Yaalepelinwaaya Aheberi 5:1-14
5 Yoole ori namakeya onthanliwa variyari vaatthu ni yootthuna weera anikhavihereke ni miteko sinvarihana ni omukokhorela Muluku, weera owo aveleele soovaha ni amakeya ni yootthuna weera sileveleliwe soottheka.
2 Owo onnawera waareerela murima ale oohikhalano osuwela ni enttheka,* woona weera owo-tho ookhalano sootteettheya sawe.
3 Tivawonto, owo ontthuneyaawe onvaha makeya mwaha wa soottheka sawe hiihaale ntoko onanvahaawe mwaha wa soottheka sa atthu.
4 Khaavo mutthu oniithanlela okhala namakeya mutokweene, mene Muluku paahi ommuthanla mutthu owo hiihaale ntoko aamuthanliyaawe Arao.
5 Vamoha-moharu-tho, Kristu khiivuwinhe mwaneene awe iikhalihaka namakeya mutokweene, mene Muluku onvuwinhe amweerelaka: “Nyuwo Mwanaka; olelo miyo kookhala Atiithi anyu.”
6 Ntoko ohimmaawe iparte ikina sa Soolepa: “Nyuwo namakeya a mahiku ootheene ntoko Melkisedeki.”
7 Emaara Kristu aaraawe valaponi owo aapaka mavekelo ni annamutxonttela yoowo orino owera wonvuluxa mookhwaani, akhuwelaka vantxipale ni ariipinweene murima, woona weera owo annamoova Muluku, aahiiviwa.
8 Nnaamweera aareene Mwaana a Muluku, owo aaxuttera wiiwelela mwaha wa maxupo ovirinhaawe.
9 Mwaha woowiiwelela, muhoolo mwaya owo ookhalihiwa muhooleli aatthu ootheene ale eniiwelela weera yaphwanye ekumi yoohimala,
10 mwaha wooweera othanlinwe ni Muluku ntoko namakeya mutokweene hiihaale ntoko aaraawe Melkisedeki.
11 Nookhalano itthu sintxipale nintthunaahu wooleelani woohima sa yoowo, mene ti wooxupa owiiwanyeihani mwaha wooweera mohiikhaliha atthu oopisa wiiwexexa.
12 Mweekhaikhai, nnaamweera ewoora ela nyuwosa mutthuneyaka okhala alipa ooxuttiha, mene onnatthuneya-tho mutthu weera ooxuttiheni veeli itthu soopatxera woohima sa masu a Muluku, woona weera nyuwosa nlelo munwura eleite ohiya yootxa yoolipa.
13 Woona weera ole onwura eleite nlelo mwaana, mwaha wooweera khaniiwexexa sooxuttiha sa exariya.
14 Woona weera yootxa yoolipa ti ya atthu oowunnuwa yaawo enwera ovarihela muteko owera woosuwela ohiyaniha yooreera ni yoonanara.
Footnotes
^ Naari: “ehiniiwelela.”
