Yaalepelinwaaya Aheberi 12:1-29
12 Woona weera hiyo nirukurerinwe ni nihutte nna ntokweene na anamoona, nihiye miritti sootheene sa yoottheka seiyo sinnitthuka ni ntthimakeke ni ovilela ephiro yeeyo Muluku oniiyaathenraawe ohoolo wahu,
2 ninwehexexaka Muhooleli Mutokweene yoowo Ommaleliha nroromelo nahu, eyo tiiyo, Yesu. Mwaha wa ohakalala ooniherinwaawe owo khuulinwe muru, ni oovilela okhwa vamwirini wa nihaaxero,* vano owo ookilaathi moono woolopwana wa ehitxe* ya Muluku.
3 Tivawonto, muupuweleleke nnene ntakihero na ole ovilenle oveehiwa ni anamattheka yaawo yiithorinhe mwaneene aya, mweera hiiho, nyuwo khamunkela okhulumuwa naari otthikela ottuli.
4 Emaara yeeyo munvirelelaanyu owanano soottheka, nyuwo nlelo khanvilenle mpaka ophiyera oyeeha ephome anyu.
5 Ni moottiwala moomalela miruku seiyo nvahinwaanyu, hiihaale ntoko tiithi onaavahaawe anamwane awe, eeraka: “Mwanaka, muhiramuse nttaruxo na* Yehova* naari muhikhulumuwe emaara yeeyo onoovahaaweni miruku.
6 Yehova* ommuttaruxa ole ommusivelaawe, owo onnanwaxula ole ommwaakhulelaawe ntoko mwanawe.”
7 Mwattaruxiwa vale, nyuwo ontthuneya ovilela, Muluku onookosoopani ntoko anamwane awe. Vano mwaana heeni ohinttaruxiwa* ni apapawe?
8 Vano Muluku aahoottaruxakani ntoko onaattaruxaawe anamwane awe akina, tthiri nyuwo khaiyene anamwane awe eekhaikhai, nyuwo anamwane oophwanyiwa.
9 Opwaha mwa yeeyo, asitiithi ahu eniyanre yannanttaruxa mene hiyo nannaattittimiha. Neereke hiyo khanaatthuneya okhala oolikaneene weera nimwiiwelele Tiithi ahu oomunepani* weera nikhale akumi?
10 Menento awo enittarunxe mwa etempu vakhaaniini moovarihana ni ele awo yoonaaya okhala yooreera, menento Atiithi ahu a wiirimu ennanttaruxa emaara yootheene weera nikhale ootteela ntoko awo eraaya.
11 Ekhaikhai weera, emaara mutthu onttaruxiwaawe khonhakalala, mene onoona ovoreya.* Nto muhoolo mwaya, nttaruxo ninnaakhavihera ale enttaruxiwa opaka itthu* sa murettele ni sa exariya.
12 Mulipiheke matata ootteettheya ni makutha oohilipa,
13 nvireleleke wookolola iphiro munviraanyu weera ale eri oorakala ehitepe, opwaha mwa yeeyo, yeere olama.
14 Mwaasaaseke okhalano murettele ni atthu ootheene, okhala ootteela, woona weera khaavo mutthu oohitteelihiwa oneera awoone Apwiya.
15 Mwiikosoope weera ahikhale mutthu aneera ahiye wooniheriwa oreera murima otokweene wa Muluku, weera muhihiye mukakaari mukina woohapala ophuwaka, okumiheraka maxupo weera waahapale atthu antxipale.
16 Mwiikosoope weera variyari vanyu ahikhale mutthu onkonihana woohireerela* naari ohinttittimiha itthu sa Muluku ntoko Esawu, yoowo aatxentxaninhe edireitu awe ya otokweene* ni yootxa.
17 Ntoko nyuwo musuwenlaanyu, muhoolo mwaya, emaara owo aatthunaawe oreelihiwa, owo aakhoottiwa.* Nnaamweera owo aanyeserera ikwaha sintxipale amorihaka maithori weera atthikiheriwe otokweene awe ni weera ekhale matxentxo, khavaawereñye.*
18 Woona weera nyuwo khamwaattamenle mwaako waavareya, yoowo waapatta mooro naari khanvanre mahutte yaariipihanne ni epiphi yintxipale ni epheyo ya owali,
19 naari oruma wa nipenka* naari nsu nuulumme. Nto muloko wa atthu wiiwakaru eyo waatxonttela weera ohileeliwe-tho etthu.
20 Woona weera awo yannoova vantxipale nlamulo nenno naavahinwe, neera: “Yoole anaatave mwaako, pooti okhala mwaamunama, akhwe.”*
21 Etthu yonnaaya yaari yootepa woopiha mpaka Mose aaheera: “Kinoothukumela mwaha woowoova.”
22 Mene nyuwosa mwaattamenle mwaako Siyoni ni esidade ya Muluku mukumi, eyo tiiyo, Yerusalemu a wiirimu ni muloko mutokotoko wa malaika*
23 muloko wootheene wa atthu ni muloko wa anamwane oopatxera oyariwa a Muluku yaawo elempwale masina aya wiirimu ni aamwaattamela Muluku yoowo ori mphuki aatthu ootheene, mphuki a ekumi wiirimu ni a ekumi ya omunepani ya anaxariya yaawo emalelihinwe,
24 ni ekumi ya Yesu yoowo onniiraaniha moorweela mwa nivarihano nnyowani ni ephome awe yeeyo oñyeehenraawe hiyo, yeeyo eri yootepa ootthuneya* opwaha ephome ya Abeli.
25 Mwiikosoope weera muhikhootte owiiwelela* ale enhima itthu sinkela weereya muhoolo. Mwaha wooweera ale yaakhontte owiiwelela ale yaahima itthu saakela weereya valaponi muhoolo, khayaawenre ovuluwa. Nto onooneya weera, wakhala weera hiyo-tho nnoohiya omwiiwelela ole onuuluma areene wiirimu, khaninkela ovuluwa!
26 Emaara ene yeele nsu na Muluku naahoopopiha elapo ya vathi, mene vano, owo onnalaihera weera: “Kinootthikela-tho ohiya paahi ottikinya elaporu ya vathi, kinoottikinya-tho erimu.”
27 Masu ooweera “Kinootthikela-tho” enoonihera weera Muluku onoovinxa itthu seiyo sinttikinyeya, itthu sene seiyo ohipattunxaawe.
28 Tivawonto, woona weera ninkela waakhela omwene yoowo ohinkela ottikinyiwa, nivirelele waakhela oreera murima otokweene weiwo onkela onikhavihera onvarela muteko wootteela Muluku mwa moota owo onaakhulelaawe, nimoovaka* ni nimuttittimihaka.
29 Woona weera Muluku ahu ori ntoko mooro onlaliha.
Footnotes
^ Nwehe masu oowiiwanyeihiwa.
^ Naari: “ekatera.”
^ Naari: “olaka wa.”
^ Naari: “ohinlakiwa.”
^ Naari: “a ikumi sahu.”
^ Naari: “onriipiwa murima.”
^ Naari: “miteko.”
^ Nwehe masu oowiiwanyeihiwa.
^ Naari: “opatxera wawe oyariwa.”
^ Eyo tiiyo, “apapawe yaakhootta.”
^ Ni Ekereku: “yaahootxeeleya.”
^ Naari: “nlope.”
^ Naari: “avonyiwe maluku, iiviwe.”
^ Naari: “malaika mantxipale.”
^ Naari: “oreera.”
^ Naari: “muhaasaasere mathowa oohiiwiiwelela.”
^ Naari: “nimoovaka Muluku.”
