Yaalepelinwaaya Aheberi 13:1-25
13 Nvireleleke wooniherana nsivelo ntoko atthu a emusi emoha.
2 Muhittiwaleke owaakhela aletto,* woona weera mwaha woowaakhela aletto, atthu akina ehisuwelaka yaahaakhela malaika.
3 Nwuupuweleleke ale etthukinwe mukhalaka ntoko mutthukinwe vamoha ni yaawo ni ale enhasuliwa, woona weera nyuwo-tho muneerela eparte erutthu emoha ni yaawo.*
4 Ntheli nttittimihiweke ni atthu ootheene, ni ale ethelanne, eroromeleyeke wa mukina ni mukhwaawe, woona weera Muluku onimwaathoriha ale enkonihana woohireerela* ni anamararuwa.
5 Mweekumini mwanyu muhisiveliwekexa ni musurukhu, opwaha mwa yeeyo, muhakalaleke ni itthu muraanyuno. Woona weera Muluku enre: “Nkinkela woohiyani naari woonyanyalani.”
6 Weera nikhale oolipa murima nihimaka: “Yehova* tonkikhavihera;” tivanto nkinkela woova etthu. Eheeni onkelaawe okipakela mutthu?”
7 Nwuupuweleleke ale enoohoolelani* variyari vanyu ni yaawo enooleelani masu a Muluku, nwehexexeke nnene omutthu aya ni mutakiheke ororomeleya waya.
8 Yesu Kristu ti yoole oosilo, oolelo ni a mahiku ootheene a muhoolo ni owo khantxentxa.
9 Muhiihiye nwokiwaka ni sooxuttiha soovirikana ni iye musuwenlaanyu, mene muroromeleke nsivelo na Muluku nenno ninkela olipiha mirima sanyu ohiya yootxa, woona weera ale entepa ovahaxa mwiitti yootxa, awo khenttottela mureerelo yootxa eyo.
10 Hiyo nookhalano altaari, yoowo atthu ale envara muteko wa Muluku mutentani* ehikhanlaayano owera wootxa vaavo.
11 Asinama ale yaahitiwa, ephome aya yannakuxiwa ni namakeya mutokweene eroihiwaka nipuro nootteela, weera yavahiwe ntoko makeya oolivela soottheka, menento inama iye sannarowa ohisiwa vaate va mittetthe.
12 Hiiho-tho Yesu aahaawa vaate va esidade weera aatteelihe atthu ni ephome awe.
13 Vanonto, nrowe nakumane nuuwo vaate va muttetthe, vanonto nrowe nivilele wuuliwa muru hiiho ntoko owo aavilelaawe.
14 Vanonto, woona weera va khiyaavo esidade eneera ekhale wa mahiku ootheene, nrowe niilipihereke waasa ni murima ahu wootheene esidade enkela owa muhoolo.
15 Moorweela mwa Yesu, hiyo ninnanvuwiha Muluku ikwaha sootheene. Ninnapaka eyo nivarelaka muteko eyano ahu weera naalaleere atthu nsina nawe, ela yoovaha nnanvaha ahu Muluku.
16 Opwaha mwa yeeyo, muhittiwaleke opaka itthu sooreera ni okawana itthu muraanyuno ni atthu akina, woona weera amakeya ntoko ala ennamusivela Muluku.
17 Nwiiweleleke ale enoohoolelani* variyari vanyu ni mpakeke eyo muhiikhupanyeraka, woona weera awo ennookosoopani ni enimwaakhula ohoolo wa Muluku. Hiiho awo enoovara muteko aya owo moohakalala ohiya yiikhupanyeraka, woona weera eyo yaamookumiherani maxupo nyuwo.
18 Muhihiye onivekelela hiyo, woona weera hiyo khaninhovela weera nookhalano yoosuweliha ya murima yooreera, woona weera nintthuna okhala oororomeleya mwa itthu sootheene.
19 Kinnawoopererani weera mukivekeleleke miyo weera kiwe iwo moohipisa.
20 Muluku a murettele, onvinyererinhe Yesu mukukhuli ahu mutokweene a iputtiputthi mookhwaani, yoowo orino ephome ya nivarihano ya mahiku ootheene, vano Muluku
21 oovaheeni itthu sootheene sooreera weera mpakeke yootthuna awe moorweela mwa Yesu Kristu weera opake ele eri yooreera vamaithoni vawe ni weera avuwihiwe Muluku wa mahiku ootheene. Amem.
22 Kinnawoopererani asinna weera mwiiwe moopixa murima masu ala oolipiha koolepenlaakani mwa ekaarta ela ekhaanini.
23 Kintthuna weera musuwele weera munnihu Timotiyu ootaphuliwa, owo awa vale nno moohipisa, miyo kinimoowa vamoha ni owo iwo ooxekurani.
24 Mwaavaherere isalaamu saka atthu ootheene enhoolela* variyari vanyu ni atthu ootheene oororomeleya. Asinna a wItaliya ennoorumihelani isalaamu.
25 Oreera murima otokweene wa Muluku okhale ni nyuwo.
