Yaalepelinwaaya Aheberi 6:1-20
6 Vanonto nihiñyaahu sooxuttiha soopatxera sa Kristu, nrowe nipake ele ninweraahu weera nivirelele okhala oolipa weera nihitthikele-tho oxuttera itthu soopatxera ni omuroromela Muluku, eyo tiiyo: ottharuwa opaka itthu* soonanara ni omuroromela Muluku.
2 Sooxuttiha woohima sa opatiso, wiiyaatheriwa matata, ovinyerera wa alipa ookhwa ni othorihiwa woohimala.
3 Nikhaviheriwaka ni Muluku nnookhalano nroromelo noolipa.
4 Atthu akina aakhootta sooxuttiha seekhaikhai, ni ti wooxupa waakhavihera weera erukunuxe murima ni ottharuwa, woona weera awo ahaakhela muthuko onkhuma* wiirimu ni munepa wootteela,
5 mwaha wooweera awo ahaakhelela nnene sene masu a Muluku ni mareeliho yaawo envarihana ni elapo enyowani enwa,
6 wa ale ehapunwe ti wooxupa waakhavihera atthu awo weera erukunuxe murima, mwaha wooweera ennamuthomeya veeli Mwaana a Muluku vamwirini wa nihaaxero* ni ennaweeriha atthu akina weera enveeheke.
7 Vano etthaya enrupeliwa epula ikwaha sintxipale enniimiha soowiima ewiimiheraka ale enlima, awo mareeliho a Muluku.
8 Mene wakhala weera simmeliha miri sa miiwa ni ifuloore sa miiwa namalima owo onnahiya ematta eyo ni onnalapha, omamaliheroni waya onnahisa.
9 Oosiveleya, nnaamweera hiyo nuulumaka mwa moota ene yoola, mene hiyo ninnaroromela itthu sooreera wa nyuwo, itthu sene seiyo sinvarihana ni ovuluwa,
10 Muluku khaiyene oohiroromeleya weera attiwale miteko sanyu sootheene ni nsivelo moonihenraanyu nsina nawe, mwaha wooweera mohaakhavihera ale eri oororomeleya ni munnavirelela waakhavihera.
11 Mene nintthuna weera mutthu ti mutthu a nyuwo oonihere nthiti nene nimoharu nenno mwaakhanlaanyuno woopatxerani weera mukhaleno yooweherera yoororomeleya mpaka okhwipi,
12 khanintthuna weera mukhale ooreesi, mene nintthuna weera mwaatakiheke ale mwaha wa nroromelo ni opixa murima, yaakhenle soolaiheriwa.
13 Emaara yeeyo Muluku aamulaiheraawe Abrahamu, woona weera khookhanle mutthu mukina mutokweenexa ompwaha yoowo, owo aalipela mwaneene awe,
14 eeraka: “Mweekhaikhai, miyo kinimooreelihani ni kinimwaatxeerera osuulu anyu.”
15 Vano Abrahamu ooniherakaru opixa murima, aahoona okwanela wa yoolaihera ela.
16 Emaara yeeyo mutthu ori poothe onlipelaawe, owo onnalipela aromolaka nsina na mutthu mutokweenexa, ni eyo ennamaliha ovaanyihana ori poothe mwaha wooweera yoolaihera eyo ennoonihera weera owo onhima ekhaikhai.
17 Emoha-moharu-tho, Muluku emaara yeeyo aalakenlaawe owoonihera ale yeera ehiyeriwe soolaihera weera yoolakelaawe khiyaakela otxentxeya, owo aahaaroromeliha alipelaka,
18 weera moorweela mwa soolaihera ni olipela wawe, weera hiyo nitthawenle wa Muluku weera nivarexexe yooweherera ahu, woona weera noolipihiwa, aani, Muluku khanootha olipela wawe ni soolaihera sawe khasintxentxeya.
19 Yooweherera nraahuno eri ntoko ankora a ekumi ahu yoowo onnikhavihera weera nikhale oolipa ni oohihovela mwaha wooweera ennanivoloiha empa ya Muluku mpaka wiithela wa ekortiina,
20 weiwo ovolonwaawe muhooleli ahu: Yesu, yoowo okhanle namakeya mutokweene a mahiku ootheene ntoko hiihaale Melkisedeki.
