1. I te tahi taime, eaha te manaˈo e nehenehe e hiti mai i roto i te feruriraa o te hoê tavini a Iehova?

 TE FARII ra te tahi pae te here ra te Atua i te huitaata mai ta te Ioane 3:16 e parau ra. Teie nei râ, te manaˈo atoa ra ratou aita te Atua e here ra i te taata tataitahi. E nehenehe atoa te tavini a Iehova e manaˈo mai tera i te tahi taime. No to ˈna toaruaru, ua parau te hoê taata: “Mea fifi roa no ˈu ia tiaturi te tâuˈa mai ra te Atua ia ˈu.” Ua manaˈo aˈenei oe mai tera i te tahi taime?

2, 3. O vai te hinaaro ra ia manaˈo tatou aita Iehova e here e e haafaufaa ra ia tatou, eaha râ te titauhia ia haamanaˈo?

² Te hinaaro roa ra Satani ia tiaturi tatou aita Iehova e here e e haafaufaa ra ia tatou. Pinepine Satani i te turai i te taata ia faatupu i te huru feruriraa tano ore. (Korinetia 2, 11:3) E manaˈo vetahi o ratou te mea hau aˈe. Area no te tahi atu, mea faufaa ore ïa ratou. (Ioane 7:47-49; 8:13, 44) O ta tatou ïa e ite rahi nei i teie “mau mahana hopea” e te ino mau. E rave rahi o te paari nei i roto i te mau utuafare “e au ore te taata te tahi i te tahi.” Hau atu â, ua haaatihia ratou e te feia o te haapao noa ia ratou iho, te feia iria e te farii ore i te aˈoraa. (Timoteo 2, 3:1-5) Ua ora vetahi i roto i tera tupuraa e rave rahi matahiti te maoro, no reira ratou e manaˈo ai e ere ratou i te mea faufaa e eita te hoê e nehenehe e here ia ratou.

³ I te tahi taime, e rave rahi o tatou o te faahapa rahi roa ra ia tatou iho. A haamanaˈo râ ua horoa mai Iehova i ta ˈna Parau no te “faatitiaifaro” e no te “huri i raro i te mau mea e au i te pare.” (Timoteo 2, 3:16, nota; Korinetia 2, 10:4) Te  na ô ra te Bibilia: “E tiaturi tatou i roto i to tatou aau e mea here na te Atua ia tatou. Ia faahapa noa mai hoi to tatou aau ia tatou, e haamanaˈo anaˈe e mea rahi aˈe te Atua i to tatou aau e ua ite o ˈna i te mau mea atoa.” (Ioane 1, 3:19, 20) E hiˈopoa anaˈe e maha haapiiraa i roto i te Bibilia o te tauturu mai ia “tiaturi . . . i roto i to tatou aau” te here ra Iehova ia tatou tataitahi.

Mea faufaa oe no Iehova

4, 5. E nafea te faahohoˈaraa a Iesu no nia i te manu rii e haapapu ai mea faufaa tatou no Iehova?

⁴ A tahi roa, te haapii ra te Bibilia mea faufaa te tavini tataitahi a Iehova. Ua parau Iesu: “E piti manu rii te hoohia i te hoê noa moni huˈa haihai roa, e ere anei? Ia mairi noa ˈtu râ hoê o ratou i raro, e ite iho â to outou Metua i te reira. Area outou, ua taio-pauroa-hia te rouru o to outou upoo. Eiaha ïa e mǎtaˈu. Mea faufaa aˈe outou i te manu rii e rave rahi.” (Mataio 10:29-31) E hiˈo anaˈe eaha ta te feia i faaroo ia Iesu i taa.

⁵ Te manu ta Iesu i faahiti, o te manu mâmâ roa ˈˈe ïa i to ˈna tau. I te hoê noa moni huˈa haihai roa, e piti manu rii te roaa mai. I te tahi atu taime, ua parau Iesu e roaa mai e pae manu rii no e piti moni huˈa haihai roa. E tahinuhia hoi te pae o te manu. E nehenehe e manaˈohia mea faufaa ore tera manu, area no te Atua poiete, e ere roa ˈtu ïa! No reira Iesu i parau ai: “Aita râ hoê noa ˈˈe i moˈe i te Atua.” (Luka 12:6, 7) I teie nei, te taa ra paha ia tatou te manaˈo o Iesu. Mai te peu no Iehova mea faufaa te hoê manu rii, eaha ˈtu â ïa te taata! Mai ta Iesu i faataa, ua ite Iehova i te mau mea atoa no nia ia tatou. Inaha, ua taio-pauroa-hia te rouru o to tatou upoo!

6. Parau mau anei e nehenehe Iehova e taio te rouru o to tatou upoo?

⁶ Mea fifi paha no vetahi ia farii i tera manaˈo. E haapiiraa faufaa râ ta Iesu e horoa mai ra no nia i te Atua! Noa ˈtu tau  100 000 rouru to nia i to tatou upoo, mea ohie roa no Iehova ia taio i te reira! E tia ia ˈna ia haamanaˈo i te mau mea atoa no nia ia tatou, mea nafea tatou i te hamaniraahia, te mau taime oaoa o to tatou oraraa e tae noa ˈtu te mau mea atoa ta tatou i faaruru. a E ere ïa i te mea maere ia parau te Bibilia e mana to Iehova no te faatia mai i te taata mai te pohe mai!

Eaha te mea faufaa no Iehova?

7, 8. (1) A hiˈo ai te Atua i te mau miria taata, eaha te tahi mau huru maitatai ta ˈna e oaoa i te ite? (2) Eaha te tahi mau ohipa mea faufaa no Iehova?

⁷ A piti, te faaite ra te Bibilia eaha te mea faufaa no Iehova a hiˈo ai oia i ta ˈna mau tavini. E oaoa roa o ˈna i te ite i to tatou mau huru maitatai e ta tatou mau tutavaraa. Ua parau te arii Davida i ta ˈna tamaiti o Solomona: “Te hiˈopoa maite nei hoi Iehova i te mau aau atoa e te ite ra oia i te mau manaˈo e opuaraa atoa.” (Paraleipomeno 1, 28:9) A hiˈo ai te Atua i te mau miria taata i roto i teie nei ao ino, eaha râ oia i te oaoa ia ite i te hoê aau o te hinaaro i te hau, te parau mau e te parau-tia! Hau roa ˈtu â ïa oia i te oaoa a ite ai te hoê taata o te here ia ˈna a tutava noa ˈi i te haapii i te parau mau e i te faaite i te reira ia vetahi ê! Mea tâuˈa roa na Iehova te feia atoa e na reira. E “buka haamanaˈoraa” ta ˈna no “te feia e mǎtaˈu ra [ia ˈna] e no te feia e feruriruri ra i to ˈna iˈoa.”​—Malaki 3:16.

⁸ Eaha te tahi mau ohipa mea faufaa no Iehova? E haafaufaa o ˈna i ta tatou mau tutavaraa ia pee i ta ˈna Tamaiti o Iesu Mesia. (Petero 1, 2:21) Te tahi ohipa faufaa roa no te Atua, o te pororaa ïa o te parau apî oaoa o ta ˈna Faatereraa  arii. I roto i te Roma 10:15, te taio nei tatou: “Auê te nehenehe te avae o te feia e faaite i te parau apî oaoa no nia i te mau mea maitai!” Aita paha tatou e manaˈo ra e mea “nehenehe” to tatou avae. Te faahohoˈa ra râ te reira i te mau tutavaraa ta te mau tavini a Iehova e rave ra i roto i te ohipa pororaa. Mea nehenehe e mea faufaa ta ratou mau tutavaraa atoa i te aro o Iehova.​—Mataio 24:14; 28:19, 20.

9, 10. (1) Mea faufaa anei no Iehova ia faaoromai tamau tatou noa ˈtu te fifi? (2) A hiˈo ai i te aau o ta ˈna mau tavini haapao maitai, eaha ta Iehova e tapea mai?

⁹ Mea faufaa atoa no Iehova ia faaoromai tamau tatou noa ˈtu te fifi. (Mataio 24:13) A haamanaˈo, te hinaaro ra Satani ia faaea oe i te tavini ia Iehova. Ia tapea oe i te taiva ore i teie mahana, e pahonoraa te reira i te mau faatihaehaeraa a Satani. (Maseli 27:11) I te tahi taime, no te maˈi, te fifi i te pae moni, te mau haapeapearaa e te mau manaˈo haaparuparu, e ere i te mea ohie ia tamau maite i te tavini ia Iehova. (Maseli 13:12) Ia na reira râ tatou, e haafaufaa ˈtu â Iehova i ta tatou mau tutavaraa no te faaoromai tamau. No reira i papu roa ˈi i te arii Davida e tuu Iehova i to ˈna mau  roimata i roto i ta ˈna “pute pape.” (Salamo 56:8) Te auraa, e haamanaˈo Iehova i to tatou mau roimata atoa e te mauiui ta tatou e faaoromai a tapea noa ˈi i to tatou taiva ore ia ˈna. Mea faufaa roa te reira no ˈna!

¹⁰ Noa ˈtu te mau haapapuraa mea faufaa tatou no Iehova, e tamau vetahi i te manaˈo mea faufaa ore ratou. E na ô paha ratou i te feruri: “Mea maitai aˈe hoi te tahi atu ia ˈu! Ia hiˈo anaˈe mai Iehova ia ˈu, aita roa ˈtu o ˈna e mauruuru ra!” Tera râ, eita Iehova e faaau ia oe i te tahi atu e e mauruuru noa oia i te mea e maraa ia oe! (Galatia 6:4) Ia hiˈo oia i to tatou aau, eita Iehova e tapea mai i te mau hapahapa rii atoa, e haafaufaa râ o ˈna i te maitai e vai ra i roto ia tatou.

E tapea noa mai Iehova i te mea maitai

11. Eaha ta tatou e haapii mai no nia ia Iehova na roto i ta ˈna i rave no Abia?

¹¹ A toru, a hiˈo ai i to tatou aau, e imi maite Iehova i te mea maitai i roto ia tatou, e tera noa ta ˈna e tapea mai. I to Iehova faaotiraa e haamouhia te mau tane atoa o te utuafare o te arii taiva o Ieroboama, ua parau oia e hunahia o Abia, hoê o te mau tamaiti a te arii, ma te tura. Eaha te tumu? “No te mea i roto i te utuafare o Ieroboama, i roto ia ˈna anaˈe Iehova te Atua o Iseraela i te iteraa i te mea maitai.” (Te mau arii 1, 14:1, 10-13) Te auraa, ua imi maite Iehova i roto i te aau o taua tamaiti ra e ua itehia mai ia ˈna “te mea maitai.” Noa ˈtu mea iti roa, mea faufaa no Iehova ia faahitihia te reira i roto i ta ˈna Parau. No reira Iehova i aroha hamani maitai ai ia Abia ia hunahia oia ma te tura.

12, 13. (1) E nafea te hiˈoraa o te arii Iehosaphata e faaite ai e imi Iehova i te maitai i roto ia tatou noa ˈtu ua hara tatou? (2) Ei Metua î i te here, eaha ta Iehova e ore roa ˈtu e rave?

¹² Te itehia ra te hoê hiˈoraa taa ê atu â i nia i te arii maitai ra o Iehosaphata. I to te arii raveraa i te hoê ohipa maamaa, ua parau te peropheta a Iehova ia ˈna: “No reira Iehova i riri ai ia oe.” Mea peapea mau, e ere anei? Aita râ te poroi a  Iehova i hope, ua na ô â te peropheta: “Tera râ, e mau mea maitai tei itehia i roto ia oe.” (Paraleipomeno 2, 19:1-3) Noa ˈtu e riri tia to Iehova, ua imi maite oia i te mea maitai i roto ia Iehosaphata. Area tatou te taata tia ore, ua inoino anaˈe tatou, eita tatou e tâuˈa faahou i te maitai e vai ra i roto ia vetahi ê. E ia hara tatou, e nehenehe te haama e te aau faahapa e turai mai ia manaˈo aita hoê aˈe mea maitai i roto ia tatou. A haamanaˈo râ, ia tatarahapa tatou i ta tatou mau hara a tutava atoa ˈi i te ore e tapiti faahou, e faaore mai Iehova i te reira.

¹³ Mai te hoê taata imi auro, e tuu Iehova i ta tatou mau hara i te hiti e e tapea noa mai o ˈna i to tatou mau huru maitatai e ta tatou mau tutavaraa! No te mau metua, mea faufaa roa te mau hohoˈa peni aore ra taoˈa hamanihia e ta ratou tamarii. E faaherehere vetahi i te reira e rave rahi matahiti noa ˈtu aita te tamarii e haamanaˈo faahou ra! Aita e metua î i te here mai ia Iehova ra te huru! A vai taiva ore noa ˈi tatou ia ˈna, eita roa ˈtu e moˈe ia ˈna te mau mea maitai ta tatou i rave e i faaite. Oia mau, ei Atua parau-tia, e ere i te mea tano no Iehova ia haamoˈe i te reira. (Hebera 6:10) E hiˈopoa anaˈe eaha ˈtu â ta Iehova e imi i roto i to tatou aau.

14, 15. (1) No te aha mea faufaa tatou no Iehova noa ˈtu to tatou mau paruparu? A horoa i te hiˈoraa. (2) Eaha ta Iehova e rave a ite ai i te maitai e vai ra i roto ia tatou e eaha to ˈna manaˈo i ta ˈna mau tavini haapao maitai?

 ¹⁴ Noa ˈtu to tatou mau paruparu, ua ite Iehova e nehenehe tatou e riro mai ei taata maitai aˈe. Ua ino anaˈe te hoê hohoˈa penihia, e tutava rahi vetahi i te tataî i te reira. Ei hiˈoraa, i te tahi fare faaiteiteraa taoˈa i Lonedona, ua pupuhi te tahi taata i nia i te hohoˈa peni a Léonard de Vinci, ua hau atu to ˈna faito moni i te 3 miria moni farane. Aita hoê taata i parau, inaha hoi ua ino, ia faaruehia ïa! Ua haamata oioi râ te ohipa tataîraa i tera hohoˈa peni tei hamanihia fatata 500 matahiti na mua ˈtu. Eaha te tumu? Mea faufaa hoi te reira no te feia mea au na ratou te ohipa a teie taata peni hohoˈa. E ere anei oe i te mea faufaa aˈe i te hoê hohoˈa penihia? Noa ˈtu ua ino oe i te huru tia ore no ǒ mai ia Adamu, mea faufaa roa oe no te Atua. (Salamo 72:12-14) Ei Atua poiete, tei ia Iehova ra te aravihi no te faahoˈi faahou mai i te huru tia roa o te feia e here ra ia ˈna.​—Ohipa 3:21; Roma 8:20-22.

¹⁵ Oia, e imi Iehova i te maitai e vai ra i roto ia tatou noa ˈtu aita tatou e ite ra i te reira. E a tavini noa ˈi ia ˈna, e tauturu mai Iehova ia haamaitai atu â i te maitai e vai ra i roto ia tatou e ia riro roa ˈtu tatou ei taata tia roa. No Iehova, mea faufaa ta ˈna mau tavini haapao maitai noa ˈtu eaha te huru tupuraa ta ratou i farerei i roto i te ao a Satani, e au hoi ratou i te “taoˈa hinaaro-rahi-hia.”​—Hagai 2:7.

E haapapu Iehova i to ˈna here na roto i te ohipa

16. Eaha te haapapuraa rahi roa ˈˈe o to Iehova here ia tatou e no te aha ua papu ia tatou ua horoahia te tusia o te Mesia no tatou tataitahi?

¹⁶ A maha, ua haapapu atoa mai Iehova i to ˈna here ia tatou. Papu maitai, o te tusia taraehara o te Mesia te haapapuraa  rahi roa ˈˈe mea hape ta Satani parau mea faufaa ore tatou. Eiaha roa ia moˈe ia tatou ua ineine Iesu i te faaruru i te pou haamauiuiraa no tatou. Area o Iehova, ua ineine oia i te vaiiho ia haapohehia ta ˈna Tamaiti here no tatou. E ere anei tera i te haapapuraa rahi roa ˈˈe o to raua here ia tatou? Ma te peapea, te manaˈo ra te taata e rave rahi aita taua ô ra i horoahia no ratou tataitahi. I ta ratou hiˈoraa, mea faufaa ore hoi ratou. A haamanaˈo na râ i te aposetolo Paulo. Na mua ˈˈe, i hamani ino na o ˈna i te mau pǐpǐ a te Mesia. Ua papai râ oia: “Te ora nei au maoti to ˈu faaroo i te Tamaiti a te Atua o tei here ia ˈu e tei horoa ia ˈna iho no ˈu.”​—Galatia 1:13; 2:20.

17. Mea nafea Iehova i te aratairaa mai ia tatou ia ˈna ra e i ta ˈna Tamaiti?

¹⁷ Te haapapu ra Iehova i to ˈna here ia tatou na roto i te tautururaa ia tatou tataitahi ia fanaˈo i te mau maitai o te tusia o te Mesia. Ua parau Iesu: “E ore roa te taata e pee mai ia ˈu aita anaˈe te Metua tei tono mai ia ˈu e faafatata mai ia ˈna ia ˈu ra.” (Ioane 6:44) Oia, na Iehova i aratai ia tatou tataitahi i ta ˈna Tamaiti ra a fanaˈo atu ai tatou i te tiaturiraa o te ora mure ore. Mea nafea? Maoti te ohipa pororaa, ua farii tatou i te parau apî oaoa. E maoti to ˈna varua moˈa, ua tauturu Iehova ia tatou ia taa e ia faaohipa i ta te Bibilia e haapii ra noa ˈtu to tatou huru tia ore. Mai ta ˈna i parau ia Iseraela, te na ô atoa mai ra Iehova ia tatou tataitahi: “Ua here au ia oe i te here mure ore. No reira vau i faafatata mai ai ia oe ia ˈu nei ma te here taiva ore.”​—Ieremia 31:3.

18, 19. (1) Eaha te ravea taa ê roa ˈˈe no te ite i te here hohonu o Iehova ia tatou e eaha te faaite ra te tâuˈa mau ra oia ia tatou tataitahi? (2) E nafea te Bibilia ia haapapu mai e Atua aumauiui Iehova?

¹⁸ O te pure te ravea taa ê roa ˈˈe no te ite i te here hohonu o Iehova ia tatou tataitahi. Te titau mai ra te Bibilia ia tatou ia “tamau i te pure.” (Tesalonia 1, 5:17) Te parauhia ra o Iehova “tei faaroo i te pure.” (Salamo 65:2) O Iehova  anaˈe ïa te faaroo i ta oe pure. Aita oia i horoa i tera tiaraa i te tahi atu, tae noa ˈtu i ta ˈna iho Tamaiti. A feruri na: O te Atua poiete iho te faaitoito mai ra ia faafatata ˈtu ia ˈna na roto i te pure ma te taiâ ore. Hau atu â, a faaroo noa ˈi i ta tatou pure, e tâuˈa mau Iehova ia tatou e te tupuraa ta tatou e faaruru ra.

¹⁹ E Atua aumauiui o Iehova. Eaha te aumauiui? Ua parau te hoê Kerisetiano paari haapao maitai: “Te aumauiui, o to oe ïa mauiui i roto i to ˈu aau.” E mauiui mau anei Iehova ia mauiui tatou? I te haamauiuiraahia to ˈna nunaa Iseraela, teie te parauhia ra no Iehova: “I roto i to ratou mau tupuraa ahoaho atoa, ua ahoaho oia.” (Isaia 63:9) Aita Iehova i hiˈo noa i to ratou mau fifi, ua mauiui atoa râ oia no ratou. No to ˈna here rahi i ta ˈna mau tavini, ua parau roa Iehova: “Te taata o te hauti ia outou, te hauti ra ïa i to ˈu orio mata.” b (Zekaria 2:8) Eaha râ paha te mauiui ia na reirahia! Oia, ia mauiui tatou, e mauiui atoa Iehova.

20. Ia au i te Roma 12:3, eaha te huru feruriraa tano ore e titauhia ia tatou ia ape?

²⁰ E ere râ no te mea mea faufaa te tavini o Iehova, e tumu ïa te reira no te teoteo e no te manaˈo mea maitai aˈe oia ia vetahi ê. Ua papai te aposetolo Paulo: “No te hamani maitai rahi hoi tei horoahia mai ia ˈu, te parau atu nei au i te taata tataitahi i rotopu ia outou eiaha ia manaˈo e mea maitai aˈe o ˈna, ei manaˈo au noa râ to ˈna, ia au i te faito o te faaroo ta te Atua i horoa mai ia outou tataitahi.” (Roma 12:3) E haamanaˈo anaˈe no te aroha hamani maitai  rahi noa o Iehova tatou i fanaˈo ai i to ˈna here, e ere mai te mea ra ua rave tatou i te tahi mea ia here mai oia ia tatou.​—Luka 17:10.

21. Eaha te tahi mau parau haavare a Satani o te titauhia ia patoi tamau, eaha râ ta Iehova e haapapu mai ra?

²¹ E rave paatoa anaˈe i te mau mea atoa e maraa ia tatou no te patoi i te mau haavare atoa a Satani, tae noa ˈtu te parau haavare mea faufaa ore tatou. Ua ô mai paha tera manaˈo hape no te tahi mau tupuraa i roto i to oe oraraa, no ta oe mau hape tahito aore ra no te mea mea iti roa te maitai ta oe i rave. Te hinaaro ra Satani ia tiaturi oe eita te tusia o te Tamaiti here a te Atua e nehenehe e faaore i ta oe mau hara. Mea hape roa râ tera parau! No reira, a patoi i taua mau parau haavare ra ma to oe aau atoa! E tiaturi papu anaˈe i teie mau parau ta Paulo i papai i raro aˈe i te aratairaa a te varua moˈa: “Ua papu roa hoi ia ˈu e ore roa ˈtu te pohe, te ora, te mau melahi, te mau faatereraa, te mau mea e vai nei aore ra te mau mea e tupu mai, te mau puai atoa, e to te vahi teitei aore ra to te hohonuraa, e ore roa ˈtu te tahi atu mea i poietehia e nehenehe e faataa ê ia tatou i te here o te Atua e faaitehia ra na roto i te Mesia ra o Iesu to tatou Fatu.”​—Roma 8:38, 39.