Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

A ARA MAI NA! MATI 2015

 IA AU I TE BIBILIA

Te mauiui

Te mauiui

Te mana‘o nei vetahi o te Atua te tumu e mauiui ai te taata aore ra aita roa oia e tâu‘a maira ia tatou. Tera anei ta te Bibilia e haapii ra? E maere paha oe i te pahonoraa.

O te Atua anei te tumu e mauiui ai tatou?

“E ore mau te Atua e rave i te parau ino.”Ioba 34:12.

TA TE TAATA E PARAU RA

No vetahi, e tupu te mau mea atoa i te hinaaro o te Atua. Te tiaturi nei ïa ratou o ’Na te tumu e mauiui ai tatou. Ia tupu te ati natura, te mana‘o ra ratou tera te ravea ta te Atua e faaohipa ra no te faautua i tei rave i te hara.

TA TE BIBILIA E PARAU RA

E ere te Atua te tumu ia mauiui tatou. Te na ô râ hoi ia faaruru tatou i te mau tamataraa, mea hape ia parau: “Ua haavarehia vau e te Atua.” No te aha? No te mea “e ore roa hoi te Atua e vare i te ino, e ore roa hoi oia e haavare i te taata.” (Iakobo 1:13) E ere te Atua te faatupu ra i to tatou mau fifi aore ra mauiui, mea ino roa hoi ia na reira! Te faaitehia ra te Atua mai tei ore “e rave i te parau ino.”—Ioba 34:12.

Mai te peu e ere te Atua, o vai ïa aore ra no te aha tatou e mauiui ai? Ma te peapea mau, e pinepine te taata i te hamani-ino-hia e te tahi atu taata tia ore. (Koheleta 8:9) Hau atu â, e faaruru paha tatou i te ati no te tahi tupuraa mana‘o-ore-hia. (Koheleta 9:12) Te haapii atoa ra te Bibilia o “te arii o teie nei ao,” Satani te Diabolo, te tumu o te mauiui o te taata no te mea “te vai noa nei to te ao atoa i raro a‘e i taua varua ino ra.” (Ioane 12:31; Ioane 1, 5:19) O Satani ïa te tumu, e ere râ te Atua!

 Te tâu‘a ra anei te Atua i te mauiui o te taata?

“Aroha ’tura to ’na aau i te pohe rahi o Iseraela.”Te mau tavana 10:16.

TA TE TAATA E PARAU RA

Te mana‘o ra vetahi aita te Atua e tâu‘a ra ia fifihia tatou. Ia au i te tahi taata papai buka, aita te Atua e aroha ra ia mauiui tatou. No ’na, mai te peu te vai ra te Atua, e ere ïa oia i te mea tâu‘a i te taata.

TA TE BIBILIA E PARAU RA

E ere roa ’tu te Atua mai tera. Te haapii ra hoi te Bibilia te oto ra oia ia ati tatou e ua fatata roa atoa i te haamou i te mauiui. A hi‘o na e toru haapiiraa Bibilia tamahanahana mau.

Ua ite maitai te Atua to tatou mauiui. Mai te taime matamua i mauiui ai te taata, aita e roimata ta Iehova * i ore i ite no te mea “te hi‘o maira to ’na mata” i te mau mea atoa. (Salamo 11:4; 56:8) I tahito ra, ua ite te Atua a hamani-ino-hia ’i ta ’na mau tavini e ua na ô: “Ua hi‘o papu vau i te pohe o to ’u ra mau taata.” Ua hi‘o noa anei te Atua i to ratou mauiui? Aita, ua na ô faahou Oia: “Ua ite hoi au i to ratou oto.” (Exodo 3:7) Ua tamahanahanahia e rave rahi taata i tera noa parau. Te ite ra hoi te Atua i to tatou mau mauiui atoa tae noa ’tu te mau fifi ta vetahi ê e ore e ite ra aore ra e taa ra.—Salamo 31:7; Maseli 14:10.

Te oto ra te Atua ia mauiui tatou. Aita noa te Atua ra o Iehova i ite i to tatou mauiui, te oto atoa ra râ o ’Na. Ua peapea roa te Atua a fifihia ’i ta ’na mau tavini. Te parau ra te Bibilia: “Aroha ’tura to ’na aau i te pohe rahi o Iseraela.” (Te mau tavana 10:16) Noa ’tu to ’na hau ê, te tâu‘a mau ra te Atua i te feia e mauiui ra! Mai te huru ra o ’na atoa te mauiui ra! E Atua ‘aroha e te hamani maitai rahi’ mau Iehova. (Iakobo 5:11) Hau atu â, te tauturu mai ra Iehova ia faaoromai i te mauiui.—Salamo 121:1, 2.

E faaore te Atua i te mauiui. Ia au i te Bibilia, e faaore te Atua i te mauiui o te taata atoa i nia i te fenua nei. Maoti to ’na Basileia i te ra‘i, e taui roa Iehova i te mau mea atoa. Te fafau ra te Bibilia: “E na te Atua e horoi i to ratou roimata atoa; e e ore roa te pohe, e te oto, e te mihi, e te mauiui, e ore atoa ïa, no te mea ua mou te mau mea tahito ra.” (Apokalupo 21:4) Eaha te tupu no te feia pohe? E faatia mai te Atua ia ratou no te ora i nia i te fenua a oaoa ’tu ai i te oraraa e a muri noa ’tu. (Ioane 5:28, 29) E haamana‘o ra anei te taata i te mauiui ta ratou i faaoromai? Eita, teie hoi ta Iehova e fafau ra: “E ore hoi tei mutaaihora e mana‘ohia, e ore e faatupu-faahou-hia i roto i te aau.”—Isaia 65:17. *

^ par. 13 O Iehova te i‘oa o te Atua i roto i te Bibilia.

^ par. 15 No te ite no te aha te Atua e vaiiho ai i te mauiui e nafea oia ia faaore i te reira, a hi‘o i te pene 8 e 11 o te buka Eaha ta te Bibilia e haapii mau ra? piahia e te mau Ite no Iehova.

No te ite atu â

No te aha te Atua e vaiiho noa ’i i te ino e te mauiui?

Nohea mai te ino, e no te aha te Atua e vaiiho noa ’i i te reira? E ore roa anei te mauiui?

Eaha te Basileia o te Atua?

O vai te arii o te Basileia o te Atua, e eaha ta te Basileia e faatupu?