Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA (HAAPIIRAA) TITEMA 2013

Ua pohe anei to apiti?

Ua pohe anei to apiti?

TE PARAU maitai ra te Bibilia: “E aroha” te tane faaipoipo i ta ’na vahine mai ia ’na iho. Ia “auraro” atoa te hoê vahine i ta ’na tane e tia ’i. Ia rave raua i ta raua tuhaa “ei hoê.” (Eph. 5:33; Gen. 2:23, 24) A mairi ai te tau, e puai roa ’tu â te taairaa o na hoa faaipoipo oaoa e e here roa ’tu â raua te tahi i te tahi. E nehenehe te reira e faaauhia i te mau a‘a o na tumu raau e tupu apipiti.

Eaha râ ia pohe hoê o raua? E mutu tera taairaa puai mau. E pinepine, e mauiui e e moemoe te apiti e ora noa ra. E riri atoa paha aore ra e faahapa ia ’na iho. I na 58 matahiti faaipoiporaa, ua ite Miriama i te taata e rave rahi ia oto i to ratou hoa faaipoipo tei pohe. * A pohe ai râ ta ’na tane, ua parau oia: “Aita roa ’tu vau i taa i tera huru tupuraa i na mua ’‘e. E taa noa ia oe a faaruru ai oe i te reira.”

MAUIUI E AU RA E E ORE E HOPE

Ia au i te tahi feia maimi, aita e hepohepo rahi a‘e i te poheraa o te hoê hoa faaipoipo here. Te mana‘o iho â o te apiti e rave rahi. I muri a‘e e 25 matahiti faaipoiporaa, ua pohe ta Mira tane. E rave rahi matahiti tei mairi, te faataa nei râ o ’na i to ’na huru aau ma te parau: “E au ra e ua tatarahia te tahi mero o to ’u tino.”

A ite ai i te mau vahine ivi e oto ra i ta ratou tane tau matahiti, i mana‘o noa na Tina e ua rahi roa tera oto. Pohe atura ta ’na tane i muri a‘e e 38 matahiti faaipoiporaa. Noa ’tu e ua hau  atu i te 20 matahiti tei mairi, te parau nei â oia, “Te mana‘o nei au ia ’na i te mau mahana atoa.” Pinepine Tina i te ta‘i no to ’na mihi rahi i ta ’na tane.

Te haapapu ra te Bibilia e mea mauiui mau ia pohe te hoê hoa faaipoipo e eita te reira e ore oioi. A pohe ai Sara, ‘ua haere Aberahama i te otohaa ia Sara e oto ia ’na.’ (Gen. 23:1, 2) Noa ’tu to ’na tiaturi i te tia-faahou-raa, ua mauiui mau Aberahama a pohe ai ta ’na vahine here. (Heb. 11:17-19) Aita i moehia ia Iakoba ta ’na vahine here ra o Rahela tei pohe. Ua faahiti oia ia ’na ma te here i ta ’na mau tamaiti.—Gen. 44:27; 48:7.

Eaha te haapii mai i teie na hi‘oraa Bibilia? E pinepine te mau tane e vahine ivi i te mauiui e rave rahi matahiti. E haamana‘o ana‘e e e ta‘i e e oto ratou no te hoê moeraa rahi, eiaha no te mea mea paruparu ratou. E faaite ana‘e i te aumihi e e turu noa ana‘e ia ratou.

HOÊ MAHANA I MURI I TE TAHI

E ere i te mea ohie ia pohe te hoê hoa faaipoipo. I muri a‘e e rave rahi matahiti faaipoiporaa, ua ite te tane e nafea ia tamahanahana i ta ’na vahine e ia faaitoito ia ’na a hepohepo aore ra a toaruaru ai. Aita faahou ana‘e ta ’na tane, aita faahou atoa te here e te tamahanahanaraa ta te vahine i fana‘o noa na. Oia atoa, a mairi ai te tau, ua ite te vahine eaha te rave ia vai hau e ia oaoa ta ’na tane. E tapea o ’na ia ’na ma te mǎrû, e faahiti i te mau parau tamǎrû e e haapao i ta ’na e anaanatae e e hinaaro mau ra. Aita e faaauraa to te reira. Ia pohe ta ’na vahine, e moemoe roa paha te tane. No reira vetahi mau hoa faaipoipo ua pohe to ratou apiti e hi‘o ai i te ananahi ma te papu ore e te mǎta‘u. Eaha te aratairaa Bibilia te nehenehe e tauturu ia ratou ia ite i te hau?

E tauturu te Atua ia oe i te mahana taitahi ia faaoromai i te poheraa o to apiti

“Eiaha e tapitapi i to ananahi ra, na ananahi hoi e tapitapi i ta ’na iho. O te mahana o to ’na iho ino atire ïa.” (Mat. 6:34) Tei nia na mua ta Iesu mau parau i te mau hinaaro materia. Ua tauturu râ te reira i te taata e rave rahi ia faaruru i te pohe o te hoê taata herehia. Tau ava‘e i muri a‘e i te poheraa o ta ’na vahine, ua papai te hoê tane ivi o Tamui te i‘oa: “Te mihi rahi noa nei â vau ia Monia. E i te tahi taime, e au ra e mea ino roa ’tu â. Ua taa râ ia ’u e mai tera iho â, e iti mai te mauiui a mairi ai te tau.”

Oia mau, ua faaoromai o Tamui. Mea nafea? Ua parau oia, “Maoti ta Iehova tauturu, ua faaruru vau hoê mahana i muri i te tahi.” Aita Tamui i oto rahi roa ino. Aita to ’na mauiui i ore i te hoê noa po e aita te reira i haaparuparu ia ’na. Ua pohe anei to oe apiti? A tutava i te faaruru i te reira hoê mahana i muri i te tahi. Aita oe i ite eaha te maitai aore ra te faaitoitoraa ta oe e fana‘o ananahi.

A haamana‘o e na te pohe tutuuhia e Adamu  i faataa ê ia orua. Aita Iehova i opua ia pohe te taata. E tuhaa râ te reira o “te ohipa a te diabolo.” (Ioa. 1, 3:8; Roma 6:23) Te faaohipa ra Satani i te pohe e te mǎta‘u i te pohe no te faatîtî i te taata e ia ore ratou e fana‘o i te tiaturiraa. (Heb. 2:14, 15) Te oaoa nei Satani aita ana‘e te taata e tiaturi faahou ra e ite i te oaoa e te mauruuru mau, i roto atoa i te ao apî a te Atua. Te mauiui rahi nei ïa oe no te hara a Adamu e no te mau ravea paari a Satani. (Roma 5:12) E faaore roa Iehova i te ino ta Satani i rave ma te faaore roa i te pohe. Ua tiamâ mai e rave rahi vahine e tane ivi i te mǎta‘u ta Satani e faaohipa noa ra. O oe atoa paha.

Mea rahi te mea e taui i roto i te mau taairaa e te taata a faaho‘ihia mai ai te feia pohe i te ora i nia i te fenua. A feruri na i te mau metua, papa e mama ruau aore ra tupuna o te faaho‘ihia mai i te ora e o te naea mǎrû i te tia-roa-raa e ta ratou mau tamarii e mootua. E faaorehia te mau faahopearaa o te matahiti rahi. E mea tia anei ia taui te mau u‘i apî i to ratou mana‘o i to ratou mau tupuna? No tatou, eita anei tera mau tauiraa e haamaitai i te taairaa o te huitaata?

Mea rahi te uiraa e hiti mai no nia i te feia e faatia-faahou-hia, no nia atoa i te feia ua pohe e piti tane aore ra hau atu. Ua tuu te mau Sadukea i te hoê uiraa no nia i te hoê vahine tei faaipoipo e hitu taime no te mea ua pohe te  tane taitahi. (Luka 20:27-33) Eaha te tupu ia faaho‘ihia mai ratou i te ora? Aita tatou i ite. Eiaha ïa e feruri rahi roa i nia iho e e haapeapea roa ino. Ia tiaturi tatou i te Atua e tia ’i. Te mea papu, mea maitai te mau mea atoa ta Iehova e rave. Eiaha tatou e mǎta‘u atu, e tiaturi ana‘e râ.

E TAMAHANAHANA TE TIATURIRAA O TE TIA-FAAHOU-RAA

Te hoê haapiiraa maramarama roa ’‘e o te Bibilia, o te tiaturiraa ïa o te tia-faahou-raa. Te haapapu ra te mau faatiaraa Bibilia no nia i te mau tia-faahou-raa i tahito ra e ‘e faaroo te feia atoa i roto i te apoo i to Iesu reo e e haere mai i rapae.’ (Ioa. 5:28, 29) E oaoa te taata i te ite i tei tiamâ mai i te pohe. I te tahi a‘e pae, eita e nehenehe e feruri i te oaoa o te feia e faaho‘ihia mai i te ora.

Auê te huitaata i te oaoa a faaho‘ihia mai ai e miria taata pohe i te ora! (Mar. 5:39-42; Apo. 20:13) E tamahanahana te feruri-maite-raa i teie semeio i te feia atoa ua pohe to ratou feia herehia.

E tumu maitai anei no te oto ia tupu te tia-faahou-raa? Te pahono ra te Bibilia, aita. Ia au i te Isaia 25:8, “e haamou roa [Iehova] i te pohe e a muri noa ’tu.” Oia atoa ïa te mau faahopearaa ino mau o te pohe. Te na ô faahou ra hoi tera parau tohu: “Na te Fatu ra, na Iehova, e horoi i te roimata i te mau mata atoa.” Mai te peu e te oto nei oe no te mea ua pohe to apiti, e tauturu te tiaturiraa o te tia-faahou-raa ia oe ia oaoa.

Aita e taata e taa roa ra i ta te Atua e rave i roto i te ao apî. Te na ô ra Iehova: “Mai te ra‘i nei hoi e teitei rahi to ’na i to te fenua; oia atoa to ’u ra haerea, e teitei ïa i to outou haerea, e to ’u ra mau mana‘o i to outou ra mau mana‘o.” (Isa. 55:9) E tauturu mai te parau fafau a Iesu no nia i te tia-faahou-raa i mua mai ia tiaturi ia Iehova, mai ia Aberahama. Mea faufaa roa ia rave te Kerisetiano taitahi i teie mahana i ta te  Atua e titau maira. ‘E au ïa ia tatou taua ao a muri nei’ e te feia o te faatia-faahou-hia mai.—Luka 20:35.

TE HOÊ TUMU NO TE TIATURI

A tamau i te tiaturi. No te taata, mea peapea te a muri a‘e. Te horoa maira râ Iehova i te tiaturiraa o te tahi mea maitai a‘e. Eita tatou e nehenehe e ite e nafea mau Iehova e haamâha ’i i to tatou mau hinaaro. E tiaturi papu ana‘e râ e e na reira iho â o ’na. Ua papai te aposetolo Paulo: “O te tiairaa hi‘ohia ra, e ere ïa i te tiai; o ta te taata hoi i ite ra, eaha oia e tia ’i ia tiai atu i te reira? I tiai râ tatou i tei ore i itea e tatou, te mana‘o nei hoi tatou i te reira ma te fatimauu ore.” (Roma 8:24, 25) E tauturu te tiaturi-papu-raa i ta te Atua i fafau ia faaoromai. Maoti te faaoromai, e ora oe i te tau e ‘horoa ’i Iehova i ta to aau e hinaaro ra.’ ‘E haamâha oia i te hiaai o te mau mea ora atoa nei.’—Sal. 37:4; 145:16; Luka 21:19.

A tiaturi i ta Iehova i fafau no nia i te hoê a muri a‘e oaoa mau

Hou noa ’‘e te poheraa o Iesu, ua haapeapea ta ’na mau aposetolo. Ua tamahanahana Iesu ia ratou ma teie mau parau: “Eiaha e horuhoru to outou aau, e faaroo i te Atua, e e faaroo atoa mai hoi ia ’u.” Ua na ô atu oia: “Eita vau e vaiiho otare noa ia outou, e ho‘i mai â vau ia outou nei.” (Ioa. 14:1-4, 18, 27) E tauturu ta ’na mau parau i ta ’na mau pǐpǐ faatavaihia i te roaraa o te tau ia tiaturi e ia faaoromai. Mai te peu e te tiai ru nei oe i te ite faahou i to oe feia herehia tei pohe, a tamau i te tiaturi. Ia papu ia oe e eita roa ’tu Iehova e ta ’na Tamaiti e vaiiho ia oe ia oto noa!

^ par. 3 Ua tauihia te mau i‘oa.

No te ite atu â

Aita e mea e tia “ia faataa ê ia tatou i te aroha o te Atua”

Eiaha roa ’tu e tiaturi i te haavare e aita oe e herehia ra aore ra mea faufaa ore oe no te Atua.