Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA No 4 2016

 UA TAUI TE BIBILIA I TO ’U ORARAA

Ehia taime to ’u hi‘araa hou a manuïa ’i!

Ehia taime to ’u hi‘araa hou a manuïa ’i!
  • MATAHITI FANAURAA: 1953

  • FENUA: AUTERALIA

  • AAMU: MATAU I TE MATAITAI I TE HOHO‘A FAUFAU

NA MUA ’‘E:

Ua faarue to ’u metua tane i te fenua Heremani i 1949 no te haere i Auteralia. Ua imi oia i te ohipa i roto i te mau taiete heruraa e hamaniraa ito. I te mataeinaa Victoria to ’u papa i te nohoraa e te faaipoiporaa i to ’u mama e fanauhia ’tura vau i 1953.

Tau matahiti i muri a‘e, ua haamata to ’u mama i te haapii i te Bibilia e te mau Ite no Iehova. E nehenehe e parau, ua paari au e te mau haapiiraa a te Bibilia. Mea au ore roa râ na to ’u papa i te mau haapaoraa atoa. Ua riro mai oia ei taata ino, haavî e ua riaria roa to ’u mama ia ’na. Ua tamau râ o ’na i te haapii i te Bibilia ma te huna e au atura o ’na i ta ’na i haapii. Aita ana‘e papa i te fare, e faaite mai mama i ta ’na i haapii, ia ’u e to ’u tuahine. Ua faataa mai o ’na e riro te fenua ei paradaiso a muri a‘e e e ite mâua i te oaoa ma te haapao i te mau ture aveia a te Bibilia.—Salamo 37:10, 29; Isaia 48:17.

I te 18raa o to ’u matahiti, ua faarue au i te fare no to papa huru ino. Noa ’tu ua tiaturi au no roto mai te Bibilia ta Mama i haapii mai, aita vau i haafaufaa i te reira. Aita atoa ïa i haapao i roto i to ’u oraraa. Ua haamata vau i te ohipa i te tahi vahi heruraa arahu ei rave ohipa i roto i te uira. I te 20raa o to ’u matahiti, ua faaipoipo e toru matahiti i muri a‘e fanau maira ta mâua hoê tamahine. I tera taime, ua feruri au i to ’u oraraa. Ua ite e oaoa to ’u utuafare maoti te mau aratairaa Bibilia, haamata ’tura vau i te haapii e te hoê Ite no Iehova. Mea riri roa râ na ta ’u vahine i te mau Ite. I to ’u haereraa i te taime matamua i ta ratou putuputuraa, ua titau mai oia ia maiti, te haapiiraa Bibilia aore ra to ’u utuafare. No to ’u paruparu, farii atura i te faaea i te amuimui e te mau Ite no Iehova. I muri a‘e râ, ua tatarahapa roa vau i te ore e haapao i ta ’u i ite mea tia.

I te tahi mahana, ua turai mai to ’u mau hoa ohipa ia mataitai i te hoho‘a faufau. Noa ’tu mea hairiiri, ua hinaaro noa to ’u mata e hi‘o i te reira! I te hopearaa, ua faahapa noa vau ia ’u. Ma te haamana‘o i ta te Bibilia e haapii ra, ua papu ia ’u e faautua mai te Atua. Ua tamau râ vau i te mataitai i te mau hoho‘a hairiiri e taui atura to ’u mana‘o no nia i te mau hoho‘a faufau. Eita ’tura ta ’u e nehenehe faahou e faaea i tera peu.

 I te roaraa o na 20 matahiti i muri a‘e, ua atea ê roa ’tu â vau i te mau ture aveia ta mama i haapii mai. Ua faaite to ’u haerea eaha ta ’u i tuu i roto i to ’u feruriraa. Mea faufau ta ’u huru paraparau e mea arearea roa na ’u te mau faatiaraa faufau. Ua hape roa to ’u mana‘o no nia i te mau peu taotoraa. Mea faaipoipohia vau, aita râ i taiâ i te taoto i tahi atu mau vahine. I te hoê mahana, tei mua vau i te hi‘o e aita roa vau i au i te taata ta ’u e ite ra. Aita vau i faatura faahou ia ’u iho, ua riro mai râ ei taata hairiiri mau!

Ua taa vau i ta ’u vahine e ua ino roa to ’u oraraa. I muri a‘e, ua pure au ia Iehova ma to ’u aau atoa. Ua rave faahou atura vau i ta ’u haapiiraa Bibilia noa ’tu 20 matahiti tei mairi. I muri a‘e, ua pohe to ’u papa e tia ’tura i to ’u mama ia bapetizohia ei Ite no Iehova.

UA TAUI TE BIBILIA I TO ’U ORARAA:

Mea taa ê roa to ’u oraraa i te mau ture aveia teitei a te Bibilia. I tera râ taime, ua faaoti papu vau i te imi i te hau o te feruriraa ta te Bibilia e fafau ra. Ua haapae au i te mau parau faufau e ua haavî i to ’u huru. Ua faaea atoa vau i te mau peu taotoraa faufau, te pere moni, te inu hua i te ava e te eiâ i to ’u paoti ohipa.

Aita to ’u mau hoa ohipa i taa no te aha vau i hinaaro ai e taui roa. E toru matahiti te maoro, ua tamau ratou i te turai mai ia ho‘i i tera mau peu iino. Ia hema vau maa taime ma te riri aore ra ma te parau ino, oaoa roa ratou i te na ô mai: “Era, ua ho‘i mai te huru tahito o Josef!” Auê te mauiui tera mau parau! E pinepine au i te faahapa ia ’u.

I te vahi raveraa ohipa, ua rahi roa te hoho‘a faufau, mea ê to roto i te matini roro uira, mea ê te mea neneihia. E hapono tamau te mau hoa ohipa i te reira maoti te matini roro uira mai ta ratou i rave i nia ia ’u na mua ’‘e. Te tutava ra vau i te faaea i tera peu, area ratou ua tamata noa ïa i te turai mai ia hara. Ua imi au i te tauturu e te faaitoitoraa i te taata o tei faatere i ta ’u haapiiraa Bibilia. Ia haamahora vau i to ’u aau, e faaroo mai oia ma te faaoromai. Ma te faaohipa i te mau irava Bibilia taa maitai, ua faaite mai oia e nafea ia mau papu e ua faaitoito atoa mai ia imi tamau i te tauturu a Iehova na roto i te pure.—Salamo 119:37.

I te hoê mahana, ua ani au i te mau hoa ohipa ia putuputu. I te taeraa mai te taatoaraa, ua ani atu vau ia horoa i te hoê pia i na taata e piti o tei faaite e taero ava raua. Tuô paatoa ihora ratou: “Eiaha! E hoa a‘era, te tamata ra hoi raua i te faaea!” Pahono ihora vau: “O vau atoa!” Mai tera mahana mai â, ua ite ratou te tutava ra vau i te faaea i te mataitai i te hoho‘a faufau e aita ’tura i turai faahou mai ia ho‘i i to ’u huru tahito.

I muri a‘e e maoti te tauturu rahi a Iehova, ua tia ia ’u ia faaea roa i te mataitai i te hoho‘a faufau. I 1999, ua bapetizohia vau ei Ite no Iehova. Auê au i te mauruuru i te faaoromai rahi o te Atua, tia ’tura ia ’u ia taui e ia fana‘o i te hoê oraraa tura e te oaoa!

I teie nei, ua taa ia ’u no te aha mea au ore na Iehova te mau mea ta ’u i rave ehia matahiti. Ei Metua î i te here, ua hinaaro o ’na e paruru ia ’u i te peapea rahi ta te hoho‘a faufau e faatupu. Mea tano roa te mau mana‘o o te Maseli 3:5, 6! Te na ô ra hoi: “E tiaturi ia Iehova ma to aau atoa ra; eiaha râ e tiaturi i to oe ihora haapao. Eiaha e haamoe ia ’na i to oe atoa ra mau haerea; e na ’na e faaite ia oe i to oe ra mau haerea.” E ere noa te mau ture aveia Bibilia i te parururaa, e ravea atoa râ no te ite i te oaoa mau.—Salamo 1:1-3.

TO ’U FAUFAARAAHIA:

Na mua ’‘e, ua au ore roa vau ia ’u. I teie nei râ, te faatura ra vau ia ’u e ua faaea i te faahapa noa. E oraraa tura to ’u e te ite nei au ua faaore o Iehova i ta ’u mau hara e te turu atoa mai ra oia. I 2000, ua faaipoipo vau ia Karolin, te tahi vahine Kerisetiano nehenehe mau o te here ra ia Iehova mai ia ’u. E oraraa hau to mâua i te fare. Auê mâua i te mauruuru i te riro ei mero o te hoê utuafare Kerisetiano tura e te î i te here na te ao atoa nei.

No te ite atu â

Eaha te ravehia i te hoê haapiiraa Bibilia?

E pûpû te Ite no Iehova na te ao nei i te hoê porotarama haapiiraa Bibilia tamoni ore. A hi‘o i te tereraa o te reira.

Eaha te maitai o te mau ture a te Atua?

Ua faataa Iesu no te aha e hinaarohia ’i te aratairaa e eaha na faaueraa Bibilia faufaa roa.

E nehenehe e patoi i te faahemaraa!

Toru mana‘o e faaitoito ia oe.