo annawehexexa nneene sene ele yaakelaaya otthuveliwa muhoolo.
27 Mwaha wa nroromelo, owo aakhuma wExipitu ahoovaka esara ya mwene, avirelelaka okhala a ikuru ntoko aaroomoona Ole ohinooneya.
28 Mwaha wa nroromelo, aahootxa efeesta ya Mpaasika ni aaheeriha weera ephome ettikittheliwe mmilako weera nlaika na Muluku nihiwiive anamwane aya oopatxeriwa.
29 Mwaha wa nroromelo, atthu a Muluku yaalapuwa Ephareya Yooxeera ntoko yaavira vatthayani yoowuuma, menento atthu a wExipitu emaara yeerenraaya opaka etthu emoha-moharu, awo yaamiriwa ni ephareya.
30 Mwaha wa nroromelo, atthu a Muluku erukurerakaru exiri ya* oYeriko mpuwa mwa mahiku 7, iyo saakurumuwa.
31 Mwaha wa nroromelo, Rahabi namararuwa khaakhwiiye vamoha ni atthu oohiiwelela, woona weera owo aawaakhela nnene anamahottela.
32 Kihimeke-tho eheeni? Yaakhanle etempu miyo kaamuuluma-tho woohima sa Gideyoni, Barakhi, Sansao, Yefte, Davidi omuhela mpuwa Samuweli ni maprofeta makina-tho.
33 Mwaha wa nroromelo, awosa aawera waawina mamwene, aakhaliha exariya, ahaakhela soolaiheriwa, aawala iyano sa akharamu,
34 awo yaawera otxipiha mooro, yaawera otthawa wiiviwa ni ekatana, yaari atthu ootteettheya mene yaakhalihiwa oolipa, yaakhalihiwa oowera okhottoni ni yaahaawina amwiittani aya.
35 Asithiyana yaawaakhela atthu aya ookhwa yaavinyererihinwe, menento atthu akina yaahasuliwa mwaha wooweera khayaakhulenle ovuluxiwa moorweela mwa nlivo weera yakhwa vale evinyererihiwe weera yaakhele ekumi yooreera.
36 Aani, akina a yaawo aheereriwa moorweela mwa oveehiwa ni owaxuliwa; opwaha mwa yeeyo, awo yaatthukiwa ni ekorenti ni yaawaleliwa mukateya.
37 Akina yaavonyiwa maluku, yaaheereriwa, yaathaliwa eriyariru, akina ahiiviwa ni ekatana, ni akina yaaheetta ewanreene exapala ya ekhonttolo ni ya epuri, ethoiwaka, ehaawaka, ehasuliwaka;
38 ni awo yaari ooreera murima woohiphwanela okhala elapo ela, awo yanneetteetta mmakareni, mminyaakoni, mmakhukuni ni mmalittini.
39 Menento, nnaamweera ootheene ala yaahelelinwe onamoona wooreera ni Muluku mwaha wa nroromelo naya, awo khayonne okwaniheriwa wa soolaihera,
40 woona weera Muluku oonilaihera etthu yooreera onireherenlaawe, hiiho owo onkela waakhaliha oomalela vamoha ni hiyo.
