Yaalepelinwaaya Aheberi 10:1-39
-
Amakeya a inama kheyaakwanela (1-4)
-
Nlamulo naari ethoonyero na itthu sooreera saakela owa muhoolo (1)
-
-
Makeya Akristu oomaliha soottheka wa mahiku ootheene (5-18)
-
Ephiro enyowani ni ekumi enyowani yoovolowa (19-25)
-
Nihitxompeleke mithukumano (24, 25)
-
-
Yoohima woohima sa otthuneya waya osepa opaka yoottheka moolakela (26-31)
-
Ororomeleya ni nroromelo weera nivilele (32-39)
10 Nlamulo naari ethoonyero sa* itthu sooreera saakela owa muhoolo, mene nno, khanaakhanle itthu sene seiyo sooreera, nave nno khanaakela weeriha weera amakeya yaavahiwa moohihiyerereya iyaakha sootheene yaakhalihe oomalela atthu ale emmwaattamela Muluku weera emukokhorele.
2 Opwaha mwa yeeyo, neereke khiyaakela ohiiwa ovahiwa amakeya? Ale enanvarela muteko Muluku yatteelihiwa, yaamuttiwala weera yaakhalano soottheka.
3 Mene, moovirikana niiyo, amakeya awo envahiwa eyaakha ni eyaakha, enimweera owuupuxera atthu weera anamattheka,
4 woona weera khonwereya ephome ya imompe ni ya ipuri omaliha soottheka.
5 Tivawonto, emaara Yesu aawaawe valaponi, enre: “‘Nyuwo khamwaatthunne amakeya ni soovaha, mene mukireherenle erutthu.
6 Nyuwo khanwaakhulenle amakeya oohisiwa naari amakeya oolivela soottheka.’
7 Nto miyo kaaheera: ‘Miyo kiri va* (murooluni* yoolempwa woohima sa miyo) ooh Muluku aka, miyo kiwenle opaka yootthuna anyu.
8 Woopatxerani owo enre: “Nyuwo khamwaatthunne naari khanwaakhulenle amakeya, soovaha, soovaha soohisiwa naari amakeya a soolivela soottheka”, amakeya yaawo envahiwa moovarihana ni Nlamulo;
9 avinyaka owo onnahima: “Miyo kiri va,* kiwenle opaka yootthuna anyu.” Owo oomaliha itthu soopatxera weera ahele itthu sanaaveeli.
10 Moorweela mwa “yootthuna”* ene yeeyo, hiyo nootteelihiwa ekwaha emoha wa mahiku ootheene moorweela mwa yoovaha ya erutthu ya Yesu Kristu.
11 Opwaha mwa yeeyo, anamakeya ootheene ennakhala oolikaneene weera evare muteko wa Muluku mahiku ootheene ni ennapaka eyo ikwaha sintxipale yaavahaka amakeya amoharu, amakeya yaawo ehinwera omaliha soottheka moomalela.
12 Mene Kristu onvaha makeya yoowo ommaliha soottheka wa mahiku ootheene ni ookilaathi moono woolopwana wa Muluku,
13 ti weiwo onwehereraawewo mpaka Muluku waavonyera vathi vamanaani awe amwiittani awe.
14 Nto ni yoovaha emoha paahi, aavulunxaawe wa mahiku ootheene ale entteelihiwa.
15 Opwaha mwa yeeyo, munepa wootteela onnanihelela onamoona weeraka:
16 “‘Nna nivarihano kinkelaaka opaka yaviraru mahiku ene yaawo,’ ohimme Yehova.* ‘Kinaahele vamurimani vaya malamulo aka ni kinkela olepa mmuupuweloni mwaya.’”
17 Ni onnaatxeerera eeraka: “Ni nkinkela-tho wuupuwela soottheka sanyu ni kinoottiwala soopaka sanyu soonanara.”*
18 Vanonto, Muluku alevelela soottheka sootheene iya, khonkela-tho otthuneya onvaha makeya weera sileveleliwe soottheka.
19 Tivawonto asinna, moorweela mwa ephome ya Yesu, hiyo ninnaroromela moomalela ephiro ela enniroiha nipuro nootteela,
20 ntoko mutthu onvira vakortiinani, owo oohula ephiro enyowani yeeyo emphwanyiha ekumi, ekortiina eyo erutthu awe,
21 ni woona weera nookhalano namakeya mutokweene a empa ya Muluku,
22 nimwaattameleke Muluku ni murima ahu wootheene ni nroromelo noomalela ni murima woottikittheliwa, weera nivuluxiwe mwa yoosuweliha ya murima yoonanara ni irutthu sahu sirapihinweene ni maahi ootteela.
23 Tivawonto, nivarexexe eparakha nraahuno yoolaleya ohoolo wa atthu woohima sa yooweherera ahu, nihikhulumuwaka, woona weera ole onlaihenre toororomeleya.
24 Nuupuwelelaneke mukina ni mukhwaawe weera noopereraneke nsivelo ni miteko sooreera,
25 nihitxompelaka mithukumano ntoko eraaya yookhovelela ya atthu akina, mene ntepeke olipihana mukina ni mukhwaawe, woona weera nihiku na Muluku nri vakhiviru.
26 Vanonto, vaava nikhanlaahuno osuwela weekhaikhai, nattheka moolakela khaavo-tho makeya onkela olivela yoottheka eyo.
27 Mene ninnaweherera othorihiwa, nave-tho ninnaweherera esara yeeyo envarela ntoko mooro, yeeyo enkela waahisa atthu yaale envirikanyiha nlamulo.
28 Mutthu ori poothe onkela ohiiwelela Nlamulo na Mose onkela wiiviwa woohimoreliwa ikharari, moovarihana ni onamoona wa atthu eeli naari wa atthu araru.
29 Munoonela hayi? Neereke khemphwanela nttaruxo ntokweene atthu ale ehimuttittiminhe Mwaana a Muluku, ale ehinhela mwiitti ephome ya nivarihano yeeyo etteelihinwe, ni ale enruwana ni ehinttittimiha munepa wa Muluku yoowo onvaha oreera murima otokweene?
30 Woona weera hiyo noomusuwela Ole onhima: “Winlela ikukuttula ti wawaka, miyo kinimwaatthikihera.” Nave-tho: “Yehova* onimwaathoriha atthu awe.”
31 Mweekhaikhai ti wootepaxa woopiha othorihiwa ni Muluku mukumi.
32 Nvirelele wuupuwela mahiku akhalayi, nyuwo muxutterakaru ekhaikhai mwaavilela nnaamweera mwaaviriha maxupo.
33 Ikwaha ikina nyuwo mwannaviriha maxupo a oveehiwa ohoolo wa atthu* ni ikwaha ikina nyuwo mwaakhala ni atthu ale yaaviriha maxupo awo.
34 Mene nyuwo mohaamorela ikharari ale yaatthukinwe mukateya ni mohaakhulela moohakalala oyeleela mihakhu sanyu mwaha wooweera nyuwo moosuwela weera mookhalano itthu sooreera sihimmala.
35 Tivawonto, muhihiye olipa wanyu murima* iwo, woona weera nyuwo munootthuveliwa mwaha wa olipa wanyu murima.
36 Tivawonto, nyuwo ontthuneya ovilela weera mwapaka vale etthu Muluku ontthunaawe mwaakhele etthu owo olaihenraawe.
37 Woona weera “ehanle etempu vakhaaniini” ni “ole onwa onoophiya, moohipisa”.
38 “Murumeyi aka naxariya onaakhale mwaha wa nroromelo nawe, mene atthikela ottuli nkinkela osiveliwa nuuwo”.
39 Aani, hiyo khaiyene atthu nintthikela ottuli weera nnyaanyiwe, mene hiyo atthu ninroromela weera naakhele ekumi.
