Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa  |  No 3 2017

Mea au roa na ’u e amuimui e te feia apî o te amuiraa

 UA TAUI TE BIBILIA I TO ’U ORARAA

Aita ’tu ohipa faufaa a‘e no ’u maori râ ta ’u tuaro!

Aita ’tu ohipa faufaa a‘e no ’u maori râ ta ’u tuaro!
  • MATAHITI FANAURAA: 1928

  • FENUA: COSTA RICA

  • AAMU: HAAPAO NOA I TA ’NA TUARO E E TAATA PERE MONI

NA MUA ’‘E

Ua paari au na te oire Puerto Limón i te pae hitia o te râ o Costa Rica. E va‘u tamarii matou, o vau te hitu. E va‘u matahiti to ’u i te poheraa papa, na mama noa ïa i rave ia matou.

Mai to ’u tamariiraa mai, ta ’u tuaro * te mea faufaa roa ’‘e no ’u. I to ’u taurearearaa, ua hauti au i roto i te hoê pǔpǔ no te faaanaanatae noa. I te 20raa o to ’u matahiti, ua ani mai te tahi taata faaineine ia maiti i te reira ei toroa no ’u ma te faaô ia ’u i roto i te hoê pǔpǔ i Nicaragua. I te mea râ e ma‘i to mama e na ’u e haapao na ia ’na, aita vau i hinaaro e haere e ora i Nicaragua. Aita vau i farii tera aniraa. I muri a‘e, ua titau manihini mai te tahi atu taata faaineine ia haere i te tatauraa e ia hauti i roto i te pǔpǔ rahi o Costa Rica. Ua maitihia mai te mau maona mai roto mai i te mau pǔpǔ nainai. I tera râ taime, ua farii au. Ua hauti i roto i te pǔpǔ rahi o to ’u fenua mai 1949 tae atu i 1952. Ua hauti atoa vau i roto i te mau tatauraa i Cuba, Mehiko e i Nicaragua. O vau hoê o te mau taata haru popo e mea aravihi roa vau! E nehenehe au e hauti 17 taime, hoê hautiraa i muri iho i te tahi atu ma te ore e hape noa ’‘e. Mea au roa na ’u e faaroo i te nahoa ia tuô i to ’u i‘oa!

Na mua ’‘e, e oraraa haapaoraa ore atoa to ’u. Noa ’tu e hoa a‘ena to ’u, ua tamau noa vau i te haere na muri i te tahi atu mau vahine. Mea inu roa atoa vau. I te hoê mahana, ua ara mai au e aita i ite mea nafea vau i te ho‘iraa i te fare! Ia noaa mai ta ’u moni, e apiti atoa na vau i te tahi hautiraa parauhia domino e te pere moni.

I roto i tera area taime, ua riro mai to ’u mama ei Ite no Iehova. Ua hinaaro oia ia anaanatae au i ta ’na haapaoraa apî, aita râ i tae atura i te mana‘o, tei nia noa to ’u feruriraa i ta ’u tuaro. Mai te peu e rave au i ta ’u faaineineraa i te hora tamaaraa, eita vau e ite i te poia. Tera noa to roto i to ’u feruriraa,  ta ’u tuaro, tirara ’tu ai. Aita ’tu ohipa faufaa a‘e no ’u maori râ ta ’u tuaro!

I te 29raa o to ’u matahiti, ua pepe roa ino vau i te tamataraa i te haru i te popo. I muri a‘e i te reira, aita vau i nehenehe faahou e hauti. Aita râ vau i faarue roa i te reira. Ua riro vau ei taata faaineine no te tahi pǔpǔ hauti piri i to ’u fare.

UA TAUI TE BIBILIA I TO ’U ORARAA

I 1957, ua farii au i te titau-manihini-raa ia haere i te tahi tairururaa a te mau Ite no Iehova tei tupu i te hoê tahua tuaro ua hauti a‘ena vau i reira. A parahi ai, ua tapao vau i te taa-ê-raa i roto i te haerea faatura o te mau Ite e te huru haapaoraa ore o te mau taata ia haere mai no te mau hautiraa tuaro. Ua putapû roa vau no ta ’u i ite i te tairururaa. Ua haamata ’tura vau i te haapii i te Bibilia e te mau Ite no Iehova e te haere i ta ratou mau putuputuraa.

E rave rahi haapiiraa i roto i te Bibilia ta ’u i faahiahia mau. Te tahi hi‘oraa, ua tohu Iesu e poro ta ’na mau pǐpǐ i te parau apî oaoa o te Faatereraa arii na te ao nei i te mau mahana hopea. (Mataio 24:14) Ua haapii atoa vau eita te mau Kerisetiano mau e aufauhia no ta ratou ohipa pororaa. Ua parau Iesu: “Mea horoa-noa-hia mai ta outou, a horoa noa atoa ïa.”—Mataio 10:8.

A haapii noa ’i, ua hi‘opoa vau i ta te Bibilia e parau ra e ta to ’u mata e ite ra i rotopu i te mau Ite no Iehova. Ua faahiahia vau i to ratou itoito rahi no te poro i te parau apî o te Faatereraa arii a te Atua na te ao nei. Ua ite au ia ratou ia faaite i te feruriraa horoa noa mai ta Iesu i faaue i te mau Kerisetiano. No reira i to ’u taioraa i te Mareko 10:21 e ua titau manihini Iesu ia pee ia ’na, faaoti atura vau i te riro ei Ite no Iehova.

Aita râ vau i taui oioi, ua titauhia te taime. E rave rahi matahiti, i maiti noa na vau i te mau hebedoma atoa i ta ’u mau numera no te hauti i te pere tapao. Ua haapii râ vau i roto i te Bibilia eita te Atua e au i te taata o te haamori ia “Gada [te atua o te Manuïa],” oia atoa i te feia nounou moni. (Isaia 65:11; Kolosa 3:5) Faaoti atura vau i te faaea i te pere moni. Te Tapati mau i muri iho, o ta ’u mau numera tei matara mai! Ua faaooo mai te taata no te mea aita vau i hauti i tera hebedoma, e ua mârô atoa mai ia hauti faahou. Aita vau i farii e aita atoa i ho‘i faahou e rave i tera peu.

E faahemaraa ta ’u i ite i te mahana i bapetizohia ’i au ei Ite no Iehova. I to ’u ho‘iraa i te hotera i tera po, te tia noa ra te tahi vahine i mua i te opani o to ’u piha. O to ’u ïa hoa matamua. Ua na ô mai oia: “Haere mai Sammy, e taoto tâua!” Oioi noa vau i te pahono atu, aita. Ua haamana‘o atu vau ia ’na e te pee ra vau i teie nei i te mau faaueraa tumu a te Bibilia. (Korinetia 1, 6:18) Na ô mai nei: “Eaha?” I muri iho, ua haafaufaa ore oia i ta te Bibilia e parau ra no nia i te peu taotoraa tia ore. Ua onoono atoa mai ia ho‘i faahou mâua. Ua tamatahia to ’u “huru taata apî” i tera mahana. (Ephesia 4:24) Tera râ, ua tomo noa ’tu vau i roto i to ’u piha e ua ponao i te opani. I teie mahana, te oaoa nei au i te parau e mai to ’u riroraa mai ei Ite i 1958, ua tapea vau i to ’u haapao maitai e aita roa i ho‘i faahou i to ’u oraraa tahito.

TO ’U FAUFAARAAHIA

Ua hinaaro vau e papai i te hoê buka no te tapao i te mau maitai ta ’u i fana‘o i te pee i te aratairaa a te Bibilia! Te tahi haamaitairaa ta ’u i ite, mea rahi to ’u hoa papu e ta ’u mau fa i roto i te oraraa e te ite nei au i te oaoa mau.

Te au noa ra vau i te tuaro ta ’u i hauti na, e ere râ tera te mea faufaa roa ’‘e no ’u i teie nei. I riro na vau ei taata tuiroo e e moni rahi ta ’u i noaa mai, no te hoê taime poto noa râ te reira. Area to ’u auhoaraa e te Atua e to ’u fetii taeae, e vai ïa e a muri noa ’tu. Te na ô ra te Bibilia: “Fatata atoa teie nei ao i te mou e ta to te ao atoa e hinaaro ra. Area te taata e rave i te hinaaro o te Atua, e vai noa mai ïa e a muri noa ’tu.” (Ioane 1, 2:17) I teie nei, o to ’u here i te Atua ra o Iehova e i te taata te mea faufaa roa ’‘e no ’u!

^ par. 9 I hauti na Samuel i te tahi tuaro parauhia baseball. E piti pǔpǔ te hauti e e iva taata i roto i te pǔpǔ taitahi. E taora hoê no roto mai i te tahi pǔpǔ i te popo e e tamata hoê i roto i te tahi atu pǔpǔ i te tairi i te popo e te hoê raau taa maitai no tera tuaro.

No te ite atu â

PARAU APÎ OAOA A TE ATUA

Eaha te maitai o te mau ture a te Atua?

Ua faataa Iesu no te aha e hinaarohia ’i te aratairaa e eaha na faaueraa Bibilia faufaa roa.