Yaalepelinwaaya Aheberi 4:1-16
4 Tivawonto, woona weera yoohala yoolaihera emoha yoovolowa moowiitthuuwani mwa Muluku, mwiikosoope weera ahikhale naari mutthu mmoha a nyuwo yoowo onkela wooniwa okhala oohiphwanelela ovolowa moowiitthuuwani mmo.
2 Woona weera noolaleeriwa mitthenka sooreera hiiho ntoko awo-tho yaalaleerinwaaya, menento masu awo yiiwalaaya khiyaavarenle muteko, woona weera awo khayiiranne vamoha ni ale yiiwelenle.
3 Vano, woohima sa hiyo ninroromela, noovolowa moowiitthuuwani mwa Muluku hiiho ntoko owo onhimaawe: “Kaalipela musarani mwaka: ‘Khamunkela ovolowa moowiitthuuwani mwaka,’” nnaamweera mwaneene yoowo iitthuuwale amalihakaru muteko woopattuxa elapo.
4 Woona weera eparte emoha ya Soolempwa ennuuluma sa nihiku na na 7, yeeraka: “Muluku amalihakaru ovara miteko sawe, nihiku na na 7, owo aahiitthuuwa”,
5 Ni owo-tho aaheera: “Khamunkela ovolowa moowiitthuuwani mwaka.”
6 Vanonto, woona weera nlelo ennahalela atthu ovolowa moowiitthuuwani mmo ni ale yaalaleerinwe mitthenka sooreera woopatxerani, khenkela ovolowa moowiitthuuwani mmo mwaha wa ohiiwelela,
7 tivawonto, evinreene etempu yintxipale Muluku aahima mu nsalmuni na Davidi, hiihaale ntoko kihimmaka woopatxerani wa ekaarta ene yeela: “Wakhala weera munimwiiwa nsu nawe olelo va, muhuumihe mirima sanyu. Nave-tho owo onnathanla nihiku nikina nenno nneeriwa “olelo”.
8 Waakhanle weera Yehoxuwa aahoolenle atthu aaroihaka elapo yoowiitthuuwa, Muluku khaakela wuuluma sa wiitthuuwa ahimaka nihiku nikina.
9 Ninnahala nihiku nimoha noowiitthuuwa, ntoko nihiku na esaabadu wa atthu a Muluku.
10 Woona weera mutthu ovolonwe moowiitthuuwani mwa Muluku, ohiitthuuwa miteko sawe. Hiihaale ntoko Muluku iitthuuwalaawe miteko sawe.
11 Tivawonto, nipakeke ele ninweraahu weera nivolowe moowiitthuuwani mmo mwa Muluku, weera ahikhale mutthu aneera atthare ntakihero na ohiiwelela.
12 Tthiri masu a Muluku makumi ni aakhalano owera, ni awo ti oowiithaxa opwaha ekatana eri poothe yoononiwa ninno-ninno. Woona weera ennavolowa mpaka ohiyaniha ekumi* ni munepa,* ni ennaphiya enlupaanyeyaayavo makhuva mpaka mpuwa mwa makhuva awo, ni ennawera ohiyaniha minyuupuwelo ni sootthuna sa murima.
13 Khiyaavo yoopattuxiwa evitheñye Muluku ohinweraawe woona, mene itthu sootheene siri vasiiyoni vene, ni ole onkela onithoriha onnoona.
14 Okhala weera nookhalano namakeya mutokweene, Yesu Mwaana a Muluku yoowo ovolonwe wiirimu, nihihiye ohima weera ninnamuroromela yoowo.
15 Namakeya ahu mutokweene oosuwela sootteettheya sahu, woona weera owo oheereriwa mwa mikhalelo sootheene hiiho ntoko hiyo, menento nnaamweera vareene hiiho, owo khaanoono yoottheka.
16 Vano nrowe naattamele ehitxe* ya oreera murima otokweene ni yootthuna yooweera animorele ikharari ni anoonihere oreera wawe murima otokweene weera anikhavihere etempu yoophwanelela.
