Eaha to roto?

Mau faaho'iraa ê

Tapura tumu parau

Ite no Iehova

Tahiti

Te Pare Tiairaa—Haapiiraa  |  Titema 2013

‘E na reira ei mana‘oraa ia ’u’

‘E na reira ei mana‘oraa ia ’u’

“E oti a‘era ia ’na te haamaitai i te Atua, vavahi ihora [i te pane], na ô atura, A rave mai, a amu; e taipe teie o to ’u tino e ofatihia no outou nei; e na reira outou ei mana‘oraa ia ’u.”—KOR. 1, 11:24, Traduction du monde nouveau.

1, 2. Eaha paha ta te mau aposetolo i mana‘o hou te tere hopea o Iesu i Ierusalema?

UA ITE te feia tiai no Ierusalema i te tuhaa matamua o te ava‘e. I to te Sunederi faarooraa i te reira, faaite a‘era ratou e ua haamata te hoê ava‘e apî, Nisana. Parare a‘era tera parau apî maoti te auahi e te vea. Ua ite te mau aposetolo e fatata roa te Pasa. Ua taa iho â ia ratou e e hinaaro Iesu e tapae i Ierusalema hou tera oroa.

2 I tera taime, tei Pérée Iesu e ta ’na mau aposetolo, i te tahi atu pae o Ioridana. Te haere nei o ’na i Ierusalema no te taime hopea. (Mat. 19:1; 20:17, 29; Mar. 10:1, 32, 46) Ua ite ana‘e te mau ati Iuda afea te mahana matamua no Nisana, e taio ratou 13 atu â mahana no te faatupu i te Pasa i muri a‘e i te toparaa mahana o te 14 no Nisana.

3. No te aha mea faufaa ’i no te mau Kerisetiano te taio mahana o te Pasa?

3 Teie te taio mahana o te Amuraa maa a te Fatu, o te tuati atoa ra i te Pasa: te 14 no Eperera 2014. E mahana taa ê teie no te mau Kerisetiano mau e te feia e anaanatae ra i te parau mau. No te aha? No te mau parau i roto i te Korinetia 1, 11:23-25 (MN): “Ua rave te Fatu ra o Iesu i te pane i te rui i haavarehia mai ai oia ra: e oti a‘era ia ’na te haamaitai i te Atua, vavahi ihora, na ô atura, A rave mai, a amu; e taipe teie o to ’u tino e ofatihia no outou nei; e na reira outou ei mana‘oraa ia ’u. E ua na reira atoa hoi i te au‘a.”

4. (a) Eaha te uiui no nia i te Oroa haamana‘oraa? (b) E nafea e itehia ’i i te taio mahana o te Oroa haamana‘oraa i te matahiti taitahi? (A hi‘o i te tumu parau tarenihia  “Oroa haamana‘oraa 2014.”)

4 Papu maitai e e tae mai oe i te oroa ta Iesu i parau i ta ’na mau pǐpǐ ia faatupu i te mau matahiti atoa. Hou roa râ, a uiui: ‘E nafea ia faaineine ia ’u no tera oroa? Eaha te faaohipahia? Eaha te tereraa o tera  tupuraa? E no te aha mea faufaa ’i no ’u tera oroa e na tao‘a taipe e faaohipahia?’

NA TAO‘A TAIPE

5. Eaha ta Iesu i parau i ta ’na mau aposetolo ia faaineine no te Pasa?

5 A parau ai Iesu i ta ’na mau aposetolo ia faanaho i te hoê piha no te oroa Pasa, aita o ’na i faahiti i te mau faaneheneheraa e tuu i roto. Peneia‘e ua hinaaro noa Iesu i te hoê piha mâ e te au maitai e ô ai ratou paatoa. (A taio i te Mareko 14:12-16.) Ua faaineine atoa na aposetolo i tei titauhia no te amuraa maa, mai te pane hopue ore e te uaina uteute. I te otiraa te oroa Pasa, ua faaohipa Iesu i teie na tao‘a taipe.

6. (a) I muri iho i te oroa Pasa, eaha ta Iesu i parau no nia i te pane? (b) O teihea huru pane te faaohipahia i te Oroa haamana‘oraa?

6 Tei reira te aposetolo Mataio o tei papai i muri a‘e: “Ua rave ihora Iesu i te pane, e oti a‘era i te haamaitai i te Atua, vavahi ihora, tuu atura i te mau pǐpǐ ra, na ô atura, A rave, a amu.” (Mat. 26:26) E “pane” hopue ore te reira o tei faaohipahia no te Pasa. (Exo. 12:8; Deut. 16:3) Ua faaineinehia tera pane maoti noa te faraoa ota sitona e te pape. Aita i tuuhia te hopue aore ra te tahi atu mea mai te miti papaa. Mea rairai ïa te pane e mea ohie ia ofatifati. I teie mahana, hou te Oroa haamana‘oraa, e ani te mau matahiapo i te hoê taata ia faaineine i tera pane maoti te faraoa ota sitona e te pape a farai pani atu ai e maa hinu. (Aita ana‘e e faraoa ota sitona, e nehenehe e faaohipa i te faraoa ota o te tahi atu huero mai te raiti, te kerite aore ra te to popaa.) E nehenehe atoa e rave i te pane hopue ore ati Iuda aita e kerite, e huero moa aore ra e oniani i roto.

7. Eaha te huru uaina ta Iesu i faaohipa, e eaha ta tatou e faaohipa i te Oroa haamana‘oraa?

7 Te na ô faahou ra Mataio: “Ua rave ihora [Iesu] i te au‘a, haamaitai atura i te Atua, tuu atura ia ratou ra, na ô atura, A inu outou atoa.” (Mat. 26:27, 28) E au‘a uaina uteute ta Iesu i rave. (E ere i te pape vine, ua oti ê na hoi te auhune vine.) Noa ’tu e aita e uaina i te Pasa matamua i  Aiphiti, aita Iesu i patoi ia inuhia te reira i te Pasa. Ua faaohipa atoa o ’na maa uaina i te Amuraa maa a te Fatu. E faaohipa atoa ïa te mau Kerisetiano i te uaina i te Oroa haamana‘oraa. I te mea e aita e faufaa ia haamaitai atu â i to Iesu toto, e ravehia te hoê uaina aita i anoihia te ava aore ra te tahi atu raau faano‘ano‘a. E faaohipahia te hoê uaina uteute hamanihia i te fare aore ra tei hoohia mai i te fare toa mai te Beaujolais, Burgundy aore ra Chianti.

TE AURAA O NA TAO‘A TAIPE

8. No te aha te mau Kerisetiano e anaanatae ai i te auraa o te pane e te uaina?

8 Ua faaite te aposetolo Paulo e e mea tia ia faatupu te tahi atu mau Kerisetiano, eiaha noa te mau aposetolo, i te Amuraa maa a te Fatu. Ua papai o ’na i to ’na mau taeae i Korinetia: “I noaa hoi ia ’u i te Fatu ra ta ’u i tuu atoa ’tu ia outou na, e ua rave te Fatu ra o Iesu i te pane . . . e oti a‘era ia ’na te haamaitai i te Atua, vavahi ihora, na ô atura, A rave mai, a amu; e taipe teie o to ’u tino e ofatihia no outou nei; e na reira outou ei mana‘oraa ia ’u.” (Kor. 1, 11:23, 24, MN) E anaanatae te mau Kerisetiano i teie mahana i te auraa o te pane e te uaina no te mea e titauhia ia faatupu ratou i teie oroa taa ê i te mau matahiti atoa.

9. Eaha to vetahi mana‘o hape no nia i te pane ta Iesu i faaohipa?

9 No te mau huriraa Bibilia o te faaohipa-rahi-hia ra, te faaite ra te tahi mau taata faaroo e ua parau Iesu: ‘O to ’u tino teie.’ No ratou, ua riro semeio mai te pane ei tino o Iesu. E ere râ i tei tupu. * Te ite noa ra ta Iesu mau aposetolo i to ’na tino a amu ai ratou i te pane hopue ore. Ua faaohipa ïa o ’na i te parau taipe mai ta  ’na i rave i te taime e rave rahi.—Ioa. 2:19-21; 4:13, 14; 10:7; 15:1.

10. I te Amuraa maa a te Fatu, te faahoho‘a ra te pane i te aha?

10 Ua faataipe te pane ta te mau aposetolo i ite e i fatata i te amu i te tino o Iesu. Teihea tino? I te tahi taime, ua mana‘o te mau tavini a te Atua e e taipe te pane o “te tino o te Mesia,” oia hoi te amuiraa a tei faatavaihia. No te aha? No te mea ua ofati Iesu i te pane, aita râ hoê a‘e o ta ’na mau ivi i ofatihia. (Eph. 4:12; Roma 12:4, 5; Kor. 1, 10:16, 17; 12:27) Ma te feruri râ i nia i te mau Papai, ua taahia e te faahoho‘a ra te pane i to Iesu tino taata, tei faaauhia no ’na. Ua mauiui Iesu e ua rî-atoa-hia o ’na. No reira, i te Amuraa maa a te Fatu, te faahoho‘a ra te pane i te tino taata o Iesu ta ’na i horoa no ta tatou mau hara.—Pet. 1, 2:21-24; 4:1; Ioa. 19:33-36; Heb. 10:5-7.

11, 12. (a) Eaha ta Iesu i parau no nia i te uaina? (b) I te Amuraa maa a te Fatu, te faahoho‘a ra te uaina i te aha?

11 Te tauturu maira te reira ia taa eaha ta Iesu i parau no nia i te uaina. Te taio nei tatou: “Ua na reira atoa hoi i te au‘a, ia oti a‘e tana amuraa, na ô atura, Teie nei au‘a, e taipe ïa o te faufaa apî i to ’u nei toto.” (Kor. 1, 11:25, MN) O te au‘a anei ta Iesu i tapea te faufaa apî? E ere. Te mana‘o ra Iesu i te uaina i roto i tera au‘a. Ia au i ta Iesu i parau, te faataipe ra aore ra te faahoho‘a ra te uaina i te aha? I to ’na toto o te haamaniihia.

12 I roto i te Evanelia a Mareko, te ite ra tatou i ta Iesu mau parau: “E taipe teie o to ’u toto o te faufaa apî i haamaniihia no te taata e rave rahi.” (Mar. 14:24, MN) Oia mau, e “haamaniihia” te toto o Iesu “no te taata e rave rahi ia matara [aore ra ia faaorehia] te hara.” (Mat. 26:28) Te faahoho‘a maitai ra ïa te uaina uteute i te toto o Iesu. Maoti to ’na toto e fana‘o ai tatou i te hoo ‘e faaorehia ’i ta tatou mau hara.’—A taio i te Ephesia 1:7.

Ua inu te mau aposetolo i te uaina o tei faataipe i te toto o te faufaa o Iesu (A hi‘o i te paratarafa 11, 12)

TE HAAMANA‘ORAA I TE POHERAA O TE MESIA

13. A faataa e nafea te Oroa haamana‘oraa i te poheraa o te Mesia e faatupuhia ’i.

13 Mai te peu e a tahi ra oe e haere ai i te Oroa haamana‘oraa e te mau Ite no Iehova, eaha ta oe e ite? E tupu te reira i te hoê vahi mâ e te au maite i reira te taatoaraa e oaoa ’i i te putuputuraa. Peneia‘e e ite oe i te tahi maa tiare, tanotano noa râ, ia ore ia mana‘ohia e e vahi arearearaa teie. E faataa mai te hoê matahiapo aravihi ma te taa maitai e te tura i ta te Bibilia e parau ra no nia i tera tupuraa. E tauturu o ’na i te taatoaraa ia mauruuru no ta te Mesia i rave no tatou. Oia hoi, ua pohe o ’na ei hoo ia ora tatou. (A taio i te Roma 5:8-10.) E faataa te taeae orero e piti tiaturiraa faahitihia e te Bibilia no te mau Kerisetiano.

14. Eaha na tiaturiraa e hi‘opoahia i roto i te oreroraa parau o te Oroa haamana‘oraa?

14 Te tahi tiaturiraa, o te faatereraa ïa e te Mesia i nia i te ra‘i. Te tiaturiraa ïa o te hoê pǔpǔ iti Kerisetiano. Tei roto atoa te mau aposetolo taiva ore. (Luka 12:32; 22:19, 20; Apo. 14:1) Area te rahiraa o te mau Kerisetiano taiva ore i teie mahana, te tiaturi nei ïa ratou e ora e a muri noa ’tu i nia i te fenua o te riro ei paradaiso. I reira te hinaaro o te Atua e ravehia ’i i nia i te fenua mai i te ra‘i atoa. O ta te mau Kerisetiano ïa e pure noa ra. (Mat. 6:10) Te faataa ra te mau Papai i te mau mea faahiahia ta ratou e ite e a muri noa ’tu.—Isa. 11:6-9; 35:5, 6; 65:21-23.

15, 16. Eaha te ravehia e te pane i te Oroa haamana‘oraa?

15 A fatata ’i te hopea o ta ’na oreroraa  parau, e faaite te taeae orero e ua tae i te taime no te pee i ta Iesu i parau i ta ’na mau pǐpǐ ia rave. Mai tei faahitihia na, e faaohipahia e piti tao‘a taipe: te pane hopue ore e te uaina uteute. E vaiihohia te reira i nia i te hoê airaa maa i pihaiiho i te taeae orero. E taio o ’na i te hoê faatiaraa Bibilia o te faataa ra i ta Iesu i parau e i rave a haamau ai i tera oroa. Ei hi‘oraa, te taio nei tatou i roto i te Mataio: “Ua rave ihora Iesu i te pane, e oti a‘era i te haamaitai i te Atua, vavahi ihora, tuu atura i te mau pǐpǐ ra, na ô atura, A rave, a amu; e taipe teie o to ’u tino.” (Mat. 26:26, MN) Ua ofatifati Iesu i te pane hopue ore no te horoa i te mau aposetolo i to ’na pae aui e i to ’na pae atau. E ite oe i te putuputuraa i te 14 no Eperera maa pane i roto i te mau mereti.

16 Ehia mereti te faaohipahia? E faaohipahia te mereti e titauhia no te faahaere oioi i te pane i rotopu i te feia atoa e putuputu mai. Eita e ravehia te tahi faanahoraa taa ê. I muri a‘e i te hoê pure poto, e faahaerehia te mau mereti ma te naho maitai ia au i tei nehenehe. Tau taata te amu i te pane aore ra aita roa ’tu, mai tei itehia i roto i te rahiraa o te amuiraa i te Oroa haamana‘oraa i 2013.

17. I te Oroa haamana‘oraa, e nafea te aratairaa a Iesu no nia i te uaina e peehia ’i?

17 Ia oti, e hutihia te ara-maite-raa i nia i ta Mataio i faataa â: “Ua rave ihora [Iesu] i te au‘a, haamaitai atura i te Atua, tuu atura ia ratou ra, na ô atura, A inu outou atoa; e taipe teie o to ’u toto, e toto no te faufaa apî, i haamaniihia no te taata e rave rahi ia matara te hara.” (Mat. 26:27, 28, MN) Ma te pee i te reira, e faaotihia te tahi atu pure a faahaere atu ai i te mau “au‘a” uaina uteute i rotopu i te feia atoa e tae mai.

18. No te aha mea faufaa ’i ia tae i te Oroa haamana‘oraa noa ’tu e mea iti te rave i na tao‘a taipe aore ra aita roa ’tu?

18 I te Oroa haamana‘oraa, o te mau Kerisetiano ana‘e o te faatere e o Iesu i roto i to ’na Basileia i te ra‘i te amu i te pane e te inu i te uaina. (A taio i te Luka 22:28-30; Tim. 2, 4:18) Area te rahiraa, e feia mataitai faatura noa ïa o te ore e amu i te pane e e inu i te uaina. Mea faufaa ia tae i te Amuraa maa a te Fatu, e faaite hoi te reira e mea faufaa mau no ratou te tusia o Iesu. I te Oroa haamana‘oraa, e nehenehe ratou e feruri i nia i te mau haamaitairaa ta ratou e fana‘o maoti te tusia taraehara o Iesu. Te tiaturi nei ratou e riro ei melo o te “feia rahi roa” o te ora mai i te “ati rahi” e fatata maira. E tavini teie a te Atua o te “horoi i to ratou ahu, e ua teatea, i te toto o te Arenio.”—Apo. 7:9, 14-17.

19. Eaha te rave no te faaineine ia oe e no te faufaahia i te Amuraa maa a te Fatu?

19 E faaineine te mau Ite no Iehova na te ao ia ratou no teie putuputuraa taa ê. Tau hebedoma na mua ’tu, e titau manihini tatou i te taata e rave rahi roa ia tae mai i tera oroa. I te mau mahana hou te Oroa haamana‘oraa, e taio te rahiraa o tatou i te mau faatiaraa Bibilia no nia i ta Iesu i rave e no nia i tei tupu i te hoê â mahana i te matahiti 33. E faaineine ê na tatou ia tatou ia tae iho â i te Oroa haamana‘oraa. Mea maitai ia tae oioi atu no te farii i te mau manihini e no te faaroo i te porotarama taatoa. E faufaa-mau-hia tatou paatoa, te mau melo o te amuiraa e te mau manihini, i te peeraa i te taioraa e te faataaraa o te mau irava i roto i ta tatou iho Bibilia. Te mea faufaa roa ’‘e, e faaite atu tatou i to tatou mauruuru haavare ore no to Iesu tusia e te pee ra tatou i ta ’na faaueraa: “E na reira outou ei mana‘oraa ia ’u.”—Kor. 1, 11:24.

^ par. 9 Ia au i te aivanaa Heremani ra o Heinrich Meyer, aita te mau aposetolo i mana‘o e te amu ra ratou i te tino o Iesu e te inu ra i to ’na toto. No te mea “aita te tino o Iesu i ofatihia ’tura (te ora noa ra o ’na).” Ua parau atoa o ’na e ua faaohipa Iesu i te mau parau ohie ia taa no te faataa eaha te auraa o te pane e te uaina e ua hinaaro Iesu ia maramarama maitai ta ’na mau pǐpǐ i ta ’na mau parau.