Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA NOVEMA 2015

E nehenehe mau anei e ite o vai te Atua?

E nehenehe mau anei e ite o vai te Atua?

“Eita e nehenehe e ite o vai te Atua.”—Philon no Alesanederia, philosopho o te senekele matamua.

‘Aita te Atua i atea ê atu ia tatou atoa nei.’—Ta Saulo no Tareso i parau i te mau philosopho o te senekele matamua i Ateno.

TEIHEA parau i nia ’tu e tano ra i to oe mana‘o? E rave rahi tei farii e mau parau tamahanahana e maitai mau ta Saulo no Tareso, pii-atoa-hia te aposetolo Paulo. (Ohipa 17:26, 27) Te vai ra ’tu â te mau irava Bibilia o te haapapu ra i ta ’na i parau. Ei hi‘oraa, ua faahiti Iesu i roto i te tahi pure e nehenehe ta ’na mau pǐpǐ e ite o vai te Atua e e fana‘o i ta ’na haamaitairaa.—Ioane 17:3.

Mea taa ê râ te mana‘o o te mau philosopho mai ia Philon. Te na ô ra ratou eita roa e nehenehe e ite o vai te Atua no te mea eita e taahia to ’na huru. Tera iho â anei?

Te faaite tia roa ra te Bibilia te vai ra te tahi mau mea no nia i te Atua mea fifi no te taata ia taa. Ei hi‘oraa, eita e nehenehe e faito, e taio e e taa i te rahiraa matahiti o te Atua poiete, te faahiahia o to ’na ite e te rahi o to ’na paari. Ua hau ê hoi te reira i ta te taata e nehenehe e taa. E ere râ te reira i te fifi no te ite o vai te Atua. Ma te feruriruri i tera mau mea, e nehenehe tatou e “haafatata ’tu i te  Atua.” (Iakobo 4:8) E hi‘o ana‘e te tahi mau mea no nia i te Atua taa-ore-hia e te taata. I muri iho, e hi‘opoahia ta tatou e nehenehe e taa no nia ia ’Na.

Ta te taata e ore e taa no nia i te Atua

MEA MURE ORE TE ATUA: Te haapii ra te Bibilia i vai na te Atua “mai tahito mai â e a muri noa ’tu!” (Salamo 90:2) Te auraa, aita to ’Na e haamataraa e aita e hopearaa. Eita te taata e nehenehe e taa i “te rahiraa o to ’na matahiti.”—Ioba 36:26, Te Bibilia Mo’a V.C.J.S. (1976)

E faufaahia oe: Te fafau ra te Atua i te ora mure ore ia ite oe o vai mau o ’na. (Ioane 17:3) Mea papu anei tera parau fafau ahiri e ere o ’na i te Atua mure ore? O “te Arii hau mure ore” ana‘e te nehenehe e faatupu i tera parau fafau.—Timoteo 1, 1:17.

TE ITE O TE ATUA: Te haapii ra te Bibilia e “ore e noaa ’tu ia titau” i te ite o te Atua. Mea hau ê hoi to ’na mau mana‘o i to tatou. (Isaia 40:28; 55:9) Ua taa noa ïa ia tatou te pahonoraa o teie uiraa a te Bibilia: “O vai hoi tei ite i te manao o te Fatu ra, ia haapii atu oia iana?”—Korinetia 1, 2:16, V.C.J.S.

E faufaahia oe: E nehenehe te Atua e faaroo i te mau mirioni taata o te pure i te hoê â taime. (Salamo 65:2) E ite atoa oia i te mau manu atoa o te topa i nia i te repo. E rohirohi anei te feruriraa o te Atua a ore atu ai o ’na e tâu‘a ia oe e e faaroo i ta oe mau pure? Eita, aita hoi to ’na e otia. Hau atu â, no ’na, ‘e maitai rahi hoi to oe i to te manu e ia rahi noa ’tu.’—Mataio 10:29, 31.

TA TE ATUA MAU OHIPA: Te haapii ra te Bibilia eita te taata e nehenehe e “ite i te ohipa a te Atua mai te matamua mai e tae noa ’tu i te hopea.” (Koheleta 3:11) Eita atoa tatou e ite i te mau mea atoa no nia ia ’Na. Mea “itea ore ia imi” atoa te paari o te mau ohipa a te Atua. (Roma 11:33) E oaoa râ oia i te faaite i te reira i te feia e rave i to ’na hinaaro.—Amosa 3:7.

Eita e nehenehe e faito, e taio e e taa i te rahiraa matahiti o te Atua poiete, te faahiahia o to ’na ite e te rahi o to ’na paari

E faufaahia oe: Ia taio e ia hi‘opoa oe i te Bibilia, eita oe e faaea i te haapii no nia i te Atua e ta ’na mau ohipa. E nehenehe ïa e haafatata noa ’tu â i to tatou Metua i te ra‘i e a muri noa ’tu.

Ta oe e nehenehe e taa no nia i te Atua

E nehenehe tatou e ite o vai te Atua noa ’tu te vai ra te tahi mau mea ta tatou e ore e taa roa no nia ia ’na. Mea rahi ta te Bibilia e faaite ra o te tauturu mai ia ite maitai a‘e o vai te Atua. E hi‘o ana‘e te tahi hi‘oraa:

TE I‘OA O TE ATUA: Te haapii ra te Bibilia na te Atua iho i maiti i to ’na i‘oa. Ua parau o ’na: “O vau o Iehova, o to ’u ïa i‘oa.” Aita ’tu i‘oa faahiti-roa ’‘e-hia i roto i te Bibilia maori râ to te Atua. E itehia hoi te reira 7 000 taime.—Isaia 42:8.

E faufaahia oe: Ua na ô Iesu i roto i te pure tei riro ei hi‘oraa no tatou: “E to matou Metua i te ao ra, ia raa [aore ra mo‘a] to oe i‘oa.” (Mataio 6:9) E nehenehe anei oe e faaohipa i te i‘oa o te Atua a pure ai? E faaora o Iehova i te feia atoa o te faahiti i to ’na i‘oa ma te tura.—Roma 10:13.

TE NOHORAA O TE ATUA: Te haapii ra te Bibilia e piti nohoraa e vai nei. Te ra‘i e to tatou fenua apitihia e te ao nui. (Ioane 8:23; Korinetia 1, 15:44) E pinepine, e faahitihia i roto i te Bibilia te parau “ra‘i” no te faataa i te vahi e ora ’i te mau melahi. Tei “nia i te ra‘i” te “parahiraa mau” o te Atua poiete.—Te mau arii 1, 8:43.

 E faufaahia oe: E ere ïa te Atua mai te hoê puai e vai ra i te mau vahi atoa e roto i te mau tao‘a. E nohoraa papu to Iehova. No reira, “aore roa hoi e mea i moe ia ’na.”—Hebera 4:13.

TE HURU O TE ATUA: Te haapii ra te Bibilia e mau huru maitatai to Iehova. “E aroha hoi te Atua.” (Ioane 1, 4:8) Eita roa e haavare. (Tito 1:2) Mea paetahi ore, aroha noa, hamani maitai rahi e te faaoromai rahi oia. (Exodo 34:6; Ohipa 10:34) E maere paha e rave rahi i te ite, e hinaaro te Atua e riro ei hoa piri no te feia e faatura ia ’na.—Salamo 25:14.

E faufaahia oe: E nehenehe oe e riro ei hoa no Iehova. (Iakobo 2:23) E taa maitai a‘e oe i te mau aamu Bibilia ia ite oe i te huru o Iehova.

“IA IMI OE IA ’NA”

Aita te Bibilia e huna ra te tahi mea no nia i te Atua ra o Iehova. Mea hape ia parau eita e nehenehe e taa i to ’Na huru. Te hinaaro ra hoi te Atua poiete ia ite oe o vai o ’na. Te fafau ra ta ’na Parau, te Bibilia: “Ia imi oe ia ’na ra, e itea ’tu oia e oe.” (Paraleipomeno 1, 28:9) No te aha e ore ai e haapii no nia i te Atua ma te taio e feruriruri i te mau aamu Bibilia! Ma te na reira, e haafatata mai te Atua ia oe mai ta te mau Papai mo‘a e fafau ra.—Iakobo 4:8.

Ia taio e ia haapii oe i te Bibilia, eita oe e faaea i te haapii no nia i te Atua e ta ’na mau ohipa

E na ô paha oe, ‘Eita vau e nehenehe e riro ei hoa no te Atua poiete i te mea aita vau i ite i te mau mea atoa no nia ia ’Na!’ A feruri na râ. E titauhia anei i te tahi taata ia rave i te hoê â toroa e to te taote tâpû no te riro ei hoa rahi no ’na? Eita roa! Noa ’tu mea taa ê roa ta raua ohipa, e nehenehe toopiti e riro ei hoa piri. Te mea faufaa, ua ite oia i te huru o te taote, ta ’na e au e ta ’na e ore e au. Maoti te Bibilia, e nehenehe atoa oe e haapii i te titauhia ia ite no nia ia Iehova no te riro ei hoa no ’Na.

Te faaite maitai ra te Bibilia i te mau mea atoa e hinaarohia no te ite o vai te Atua. E hinaaro anei oe e haapii atu â no nia i te Atua ra o Iehova? Te pûpû ra te mau Ite no Iehova i te haapiiraa Bibilia tamoni ore. Te faaitoito ra matou ia oe ia farerei i te mau Ite o to oe vahi aore ra ia hi‘o i nia i ta matou reni www.jw.org/ty.