Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa  |  No 5 2017

Na muri i ta ’u vahine o Tabitha i roto i te ohipa pororaa

 UA TAUI TE BIBILIA I TO ’U ORARAA

I tiaturi na vau aita e Atua

I tiaturi na vau aita e Atua
  • MATAHITI FANAURAA: 1974

  • FENUA: TUHAA FENUA HITIA O TE RÂ O HEREMANI

  • AAMU: TAATA I TIATURI NA AITA E ATUA

NA MUA ’‘E

Ua fanauhia vau i tei piihia na mua ’‘e te tuhaa fenua hitia o te râ o Heremani, i roto i te tahi oire iti o Saxe te i‘oa. Mea oaoa roa to matou oraraa i te fare e mea here matou i te tahi e te tahi. Ua haapii mai to ’u na metua i te mau peu maitatai. Tei raro a‘e te tuhaa fenua hitia o te râ o Heremani i te faatereraa Communiste. No te rahiraa o te feia no Saxe, mea faufaa ore te haapaoraa. O vau iho, i tiaturi na vau aita e Atua. I to ’u apîraa, ua haafaufaa vau i ta ’u i tiaturi na e te faatereraa Communiste.

I haafaufaa na vau i te Communiste no ta ratou poritita e mea faito te mau taata atoa. Hau atu â, no ’u mea tano ia operehia te mau faufaa ma te tia. Eita ïa e ite-faahou-hia te taa-ê-raa i rotopu i te feia tao‘a rahi e te feia veve. Ua haa rahi au i roto i te tahi pupu Communiste no te feia apî. I te 14raa o to ’u matahiti, ua ohipa rahi au no te tahi opuaraa ia faaohipa faahou i te mau papie faaruehia no te paruru i te natura. Ua mauruuru roa te mau tia faatere o te oire Aue no ta ’u mau tutavaraa e ua faariro ia ’u ei tino huiraatira taa ê no te oire. Noa ’tu to ’u apî, ua matau a‘ena vau i te tahi mau tia poritita o te tuhaa fenua hitia o te râ o Heremani. No ’u, ua rave au i te e‘a maitai e e ananahi faahiahia te tiai mai ra.

Ua taui taue noa râ i muri a‘e. I 1989, ua topa te patu o Berlin, na reira atoa pauroa te mau pupu Communiste na te pae hitia o te râ o Europa. Aita i maoro i muri iho, ite atura vau e ere no teie nei te ohipa tia ore na te tuhaa fenua hitia o te râ o Heremani. I faarirohia na hoi te feia o te ore e turu i te faatereraa Communiste ei feia haihai i rotopu i te huiraatira. Na ô a‘era vau, ‘Eaha ïa, aita anei te Communiste i turu i te mana‘o e mea faito te mau taata atoa? E haavare ana‘e paha ïa ta te Communiste?’ Ua painu roa vau!

Ua taui ïa vau i ta ’u mau fa e ua haere atura to ’u feruriraa i nia i te upaupa e te peniraa hoho‘a. Ua haapii au i te hauti i te upaupa i roto i te tahi pu taa ê no te haere i muri a‘e i te haapiiraa teitei. I hinaaro na hoi au e rave i te toroa hauti upaupa. Taa ê atu i te reira, aita vau i haapao faahou i te mau peu maitatai tei haapiihia mai i te tamariiraa. I roto atura i to ’u feruriraa, na mua te faaanaanataeraa e te faahoaraa e rave rahi tamahine i te hoê â taime. Ua haapao vau i to ’u hinaaro, ua hauti i te upaupa e ua peni i te hoho‘a, aita râ to ’u taiâ no to tatou  ananahi i iti mai. Ua taa-roa-hia te reira na roto i te mau hoho‘a ta ’u i peni. Ua uiui noa vau, ‘Eaha to tatou a muri a‘e? Eaha te tumu i hamanihia ’i te taata?’

I to ’u iteraa i te pahonoraa o tera mau uiraa, ua maere roa vau. I te tahi po, ua paraparau vau e te tahi atu mau piahi o te pu no nia i te ananahi o te taata. Te vai ra hoê i rotopu ia ratou, e Ite no Iehova, o Mandy * to ’na i‘oa. Ua faaite mai tera tamahine e nafea ia ite i te e‘a maitai. Ua na ô mai oia: “Andreas, ia hinaaro oe e ite i te mau pahonoraa i ta oe mau uiraa no nia i te oraraa e te tupu a muri a‘e, a hi‘o i roto i te Bibilia.”

Aita vau i tiaturi oioi ia ’na, i tera râ mahana ua faaoti au i te hi‘o roa i te mau pahonoraa i roto i te Bibilia. Ua faaitoito mai Mandy ia hi‘o i te pene 2 o te buka Daniela, ua maere roa vau i ta ’u i taio. Ua faahiti tera parau tohu e rave rahi faatereraa puai o te taui roa i te tupuraa o te ao e tae roa mai i teie mahana. Ua faaite atoa mai Mandy i te tahi atu mau parau tohu Bibilia o te faataa ra eaha te tupu i mua ia tatou. Itehia ’tura ia ’u te pahonoraa i ta ’u mau uiraa! Tera râ, mea ê atu â ïa uiraa tei hiti mai, ‘Na vai i papai i tera mau parau tohu? O vai te nehenehe e faaite ma te tia i te tupu ananahi? Te vai ra iho â anei te hoê Atua?’

UA TAUI TE BIBILIA I TO ’U ORARAA

Ua faanaho Mandy ia farerei au ia Horst e ta ’na vahine o Angelika. E Ite no Iehova na hoa faaipoipo e na raua i tauturu mai ia taa maitai atu â i te Bibilia. Ua tapao oioi au o te mau Ite no Iehova ana‘e te haapaoraa o te faahiti pinepine e te faaite i te i‘oa o te Atua. (Salamo 83:18; Mataio 6:9) Ua haapii au e horoa o Iehova i te taata i te tiaturiraa e ora e a muri noa ’tu i nia i te fenua o te faarirohia ei paradaiso. Te na ô ra te Salamo 37:9: “Te feia . . . i tiaturi ia Iehova ra, no ratou ïa te fenua.” Ua oaoa roa vau i te ite e nehenehe te taata atoa e fana‘o i tera tiaturiraa. Ta te Atua noa e ani ra, ia faaau tatou i to tatou haerea i ta ’na mau faaueraa faaitehia i roto i te Bibilia.

E ere roa ’tu râ i te mea ohie ia taui e ia ora mai ta te Bibilia e haapii ra. I te noaaraa ia ’u te toroa hauti upaupa, ua riro vau ei taata faaoru. Ua titauhia ïa ia haapii i te faaite i te haehaa. E ere atoa i te mea ohie ia faarue i ta ’u mau peu haapaoraa ore. Auê au i te mauruuru ia Iehova no to ’na faaoromai e to ’na aroha! Ua taa atoa hoi ia ’na i te huru o te feia e faaitoito ra i te haapao i ta te Bibilia e haapii ra.

Ua haa rahi te Communiste e te tiaturiraa e aita e Atua i nia i to ’u feruriraa e to ’u huru i te apîraa ra. Ua taui roa râ to ’u oraraa i te Bibilia. Aita vau e taiâ faahou no to tatou a muri a‘e, tei nia vau i te e‘a maitai e e oraraa oaoa to ’u. I 1993, ua bapetizohia vau ei Ite no Iehova e i 2000, ua faaipoipohia mâua Tabitha, e Ite no Iehova itoito atoa o ’na. E taime rahi ta mâua e faataa nei no te tauturu i te taata ia taa i te Bibilia. E farerei mâua e rave rahi taata hoê â tupuraa e to ’u na mua ’‘e, o te turu i te Communiste e te tiaturi atoa aita e Atua. Ua oaoa roa vau i te faaite ia ratou o vai o Iehova.

TO ’U FAUFAARAAHIA

I te haamataraa vau i te amuimui e te mau Ite no Iehova, ua riri roa to ’u na metua. Ua ite râ raua ua faufaahia vau i te faahoaraa ia ratou. I teie nei, e oaoa iti rahi to ’u i te faaite atu, te taio nei raua i te Bibilia e te apiti atoa ra i te mau putuputuraa a te mau Ite no Iehova.

E oraraa oaoa to mâua Tabitha no te mea te tutava ra mâua i te haapao maite i te mau a‘oraa Bibilia no te feia faaipoipo. Te tahi hi‘oraa, te horoa ra te Bibilia i te a‘oraa eiaha na hoa faaipoipo ia taiva i te tahi e te tahi. Ma te haapao maite i te reira, ua piri roa ’tu â mâua Tabitha.—Hebera 13:4.

Aita vau e riaria e e taiâ faahou nei no to tatou ananahi. E mero vau no te hoê utuafare fetii taeae na te ao nei o te fana‘o ra i te hau e te auhoêraa. Aita e taa-ê-raa i rotopu ia matou, hoê â faito te mau taata atoa. Tera te tahi mea ta ’u i tiai noa na e e hinaaro vau ia vai noa mai tera e tae roa ’tu i te hopea.

^ par. 12 Ua tauihia te i‘oa.