Yaalepelinwaaya Aheberi 7:1-28
7 Melkisedeki ene yoola mwene a oSalemi ni namakeya a Muluku Mutokweene, aarowa okumana ni Abrahamu emaara yeeyo aatthikaawe owiiva mamwene ni aamureeliha,
2 ni Abrahamu anvaha yoovaha yanaamuloko. Nipatxeraka, nsina nawe nintaphulela “mwene a exariya.” Opwaha mwa yeeyo, owo mwene oSalemi, eyo tiiyo, “mwene a murettele”.
3 Oohikhalano apapawe ni oohikhalano ameyawe ni oohikhalano makholo awe, oohikhalano epatxerero naari emalihero ya ekumi awe. Oopakiwa ntoko mwaana a Muluku ni onamakeya awe onoovirelela okhala wa mahiku ootheene.
4 Nkawehani otokweene awe mulopwana ene yoola, yoowo Abrahamu nikholo nahu anvanhaawe yoovaha yanaamuloko ya itthu sooreera aaraaweno.
5 Ekhaikhai weera ale eri anamwane a Levi ennaakhela muritti wa onamakeya. Ni nlamulo ninhima weera awo yaakheleke soovaha sanaamuloko seiyo sinvahiwa ni atthu, eyo tiiyo, ni asinnaya, nnaamweera ereene osuulu wa Abrahamu.
6 Ni mulopwana ene yoola ahaakhanle a nloko nayasa, aahaakhela soovaha sanaamuloko sa Abrahamu ni aamureeliha mulopwama ole aamanelinwe natiri.
7 Ekhaikhai ti yooweera, ole onreeliha mutokweenexa ompwaha ole onreelihiwa.
8 Mene malevi yaahaakhela soovaha sanaamuloko ni awo ennakhwa, mene ookhala mutthu aakhenle soovaha sanaamuloko yoowo Soolepa simmuhelelaaya onamoona weera, ori mukumi.
9 Hiyo pooti ohima weera, moorweela mwa Abrahamu, mpaka Levi yoowo aakhenle yoovaha yanaamuloko ni olinve yoovaha yanaamuloko,
10 mwaha wooweera emaara yeeyo Abrahamu aakumannaawe ni Melkisedeki, Levi eera nlelo ahinaaye oyariwa.
11 Onamakeya wa nloko na Levi (weerela eparte Nlamulo na Mose yaavahinwaaya ana a israeli), vanonto, waari weera onamakeya wa Levi waari woomalela, neereke nammutthuna-tho namakeya mukina “ntoko Melkisedeki”, neereke khawaakwanenle okhalano “ntoko Arao paahi”?
12 Vano, emaara yeeyo ontxentxiwaaya onamakeya, onnatthuneya-tho otxentxiwa Nlamulo.
13 Woona weera mulopwana ene yoola onhimmwa okhumme nloko nikina, mene nloko nenno okhummaawe khaavo otonko okhala namakeya.
14 Ekhaikhai weera Apwiya ekhumme nloko na Yuda, mene Mose khanahime weera anamakeya yaakela okhumelela nloko nna.
15 Menento eyo enniiwanyeya nnene sene emaara yeeyo onkhumelelaawe namakeya mukina yoowo onlikana ni Melkisedeki,
16 yoowo okhanle namakeya, khaiyene mwaha moorweela mwa nloko, mene mwaha wa owera weiwo ommwaakhulela okhalano ekumi ehinkhwa.
17 Nto woohima sa yoowo onnaheleliwa onamona weeriwaka: “Nyuwo namakeya a mahiku ootheene ntoko Melkisedeki.”
18 Vano, Nlamulo nakhalayi noomala, mwaha wooweera naari nootteettheya ni khanaakhavihera etthu.
19 Woona weera Nlamulo khanaamalelinhe etthu, mene opatxeriha wa etthu yootepa oreera, yoopaka eyo ni mwaha wa yeeyo, hiyo ninnawera omwaattamela Muluku.
20 Mwaha wooweera Muluku aalipela emaara aamuthanlaawe Yesu ntoko namakeya.
21 (Ekhaikhai ti yooweera, aakhala alopwana ekhalihinwe anamakeya Muluku ahilipenle, menento mulopwana ola okhalihinwe namakeya moorweela mwa ele yaalipelinwe woohima sa yoowo. Aalipenle ole enre: “Yehova* oolipela, ni khantthikela ottuli: ‘Nyuwo namakeya a mahiku ootheene’”),
22 vano Yesu ookhala nivarihano nootepa oreera.
23 Opwaha mwa yeeyo, yannatthuneya-tho anamakeya akina weera yaarantteleke mwaha wooweera okhwa wannaakhoottihera ovirelela okhala anamakeya.
24 Okhala weera Yesu onoovirelela okhala wa mahiku ootheene, nto onamakeya awe khaavo onkela omuranttela.
25 Nave-tho owo onoowera waavuluxa moomalela atthu ale emmwaattamela Muluku moorweela mwa yoowo, ni owo onimwaavuluxa mwaha wooweera owo ori mukumi wa mahiku ootheene weera anvekeleke Muluku waakhavihera awosa.
26 Ti wootepa oreera okhalano namakeya mutokweene hiiha: oororomeleya, oohittheka, oohikhalano nlepa ni oomwalamwalihiwa ni anamattheka ni oowelihiwa wiirimu woopwahaxa.
27 Mene, moovirikana ni anamakeya atokweene, owo khantthuneya onvaha makeya mahiku ootheene, apatxeraka onvaha makeya a soottheka sawe ni makeya a soottheka sa atthu, woona weera owo opanke eyo ekwaha emoha wa mahiku ootheene, aveleelaka ekumi awe.
28 Woona weera Nlamulo nnaathanla anamakeya atokweene, atthu yaawo erino sootteettheya, mene natiri omaninwe nimalakaru Nlamulo noomuthanla Mwaana, yoowo okhalihinwe oomalela wa mahiku ootheene.
