Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA No 5 2016

 UA TAUI TE BIBILIA I TO ’U ORARAA

E taata ino e taputô vau na mua ’‘e

E taata ino e taputô vau na mua ’‘e
  • MATAHITI FANAURAA: 1974

  • FENUA: MEHIKO

  • AAMU: MEA INO I TE TAUREAREARAA, TAATA TAPUTÔ I ROTO I TE MAU AROÂ

NA MUA ’‘E:

Ua fanauhia vau i Ciudad Mante, te tahi tuhaa fenua nehenehe i Tamaulipas i Mehiko. Mea tauturu te feia no ǒ ia vetahi ê e mea maitai atoa. Mea peapea râ ia parau, mea atâta roa ia haere na tera mau vahi no te rahi o te mau ohipa iino.

E maha matou tamaroa, o vau te piti. Ua faaoti to ’u na metua ia bapetizohia vau i roto i te haapaoraa Katolika e ua riro vau ei mero no te pǔpǔ himene a te paroita i muri a‘e. Ua hinaaro vau e rave i te mea maitai no to ’u riaria ia haavahia vau e te Atua e ia haamauiuihia e a muri noa ’tu i roto i te po auahi.

I te paeraa o to ’u matahiti, ua faarue mai papa i te fare. Auê au i te oto e te mauiui! Aita vau i taa no te aha o ’na i vaiiho mai ai ia matou, mea here roa hoi na matou ia ’na. Ua titauhia ia rave to ’u mama i te ohipa e rave rahi hora no te faatamaa ia matou e maha.

Mea pinepine aita mama i te fare, ua amuimui ïa vau i te mau tamarii paari a‘e e aita vau e tia na i te fare haapiiraa. Na ratou i haapii mai i te parau ino, te puhipuhi i te avaava, te eiâ e te taputô ma te faaohipa noa i te rima. Mea au roa na ’u e haavî ia vetahi ê, ua haapii atoa ïa i te moto, te aro, te taputô, oia atoa i te na reira ma te faaohipa i te tahi mau tao‘a. Riro ihora vau ei taurearea ino mau. Pinepine au i te itehia i roto i te mau aroraa e te pupuhi. Ehia a‘enei taime, ua î roa vau i te toto e te pae hopea, ua faarue-roa-hia i roto i te aroâ fatata i te pohe! Auê au i te tatarahapa i te mea ua oto to ’u mama i te iteraa ia ’u mai tera e ua rave oioi ia ’u no te afai i te fare ma‘i!

Ua haere mai Jorge, te tahi hoa hoê â matou i te paariraa, i te fare. I tera taime, 16 matahiti to ’u e ua parau mai oia e Ite no Iehova o ’na i teie nei e e poroi faufaa ta ’na e hinaaro e faaite mai. Ua haamata ’tura i te faataa i ta ’na mau tiaturiraa ma te faaohipa i te Bibilia. A tahi ra vau a taio ai i te Parau a te Atua, e ua anaanatae roa vau i te ite i te i‘oa o te Atua e ta ’na mau opuaraa! Ua farii matou i ta Jorge aniraa ia haapii i te Bibilia.

UA TAUI TE BIBILIA I TO ’U ORARAA:

Ua oaoa roa ino vau i te ite mea hape te haapiiraa no nia i te po auahi, e ere hoi tera ta  te Bibilia e parau ra! (Salamo 146:4; Koheleta 9:5) Ua faaea ’tura vau i te riaria i te Atua e ua haamata i te hi‘o ia ’na mai te hoê Metua î i te here o te hinaaro i te maitai o ta ’na mau tamarii.

A haere noa ’i ta ’u haapiiraa Bibilia i mua, ua taa ia ’u e tia ia taui i to ’u huru: Ia faaite i te haehaa e ia faaea i te taputô. Ua tauturu mai te a‘oraa i roto i te Korinetia 1, 15:33 ia ’u. Te faataa ra hoi, e ino te peu maitai i te amuiraa iino. Taa a‘era ia ’u, e tia ia faaea vau i te amuimui i te feia o te turai mai ia rave i te mea ino. Ua na reira vau e riro atura te mau Kerisetiano mau o te amuiraa ei hoa papu no ’u. E feia hoi tera o te faaafaro i te peapea, eiaha ma te tupai, ma te haapao râ i te mau aratairaa Bibilia!

Te tahi atu mau irava tei haaputapû ia ’u, o te Roma 12:17-19. Te na ô ra hoi: “Eiaha roa te ino e tahoohia i te ino i te taata atoa nei. . . . Peneia‘e o te tia ra, e parahi hau noa outou i roto i te taata atoa nei. . . . Eiaha outou e tahoo . . . ua papaihia hoi e, Te parau maira Iehova, Ei ia ’u te riri, na ’u ïa e tahoo.” Ua farii au, e faaafaro iho â o Iehova i te mau ohipa tia ore i te taime ta ’na i faaoti e na roto i te ravea ta ’na i maiti. Ore mǎrû noa ’tura tera huru ino to ’u.

Haamana‘o noa ra vau i tei tupu i te tahi po a hoi ai i te fare. Ua haere mai te tahi mau taurearea, e enemi no te pǔpǔ tahito ta ’u i apiti na, e taparahi ia ’u. Ua tupai to ratou aratai i to ’u tua e ua tuô: “Haere, a taputô!” I tera taime, ua faaoti au i te hoê pure poto noa ia Iehova, ua ani ia ’na ia tauturu mai ia faaoromai i ta ratou mau raveraa i nia ia ’u. Ua horo vau noa ’tu e hinaaro rahi to ’u e tahoo! I te mahana i muri iho, ua farerei au i te aratai o tera pǔpǔ. Ho‘i mai nei te riri e te hinaaro e tahoo i roto ia ’u, ua taparu faahou râ vau ia Iehova ia tauturu mai ia haavî i to ’u huru. Ua maere roa vau, i te haereraa mai tera taurearea i mua maitai ia ’u e ua parau: “Farii mai na te tatarahapa no inapo ra. Hinaaro vau e riro mai ia oe, haapii mai na te Bibilia ia ’u.” Auê au i te oaoa i te haavîraa ia ’u! Haamata a‘era vau i te faatere i ta ’na haapiiraa Bibilia.

Aita râ te toea o to ’u utuafare i tamau i te haapii i te Bibilia. Ua faaoti papu râ vau eiaha e faarue i te reira e eiaha atoa e vaiiho i te tahi noa ’‘e taata aore ra ohipa ia tapea ia ’u. Ua ite au eita vau e mo‘emo‘e ia tahoê noa vau e te nunaa o te Atua e o ratou to ’u utuafare. Ua tamau vau i te haere i mua e bapetizohia ’tura vau ei Ite no Iehova i 1991.

UA FAUFAAHIA VAU:

E taata ino, haavî e taputô vau na mua ’‘e. Ua taui roa râ te Parau a te Atua i to ’u oraraa. I teie mahana, te faaite nei au i te poroi hau a te Bibilia i te taata atoa e farii. Ua haamaitaihia vau i te tavini ei taata poro ma te taime taatoa i na 23 matahiti mairi.

Ua riro atoa vau ei rima tauturu i te amaa a te mau Ite no Iehova i Mehiko. I reira to ’u farereiraa ia Claudia, e Kerisetiano itoito mau, e ua faaipoipo mâua i 1999. Auê au i te mauruuru ia Iehova i te haamaitairaa mai ia ’u ma te horoa mai i te hoê hoa faaipoipo taiva ore!

Ua tavini mâua i roto i te tahi amuiraa reo apǎraa rima Mehiko no te tauturu i te feia turi ia ite o vai o Iehova. I muri a‘e, ua anihia ia haere mâua i Belize no te haapii i te Bibilia i te feia o tera fenua. E ere to mâua oraraa i te mea fana‘o mai na mua ’‘e, te oaoa nei râ mâua! Eita roa hoi e hinaaro e taui noa ’‘e i te tahi mea!

Ua rave faahou to ’u mama i ta ’na haapiiraa Bibilia e ua bapetizohia i teie nei. E Ite no Iehova atoa to ’u tuaana, ta ’na vahine e tamarii. Te tavini atoa nei vetahi o to ’u mau hoa tahito ta ’u i poro ia Iehova i teie mahana.

Ma te peapea, ua pohe vetahi mero o to ’u utuafare no te mea aita ratou i faaea i te rave i te mau ohipa iino. Ahiri vau i tamau i nia i tera e‘a, ua pohe atoa vau. Auê au i te mauruuru ia Iehova, ua farii o ’na ia haafatata vau ia ’na e ia farerei au i ta ’na mau tavini! Ua tauturu mai hoi ratou ia haapao i te mau aratairaa Bibilia ma te faaoromai e te mǎrû.

No te ite atu â

Ta te Bibilia e parau ra no nia i te haavîraa u‘ana

Eaha to te Atua mana‘o i te haavîraa u‘ana? E nehenehe anei te taata e au i te haavîraa u‘ana e taui?