Yaalepelinwaaya Aheberi 1:1-14
1 Khalayi Muluku aahuuluma ni makholo ahu mwa ikwaha sintxipale ni moota woovirikana moorweela mwa maprofeta.
2 Mene mwa mahiku ala oomalihera,* owo onuuluma ni hiyo moorweela mwa Mwanawe, yoowo omuthanliyaawe weera omuhiyere itthu sootheene ni moorweela mwa yoowo, opattunxaawe itthu.
3 Mwaana owo eruku ya ovuwa wa Muluku ni ethoonyero ya ekhaikhai ya omutthu awe, ni masu awe oowera owo onnathukumanya itthu sootheene, atteelihakaru soottheka sahu, owo ookilaathi veehitxeni* moono woolopwana wa Muluku wiirimu.
4 Hiiho, owo mutokweenexa opwaha malaika, oohiyeriwa nsina nooreeraxa opwaha nawaya awo.
5 Mwa ntakihero, nlaika heeni Muluku intalaawe weerela: “Nyuwo mwanaka; olelo kookhala Atiithi anyu”? Nave-tho neereke “Muluku ootoko weerela nlaika weera: “Miyo kinookhala atiitthi anyu ni nyuwo munookhala mwanaka”?
6 Mene, emaara aamurumihaawe Mwanawe oopatxera valaponi owo enre: “Malaika ootheene a Muluku emukokhorele.”*
7 Opwaha mwa yeeyo, uulumaka woohima sa malaika awe, owo onnahima weera: “Onneeriha malaika awe okhala ooweraxa, ni arumeyi awe ntoko malumi a mooro.”
8 Menento woohima sa Mwanawe, owo oneera: “Muluku tonoovahani owera woolamulela wa mahiku ootheene ni Omwene anyu onkela olamulelaka mwa exariya.
9 Woona weera nyuwo moosiveliwa exariya* ni mohiitta ele envirikanyiha nlamulo, tivawonto Muluku, Muluku anyu oothanliyaaweni oottikitthelakani makhura a ohakalala waapwaha asinthamwene anyu.”
10 Woopatxerani, nyuwo Apwiyaka mompaka alserse a elapo, ni erimu muteko wa matata anyu.
11 Itthu iya sinoohiya okhala, menento nyuwo munaakhale wa mahiku ootheene; iyo sinimuusaala* hiihaale ntoko ikuwo.
12 Nyuwo munoorowa okhunya* ntoko mukwansu, nave munoorowa otxentxa hiihaale ntoko sintxentxiwaaya ikuwo. Menento nyuwo khamuntxentxa ni iyaakha sa ekumi anyu khasiwa simala.”
13 Neereke nookhala nlaika Muluku intalaawe weerela: “Mukilaathi moono aka woolopwana mpaka miyo waavonyera vathi vamanaani anyu, amwiittani anyu”?
14 Malaika ootheene minepa ni arumeyi a Muluku, ni Muluku onnaaruma awo okela waakhavihera ale owo onkelaawe waavuluxa.
Footnotes
^ Eyo tiiyo, “emalihero ya itthu soonanara sa elapo.” Nwehe masu oowiiwanyeihiwa.
^ Naari: “vakaterani.”
^ Naari: “emuttittimihe.”
^ Nwehe masu oowiiwanyeihiwa.
^ Naari: “sinootusaala.”
^ Naari: “opintta.”
