ARATAIRAA BIBILIA: “O te aroha [aore ra here] o taua tatua nehenehe roa.”—Kolosa 3:14.

TE MAU MAITAI: I roto i te Bibilia, e ere te here te faahinaaro-noa-raa aore ra te mea e tupu ia taoto te tane i te vahine. E itehia râ te here mau ia faaitehia te mau huru maitatai mai te aroha, te faaoreraa hapa, te haehaa, te taiva ore, te hamani maitai, te mǎrû e te faaoromai. (Mika 6:8; Kolosa 3:12, 13) E nehenehe te here mau e rahi roa mai i te roaraa o te tau, area te faahinaaro-noa-raa, e pinepine e ore oioi te reira.

E 30 matahiti faaipoiporaa to Brenda e te na ô ra oia: “Eita e nehenehe e faaau i te here e vai ra i rotopu i te feia no faaipoipo-noa-hia ˈtura i te here o na hoa tei faaipoipohia mea maoro i teie nei.”

Ua hau atu 12 matahiti faaipoiporaa to Sam i teie nei. Ua parau o ˈna: “Ua mauruuru e ua maere noa mâua ta ˈu vahine i te maitai e te ohie o te mau aˈoraa Bibilia! Ia haapao oe i te reira, eita te fifi e tupu. Hinaaro vau e parau e haapao noa vau i te reira, e ere roa ˈtu râ mai tera ia inoino roa vau, ia haapao vau i to ˈu hinaaro aore ra ia rohirohi au. I tera mau taime, e ani au i te tauturu a Iehova no te faaore i te manaˈo ino. I muri iho, e tauahi au i ta ˈu vahine e aita e maoro, afaro faahou mâua!”

Ua faataa Iesu Mesia e itehia te paari i ta ˈna mau ohipa a na ô ai: ‘E faatiahia te paari e ta ˈna ra mau tamarii [“ohipa,” Te Faufaa Api].’ (Mataio 11:19) Ia au i tera mau parau, tei roto te Bibilia te paari mau. Mea maitai hoi te mau haapiiraa e huru maitatai e haafaufaahia ra i roto. Eita te reira e taui i te roaraa o te tau e e tano atoa hoi no te mau pǔpǔ taata e nunaa atoa. Ua faaite maitai te reira i te huru mau o te taata e o vai te tumu o to tatou ora, te Atua poiete ra o Iehova. E itehia râ te paari mau ia haapaohia ta te Bibilia e haapii ra. No reira te Parau a te Atua e faaitoito mai ai ia ‘tamata e ia ite i te maitai o Iehova.’ (Salamo 34:8) E farii anei oe i tera titauraa?