Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa  |  Novema 2015

 UA TAUI TE BIBILIA I TO ’U ORARAA

E nehenehe ta ’u e tauturu i te taata i teie nei

E nehenehe ta ’u e tauturu i te taata i teie nei
  • MATAHITI FANAURAA: 1981

  • FENUA: GUATÉMALA

  • AAMU: ORARAA PEAPEA MAU I TO ’NA TAMARIIRAA

NA MUA ’‘E:

Ua fanauhia vau i Acul, hoê oire atea i te pae mou‘a tooa o te râ o Guatémala. Tei roto to ’u utuafare i te nunaa taata Ixil, e tupuna Maya to ratou. Taa ê atu i te reo Paniora, ua paari atoa vau ma te paraparau i to matou reo tumu. Ua fanauhia vau i te tau o te mau aroraa tivira ino mau tei tupu i na 36 matahiti i te maoro. E rave rahi taata Ixil tei pohe i tera mau matahiti.

E maha matahiti to ’u, ua tupu te tahi ati a hauti ai to ’u taeae hitu matahiti e te tahi ofai paaina i roto i to ’na rima. Ma te peapea, ua pohe to ’u taeae e ua matapohia vau. I muri a‘e, ua haere au i te tahi pu no te mau tamarii matapo i te oire Guatémala e reira vau i te haapiiraa i te taio i te papai no te mau matapo. Aita vau i ite no te aha, ua opanihia vau ia paraparau i te tahi atu mau tamarii e ua ape noa mai to ’u mau hoa haapiiraa. O vau ana‘e i te mau taime atoa, e hinaaro noa vau ia tae oioi mai na ava‘e e piti i roto i te matahiti no te haere i to ’u metua vahine î i te here e te mǎrû. Ua pohe râ o ’na i te ahururaa o to ’u matahiti. Ua hepohepo roa vau, o ’na ana‘e hoi te taata o tei here ia ’u.

E ahuru ma hoê matahiti to ’u i te ho‘iraa i to matou oire tumu e ua noho i te fare o te hoê o to ’u mau taeae, e ere râ hoê â mama to mâua. Ua horoa mai o ’na e to ’na utuafare i ta ’u e hinaaro i te pae tino, ua hepohepo noa râ vau. I te tahi taime, e ta‘i au ma te ani i te Atua: “No te aha to ’u mama i pohe ai? No te aha vau i riro ai ei matapo?” Ua parau mai te taata na te Atua i faatupu i tera mau ati. Faaoti atura vau, mea ino te Atua e te tia ore. Te mea noa i tapea mai ia ore ia haapohe ia ’u, te ravea ïa no te rave i te reira.

Mea ohie no te hoê taata matapo ia moemoe e ia hepohepo. Ua maferahia vau e rave rahi taime i to ’u tamariiraa. Aita roa vau i faaite i te reira, no ’u, aita hoê a‘e e tâu‘a mai. Mea varavara te taata i te paraparau mai e aita atoa vau i tutava i te aparau atu. E moemoe e e hepohepo vau e eita atoa e tiaturi i te hoê noa ’‘e taata.

UA TAUI TE BIBILIA I TO ’U ORARAA:

I te 13raa o to ’u matahiti, ua haere mai e piti Ite no Iehova (tane e vahine faaipoipo) e paraparau ia ’u i te taime faafaaearaa i te fare haapiiraa. Na te tahi orometua i ite i to ’u tupuraa i ani ia raua ia farerei ia ’u. Ua  faaite mai raua i te parau fafau Bibilia e tia faahou mai te feia i pohe e e ite faahou te matapo. (Isaia 35:5; Ioane 5:28, 29) Ua au roa vau i ta raua i haapii mai, mea fifi roa râ no ’u ia faaite i to ’u mana‘o, aita hoi au i matau i te paraparau i te taata. Noa ’tu râ tera huru to ’u, ua faaite noa raua i te mǎrû e te faaoromai a haere mai ai e haapii ia ’u i te Bibilia. E haere raua na raro i nia 10 kilometera e muri iho, na roto atu hoê mou‘a, no te tapae i to matou oire.

Ua faataa mai to ’u taeae mea faanehenehe maitai raua, e ere râ i te mea tao‘a. Ua faaite noa mai râ raua i te here ma te afai mai i te tao‘a horoa na ’u. No ’u, o te mau Kerisetiano mau ana‘e te rave i tera mau haapaeraa.

Ua haapii au i te Bibilia maoti te mau papai no te mau matapo. Noa ’tu ua taa maitai ia ’u tei haapiihia mai, te vai ra te tahi mau mea e ere i te mea ohie ia farii. Mea fifi roa no ’u ia tiaturi te tâu‘a mau ra te Atua e te tahi atu mau taata ia ’u. Ua taa vau no te aha te Atua e vaiiho ai ia tupu te ino, mea fifi râ ia faariro ia ’na ei Metua î i te here. *

Ua tauturu mǎrû noa mai ta ’u i haapii i roto i te Bibilia ia taui i to ’u feruriraa. Ei hi‘oraa, ua haapii au te oto atoa ra te Atua ia mauiui te taata. Ua parau te Atua no ta ’na mau tavini i hamani-ino-hia: ‘Ua hi‘o papu vau i te ati o to ’u ra mau taata . . . e ua ite au i to ratou oto.’ (Exodo 3:7) I to ’u haafaufaaraa i te mau huru maitatai o Iehova, ua hinaaro vau e pûpû ia ’na i to ’u ora. I 1998, ua bapetizohia vau ei Ite no Iehova.

Na muri i te taeae Kerisetiano tei farii ia ’u i roto i to ’na utuafare

Hoê matahiti i muri a‘e, ua apiti au i te hoê piha haapii no te matapo piri atu i te oire Escuintla. Ua ite te tahi matahiapo o te amuiraa i te mau fifi ta ’u e farerei ra no te haere i te mau putuputuraa mai to ’u oire. Mai ta tera na hoa faaipoipo i rave no te haere mai e faatere i ta ’u haapiiraa, e tia ia haere na roto atu te mau mou‘a no te putuputu e te amuiraa piri roa ’‘e. E ere roa ’tu i te mea ohie no ’u. Ua imi te matahiapo i te tahi utuafare i Escuintla o te nehenehe e farii ia ’u i to ratou fare ia tae au i te mau putuputuraa. Te aupuru ra ratou ia ’u mai te hoê melo o to ratou utuafare tae roa mai i teie mahana.

E rave rahi atu â faaiteraa o te here ta te mau melo o te amuiraa i rave. Ua haapapu mai ta ratou mau ohipa atoa, ua tahoê au i te mau Kerisetiano mau, te mau Ite no Iehova.—Ioane 13:34, 35.

TO ’U FAUFAARAAHIA:

I teie nei, aita vau e haafaufaa ore faahou ra ia ’u e e tiaturiraa to ’u. Mea oaoa mau te oraraa i teie mahana. Ei taata poro ma te taime taatoa i roto i te ohipa haapiiraa a te mau Ite no Iehova, mea faufaa a‘e no ’u ia tauturu i te taata ia ite i te pue parau mau Bibilia i to ’u tupuraa. E fana‘oraa taa ê atoa ta ’u ia tavini ei matahiapo o te amuiraa e ia horoa i te mau oreroraa parau no te taata atoa i roto i te mau amuiraa o to ’u fenua. E haamaitairaa atoa ia rave i te mau oreroraa parau Bibilia i te mau tairururaa e toru mahana o te haaputuputu tausani taata.

Oreroraa parau ma te faaohipa i te Bibilia neneihia no te matapo

I 2010, ua apiti au i te Haapiiraa faaineineraa no te taviniraa (parauhia i teie mahana, Haapiiraa no te feia poro i te parau apî oaoa o te Basileia) tei tupu i Salvador. Ua faaineine mai te reira ia amo maitai atu â i ta ’u mau hopoia i roto i te amuiraa. Ua haapapu atoa mai mea faufaa mau vau e mea herehia atoa e te Atua ra o Iehova o te nehenehe e faaineine i te mau taata atoa no te rave i ta ’na ohipa.

Ua parau Iesu: “E mea maitai i te horoa ’tu i te rave mai.” (Ohipa 20:35) I teie mahana, e nehenehe mau vau e parau, te oaoa nei au. Aita vau i mana‘o a‘e e nehenehe ta ’u e tauturu i te taata hoê mahana.

^ par. 13 No te ite atu â no te aha te Atua e vaiiho ai i te ino ia tupu, a hi‘o i te pene 11 o te buka Eaha ta te Bibilia e haapii mau ra? piahia e te mau Ite no Iehova.