Yaalepelinwaaya Aheberi 8:1-13
8 Etthu ninhimaahu ni nroromelo tiila: Hiyo nookhalano namakeya ahu mutokweene ntoko owo, yoowo okilanthi moono woolopwana wa ehitxe* ya Muluku wiirimu;
2 owo murumeyi onvara muteko nipuro nootteela na etenta yeekhaikhai,* yeeyo Yehova* opankaawe, ohiya etenta yoopakiwa* ni atthu.
3 Yoole ori namakeya mutokweene onthanliwa weera avaheke soovaha ni amakeya, menento wannatthuneya-tho weera namakeya ola mutokweene akhaleno etthu aakelaawe ovaha.
4 Owo aari elapo ela ya vathi, khaakela okhala namakeya, woona weera aakhala anamakeya enveleela soovaha moovarihana ni nlamulo.
5 Mene asilopwana awo, envara muteko wa Muluku ntoko ethoonyero ni muuttuuxi wa itthu sa wiirimu moovarihana ni ele Mose ooniherinwaawe ni Muluku emaara yeeyo aapakaawe etenta.* Owo enre: “Mwiikosoope weera mpake itthu sootheene moovarihana ni moota mooniherinwaanyu omwaako.”
6 Vano, Yesu ohaakhela muteko wootepa oreera, mwaha wooweera oowiiraaniha atthu nnivarihano nnyowani nenno nri nootepa oreera, nenno nikhalihinwe moovarihana ni soolaihera sooreera.
7 Waari weera nivarihano noopatxera naari noomalela, khawaakela otthuneya-tho nivarihano nanaaveeli.
8 Woona weera owo onnoona ohimalela wa atthu, onneera: “‘Nkawehani! Ninnawa nihiku naka’, ohimme Yehova,* ‘vaavo kinkelaaka opaka nivarihano nnyowani na empa ya Israeli ni empa ya Yuda.
9 Khaninkela okhala ntoko nivarihano kaapankaaka ni makholo anyu nihiku nenne kaakuminhaaka ni ntata naka elapo ya wExipitu. Mwaha wooweera awo khiyaavirelenle okhala munivarihanoni mwaka, tivawonto kaahiñyaaka waapwattha awo’, ohimme Yehova.”*
10 “‘Yaviraru mahiku ene yaawo’, miyo kinoopaka nivarihano nna ni empa ya ana a Israeli, ohimme Yehova.* ‘Miyo kinoohela malamulo aka mmuupuweloni mwaya ni kinoolepa vamurimani vaya. Ni miyo kinookhala Muluku aya, ni awo enkela okhala atthu aka.
11 “‘Khaavo mmoha a yaawo onkela omuxuttihaka munnawe naari mutthu a elapo awe, eeraka: “Mmusuwele Yehova!”* Mwaha wooweera ootheene awo enookisuwela, ovinyera anamwane mpaka asitokweene.
12 Menento, woohima sa soopaka sanyu soohixariya, miyo kinimoomorelani ikharari ni nkintthikela-tho wuupuwelela soottheka sanyu.’”
13 Vano, uulumaka woohima sa “nivarihano nnyowani” owo oomalamaliha nivarihano nakhalayi. Woona weera nivarihano nno nakhalayi khanaavareleya muteko ni etthu ehinvareleya muteko enweherera oriheya.
