Yaalepelinwaaya Aheberi 3:1-19
3 Tivanto asinna oororomeleya, nyuwo muneerela eparte ya ale ewompwale weera erowe wiirimu, ntthareke ntakihero na ole nimwaakhulenlaahu ntoko murummwa ni namakeya mutokweene, Yesu.
2 Owo aari oororomeleya wa Muluku yoowo aamuthanlenle muteko awe, hiihaale ntoko Mose aaraawe oororomeleya emaara aavaraawe mpaani mwa Muluku.
3 Owo* onnaphwanela waakhela ovuwa otokotoko ompwaha Mose woona weera ole ompaka empa onnattottopeliwa opwaha empeene.
4 Mweekhaikhai, yeele eri empa etekinwe ni mutthu, menento itthu sootheene sipattuxinwe ni Muluku.
5 Mose aari oororomeleya a empa yootheene ya Muluku, ni muteko aavaraawe oovaha onamoona wa itthu Muluku aakelaawe omuleela muhoolo,
6 menento Kristu ntoko mwaana a empa ya Muluku ori oororomeleya. Menento hiyo anamwane a empa ya Muluku, wakhala weera nnoovirerelela okhala oororomeleya ni nnimuuluma woohima sa yooweherera ahu, yooweherera ene yeeyo ennihakalaliha.
7 Hiihaale ntoko munepa wootteela onhimaaya weera: “Wakhala weera munimwiiwa nsu nawe olelo,
8 muhuumihe mirima sanyu hiihaale ntoko yaatannyinwaaya esara aka nihiku nenno keererinwaaka onikareni,*
9 weiwo makholo anyu yaakeerenraaya nnaamweera yonne miteko saka mpuwa mwa iyaakha 40.
10 Tivawonto miyo kiriipinwaaka murima ni nloko nna mpaka weerela: ‘Vamurimani vaya awo ennakhootta wiiwelela etthu miyo kinhimaaka ni khenwera osuwela miteko saka.’
11 Nto miyo kaalipela musarani mwaka keeraka: ‘Khamunkela ovolowa moowiitthuuwani mwaka.’”
12 Mwiikosoope asinna weera ahikhale naari mmoha a nyuwo oneera unnuwihere murima woohikhalano nroromelo, ahiyaka omuroromela Muluku;
13 nvireleleke olipihana mukina ni mukhwaawe mahiku ootheene, nenne nri nihiku nneeriwa olelo, weera ahikhale mukina a nyuwo aneera uumihe murima awe, awokiwaka ni owera wa yoottheka.
14 Woona weera hiyo ninkela weerela eparte ele Yesu Kristu oneerelaawe eparte, wakhala weera nnoovirelela okhala oororomeleya hiihaale ntoko naaroromenlaahu woopatxerani.
15 Ntoko Soolepa saahimmaaya seeraka: “Wakhala weera munimwiiwa nsu nawe olelo, muhuumihe mirima sanyu hiihaale ntoko yaatannyinwaaya esara aka.”
16 Taani yiiwale masu ale ni nnaamweera vareene hiiho enatannya esara ya Muluku? Khaiyene yaari ootheene ale yaakumihinwe wExipitu ni Mose?
17 Opwaha mwa yeeyo, taani ale Muluku aanyoonyerinwaawe mpuwa mwa iyaakha 40? Khaiyene yaari ale yaapanke yoottheka enakhwela onikareni?*
18 Vanonto, taani ale Muluku aalipenlaawe weera khankela ovolowa moowiitthuuwani mwawe? Khaiyene yaari atthu ale yahaamwiiwelenle?
19 Ninnoona weera atthu ale yaahootxeela ovolowa moowiitthuuwani mwawe, mwaha wooweera khiyaakhanleno nroromelo.
