Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

TE PARE TIAIRAA (HAAPIIRAA) TITEMA 2013

Paruruhia i roto i te mǎrǔ o te mou‘a

Paruruhia i roto i te mǎrǔ o te mou‘a

A TATARA ’I te vahine i to ’na uputa fare i te aahiata, e puohu to mua ’tu. Ua rave o ’na i te reira e ua hi‘o e ati a‘e ia ’na . . . aita e taata na te aroâ. Ua vaiihohia mai paha te reira i te po ra. A iriti rii ai i te puohu, ho‘i oioi atura o ’na i roto i te fare e tapiri atura i te opani. E papai Bibilia opanihia to roto! Rave maira oia i te reira, tuu maira i nia i to ’na ouma e pure atura ia Iehova i roto i to ’na aau no te haamauruuru atu no teie maa pae varua faufaa mau.

Teie te mau huru tupuraa i itehia i Heremani i te mau matahiti 1930. A faatere ai te mau Nazis i 1933, ua opanihia te ohipa a te mau Ite no Iehova na te rahiraa o te tuhaa fenua i Heremani. Te na ô ra Richard Rudolph, * 100 tiahapa matahiti to ’na i teie nei: “Ua papu ia matou e eita tera ture taata e nehenehe e tapea ia matou ia ore ia faaite ia Iehova e i to ’na i‘oa. Mea faufaa roa te papai Bibilia no ta matou iho haapiiraa e no te taviniraa. No te opaniraa râ, aita matou i fana‘o ohie faahou i te reira. Ua uiui matou e nafea te ohipa e tamau noa ’i.” Taa oioi a‘era ia Richard e e nehenehe ta ’na e tauturu ia fana‘o faahou i te mau papai Bibilia ma te hoê ravea mana‘o-ore-hia. Na roto ïa i te mǎrǔ o te mou‘a.—Tav. 9:36.

OHIPA OPERERAA HUNA

Ia haere oe i uta ’tu i te anavai Elbe (aore ra Labe), e tapae oe i te anairaa mou‘a parauhia Monts des Géants (Krkonoše). O te otia ïa e faataa ê ra i te Repupirita Tchèque e Poronia. Noa ’tu e 1 600 metera noa te teitei o teie mau mou‘a, mea rahi te hiona i nia iho. E toru metera hiona te tapo‘i i te mau tupuai mou‘a e ono ava‘e i te maoro. E tauiui noa te huru o te reva i ǒ e e nehenehe te feia o te ore e tâu‘a i te reira e mau i roto i te rupehu meumeu o te haaati taue i te tupuai mou‘a.

I te roaraa o te mau matahiti, ua riro teie mau mou‘a ei otia i rotopu i te mau mataeinaa,  faatereraa e fenua. Mea fifi no te mau mutoi ia haapao i tera mau tuhaa fenua heehee. No reira mea rahi ai te taata na mua ’‘e tei haere na nia i tera mau mou‘a no te faaô huna mai i te tahi mau mea. I te mau matahiti 1930, a faataa ê ai tera mau mou‘a i te Tekolovakia e Heremani, ua haamata te mau Ite itoito i te haere na tera mau e‘a tei ore i faaohipa-faahou-hia. No te aha? No te tii i te papai Bibilia faufaa i te vahi e faatiahia ’i te reira. O Richard hoê o ratou i to ’na apîraa.

Taeae e tuahine tei au i te taata hahaere e ta ratou pute papai e haere ra i Heremani na nia i te mou‘a

HAERERAA ATÂTA NA TE MOU‘A

Te haamana‘o ra Richard e i te mau hopea hebedoma, e hitu aore ra e vau ratou taeae apî te haere i nia i te mau mou‘a. E oomo ratou i te ahu e tano no teie tere. Mai Heremani atu, e toru hora e na nia ’i ratou i te mau mou‘a e tae atu ai i Špindlerův Mlýn. E mataeinaa teie i Tekolovakia 16,5 kilometera i te atea ia Heremani. Mea rahi to Heremani e faaea ra i reira, tae noa ’tu te hoê taata faaamu animara, o tei farii i te tauturu i te mau taeae. Na nia i te hoê pereoo hutihia e te puaahorofenua uta ratere, e haere oia i te hoê oire tapiri e tii i te mau afata papai i tae mai na Prague mai na nia i te pereoo auahi. E huna oia i te reira i ta ’na fare faaamuraa animara, a tiai noa ’tu ai i te feia e afai i te mau papai i Heremani.

Te faatia râ Richard e ia tae ratou i taua fare faaamuraa animara ra, e faaî ratou i ta ratou mau pute amohia i nia i te tua. Teie mau pute, no te amo ïa i te mau mea teiaha, e 50 kilo ta te taeae taitahi. Ia ore ratou e noaa, e faarue ratou i te toparaa mahana ia tae ratou i ǒ ratou hou te hitiraa mahana, te poiri noa ra ïa. Te faataa ra Ernst Wiesner, tiaau haaati i Heremani i tera mau matahiti, i ta te mau taeae e rave no te paruru ia ratou. E piti taeae te haere na mua e ia farerei noa ’tu raua i te tahi taata, e patapata raua i te mori pata. No te faaara ïa i te mau taeae e amo ra i ta ratou mau pute teiaha 100 metera i muri ia tapuni i roto i te aihere. E tiai ratou ia ho‘i mai na taeae o te faahiti mai i te ta‘o o ratou ana‘e tei ite e o te taui i te mau hebedoma atoa. Teie râ, e ere o te mutoi Heremani ahu ninamu ana‘e te fifi.

 Te haamana‘o ra Richard e i te hoê po, ua haere oia i Tekolovakia i muri a‘e roa i to ’na mau taeae. Ua maoro hoi oia no ta ’na ohipa. I roto i te poiri e te rupehu, mea haere ruru noa oia no te ûa toetoe. Moe atura oia i roto i te uru paina nainai e rave rahi hora. Mea rahi te ratere na te mou‘a tei pohe mai tera. I te aahiata noa to ’na farereiraa i to ’na mau taeae e ho‘i maira.

E toru a‘e matahiti i te maoro to teie pǔpǔ iti taeae itoito haereraa na te mau mou‘a i te mau hebedoma atoa. I te tau toetoe, e ta‘ita‘i ratou i ta ratou mau papai Bibilia faufaa roa ma te faahee na nia i te hiona. I te tahi taime, e ao ia haere e 20 taeae i te tahi pae mai o te otia fenua na nia i te mau e‘a faaohipahia e te feia hahaere na te mou‘a. E apee atoa mai te tahi mau tuahine ia hi‘ohia mai ratou mai te mau ratere noa. E haere vetahi o ratou na mua e a ite ai i te tahi fifi atâta, e taora ratou i to ratou taupoo i nia.

Tere atâta no te hiona i nia i te tupuai mou‘a

Eaha te tupu ia ho‘i mai te mau taeae na to ratou mau tere i te po taatoa? E faanahoraa tei ravehia ia opere-oioi-hia te mau papai. E puohuhia te reira mai te huru ra e e pu‘a, a afaihia ’tu ai i te tapearaa pereoo auahi i Hirschberg ia reva ’tu i te mau tuhaa fenua e rave rahi i Heremani. I reira te tahi mau taeae e tuahine e opere atu ai ma te haapao maitai na to ratou mau hoa Kerisetiano mai tei faatiahia i te omuaraa. Ia ite-noa-hia ’tu teie huru opereraa, ua ati ïa. O te ohipa ïa i tupu i te hoê mahana.

I 1936, ua itehia te hoê vahi haapueraa papai i pihai mai ia Berlin. I roto i te mau mea i itehia, te vai ra e toru puohu haponohia mai Hirschberg mai e te tahi taata aita i itehia o vai. Ma te hi‘opoa i te huru papairaa, ite a‘era te mutoi hoê o te mau taeae e haru atura ia ’na. Aita i maoro, e piti atu â tei haruhia, o Richard Rudolph hoê. Aita râ teie mau taeae i faahiti i to ratou mau hoa, o tei tamau â no te hoê taime i to ratou mau tere o te fifi noa ’tura.

HAAPIIRAA NO TATOU

Ua fana‘o te mau Ite no Iehova Heremani e rave rahi papai Bibilia tei afaihia mai na nia te Monts des Géants. E ere râ tera ana‘e te e‘a tei faaohipahia. Tae roa ’tu i 1939, a haru ai te mau nuu Heremani i te fenua Tekolovakia, te vai ra te mau e‘a mai tera te huru na te otia o taua fenua ra. I Farani, Pays-Bas e Helevetia, tapiri mai ia Heremani, ua afai te mau Ite no Iehova i na pae e piti i te maa varua na to ratou mau taeae e tuahine e hamani-ino-hia ra noa ’tu e mea atâta.

I teie mahana, ua rau te papai Bibilia ta te rahiraa o tatou e fana‘o nei. E rave mai paha oe i te hoê papai apî i te Piha a te Basileia aore ra i nia i te reni Internet jw.org. Mea maitai ia feruri oe i tei ravehia e fana‘o ai oe i te reira. Aita paha te mau taeae i na nia mai i te mou‘a hiona i te tuiraa po. Mea rahi râ te taeae e tuahine tei rohi ma te pipiri ore ia fana‘o oe i teie mau papai Bibilia.

^ par. 3 Ua tavini oia i roto i te amuiraa no Hirschberg i Silésie. O Jelenia Góra i teie nei te oire no Hirschberg, i Poronia Apatoa tooa o te râ.