Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa  |  Novema 2015

 TUMU PARAU MATAMUA | O VAI TE MAU ITE NO IEHOVA?

Mai te aha te huru o te mau Ite no Iehova?

Mai te aha te huru o te mau Ite no Iehova?

Eita matou e amui i te tahi atu mau pǔpǔ faaroo e e faanahonahoraa nunaa rau matou. Noa ’tu tei Marite ta matou pu rahi, te ora ra te rahiraa o te mau Ite no Iehova i te tahi atu mau fenua. Ua hau atu vau mirioni matou e haapii ra i te Bibilia i te taata i roto 230 tiahapa fenua. Te haapao nei ïa matou i ta Iesu i parau: ‘E parau-haere-hia te evanelia o te Basileia nei e ati noa ’‘e teie nei ao, ia ite te mau fenua atoa.’—Mataio 24:14.

Noa ’tu eaha te fenua, e auraro maite matou i te ture. Eita râ e amui i te mau ohipa poritita. E na reira matou no te haapao i ta Iesu aratairaa no te mau Kerisetiano: “E ere outou i to teie nei ao.” Eita ïa matou e turu i te mau ohipa poritita aore ra te tama‘i. (Ioane 15:19; 17:16) No reira i te Piti o te tama‘i rahi, ua tapeahia, hamani-ino-hia e haapohehia te mau Ite no Iehova no to ratou tiaraa amui ore. Ua papai te tahi epikopo tahito no Heremani: “Ua tano mau ratou i te parau o ratou te feia tiaraa amui ore rahi roa ’‘e i raro a‘e i te faatereraa Nazi a Adolf Hitler.”

“E puai faahiahia [to te mau Ite no Iehova]. E nehenehe e maiti i teie mau taata o tei ineine i te haapae ia ratou no te amo i te mau tiaraa teitei i roto i te faatereraa, eita râ ratou e farii. . . . E auraro ratou i te mau faatereraa, e tiaturi atoa râ o te Basileia ana‘e o te Atua te nehenehe e faaore i te mau fifi atoa o te taata.”—Vea Nová Svoboda, Repupirita Tchèque

Eita râ matou e faataa ê ia matou i te huiraatira. Ua pure Iesu i te Atua no ta ’na mau pǐpǐ ma te na ô: “Aore au i pure ia oe e ia hopoi ê atu oe ia ratou i teie nei ao.” (Ioane 17:15) E ite ïa oe ia matou ia rave i te ohipa, ia hoohoo e ia haere i te haapiiraa.