Eaha to roto?

Mau faaho'iraa ê

Tapura tumu parau

Ite no Iehova

Tahiti

A ARA MAI NA! MATI 2015

 UIUIRAA MANA‘O | ANTONIO DELLA GATTA

Ua taui te tahi perepitero i ta ’na haapaoraa

Ua taui te tahi perepitero i ta ’na haapaoraa

UA HAERE Antonio Della Gatta i te haapiiraa i Roma e iva matahiti e ua faatoroahia oia ei perepitero i 1969. I muri a‘e, ua riro oia ei tia faatere o te tahi fare haapiiraa perepitero piri ia Naples i Italia. I reira, ua haapii e ua feruriruri oia i nia i te mau haapiiraa a te mau Katolika e te pae hopea, ua taa aita te reira i niuhia i nia i te Bibilia. Ua faaite oia i te feia e pia ra i te vea A ara mai na! mea nafea to ’na imiraa o vai te Atua.

A faataa mai na, ua paari oe ihea?

Ua fanauhia vau i Italia i 1943. Ua paari au e to ’u mau taeae e tuahine i roto i te tahi oire iti. E taata faaapu e e tamuta to ’u metua tane. Ua haapii to ’u na metua ia matou ia riro ei Katolika itoito.

No te aha oe i hinaaro ai e riro ei perepitero?

I to ’u tamariiraa, mea au roa na ’u ia faaroo i te mau perepitero i te fare pureraa. Ua faahiahia vau i to ratou mau reo e ta ratou mau peu. No reira vau i hinaaro ai e riro ei perepitero. I te 13raa o to ’u matahiti, ua afai to ’u mama ia ’u i te tahi vahi nohoraa no te mau piahi e faaineinehia ia riro ei perepitero.

Ua haapii anei outou i te Bibilia i roto i tera faaineineraa?

I to ’u mana‘o, aita. I te 15raa o to ’u matahiti, ua horoa mai hoê o te mau orometua i te tahi buka no nia i te mau Evanelia o te faatia ra i te oraraa o Iesu e ta ’na taviniraa. Ehia taime to ’u taioraa i te reira! I te 18raa o to ’u matahiti, ua haere au i te haapiiraa teitei i Roma no te mau tia haapaoraa Katolika e tei raro a‘e te reira i te faatereraa a te pâpa. Ua haapii au i te reo Latino, Heleni, te tuatapaparaa o te taata, te philosophia, te ihi feruriraa e te haapiiraa no nia i te Atua. Noa ’tu e tamau aau matou i te mau irava Bibilia e e faaroo atoa i te taioraa o te reira i te mau Tapati atoa, aita matou i haapii mau i te Bibilia.

Eaha mau na ta oe ohipa a riro ai ei tia faatere?

Na ’u e tiaau i te mau ohipa atoa. Ua riro atoa râ vau ei orometua no te faataa i te mau faaotiraa ravehia i te piti o te apooraa a te Vaticana.

No te aha oe i feaa ’i no nia i ta oe haapaoraa?

Ua huru ê au i na ohipa e toru. Ua faaô te ekalesia Katolika i roto i te ohipa poritita. Ua farii noa i te mau peu iino a te pǔpǔ ekalesiatiko, oia atoa a te feia o te paroita. E au ra e mea hape vetahi mau haapiiraa Katolika. Ei hi‘oraa, nafea pai hoê Atua here e nehenehe ai e faautua i te taata e a muri noa ’tu i muri a‘e i to ’na poheraa? Nafea te Atua e farii ai i te mau pure faahiti-noa-hia na nia iho e tamau-aau-hia ma te faaohipa i te tahi korona? *

Eaha ïa ta oe i rave?

Ma te ta‘i, ua pure au. Ua hoo atoa mai hoê Bibilia Katolika pia-apî-hia na roto i te reo Italia e ua haamata i te taio i te reira. (La Bible de Jérusalem) I te tahi Tapati poipoi, a tatara ’i au i to ’u ahu i muri a‘e i te pureraa, haere mai nei e piti Ite no Iehova i te fare o te mau perepitero. Hoê hora hau to matou paraparauraa  no nia i te Bibilia e te mau tapao o te haapaoraa mau.

Eaha to oe mana‘o i tera mau taata?

Mea papu ia faataa i ta ratou mau tiaturiraa e mea aravihi ia faaohipa i te mau irava i roto i te tahi huriraa Bibilia Katolika. Ua faahiahia roa vau ia ratou. I muri a‘e, ua haere mai te tahi atu Ite e farerei ia ’u, o Mario to ’na i‘oa. Mea faaoromai e mea itoito mau oia. I te mau Mahana maa atoa, noa ’tu te ûa e te mahana, e ta‘i mai iho â te ôe o te opani i te hora 9 i te poipoi.

Eaha te huru o te tahi atu mau perepitero?

Ua ani au ia ratou ia amui mai i ta mâua mau aparauraa, aita râ hoê a‘e i haafaufaa i te haapiiraa Bibilia. O vau râ, mea au roa ïa na ’u. Ua haapii au i te mau mea faahiahia mai te tumu e vaiiho ai te Atua ia tupu te ino e te mauiui. Mea maoro hoi to ’u hinaaroraa ia taa i te reira.

Eaha ta to outou mau taata rahi i rave ia faaea oe i te haapii i te Bibilia?

I 1975, ua haere au e rave rahi taime i Roma no te faaite i to ’u mau mana‘o. Ua tamata to matou mau taata rahi i te haaferuri ia ’u, aita râ hoê a‘e i faaohipa i te Bibilia. I te 9 no Tenuare 1976, ua papai au i to Roma no te faaite no ’u e e ere faahou vau i te Katolika. E piti mahana i muri a‘e, ua faarue au i te fare perepitero e ua rave i te tahi pereoo auahi no te haere i te tairururaa. E rave rahi amuiraa tei titauhia-manihini-hia e a tahi ra vau e putuputu ai e te mau Ite no Iehova. I ǒ, mea taa ê roa i ta ’u i matau i te ite. E apee te mau Ite atoa i te taioraa o te mau irava Bibilia a faaroo noa ’i i te mau oreroraa parau no nia i te mau tumu parau e rave rau.

Eaha te huru o to oe fetii?

Ua patoi u‘ana mai te rahiraa o ratou ia ’u. Ua faaroo râ vau ua haapii hoê o to ’u mau taeae e te mau Ite i Lombardie, te tahi oire i te pae apatoerau i Italia. Ua haere au e farerei ia ’na e ua tauturu mai te mau Ite o tera vahi ia imi i te ohipa e hoê nohoraa. I tera matahiti au i bapetizohia ’i ei Ite no Iehova.

I teie nei, e taairaa piri mau to ’u e te Atua

Ua tatarahapa anei oe?

Aita roa ’tu! I teie nei, e taairaa piri mau to ’u e te Atua. Maoti hoi te Bibilia, eiaha râ te philosophia aore ra te haapaoraa, ua ite au o vai te Atua. E nehenehe atoa vau e haapii ia vetahi ê ma te papu e te haavare ore.

^ par. 13 Te faaite ra te Bibilia i te mau pahonoraa papu o teie mau uiraa e te tahi atu. A pata i nia NO NIA IA MATOU > UIRAA A TE TAATA.