Faatanoraa no te "mode accessibilité"

Search

Maiti te reo

Mau faaho'iraa ê

Tapura tumu parau

Eaha to roto?

Ite no Iehova

Tahiti

A ARA MAI NA! MATI 2015

 TAUTURU NO TE UTUAFARE | NO TE METUA

E uiraa ta to tamarii no nia i te pohe

E uiraa ta to tamarii no nia i te pohe

TE FIFI

Te ani atura ta oe tamarii e ono matahiti: “E pohe anei oe hoê mahana?” Ua maere oe i ta ’na uiraa e ua feruri: ‘E taa anei ta ’u tamarii ia faataa ’tu vau? Nafea ia paraparau ia ’na no nia i te pohe?’

TE TIA IA ITE

Ua ite te tamarii i te parau o te pohe. I roto vetahi mau hautiraa, e haavare pohe te tahi taata. No reira, eiaha ia taiâ i te aparau no nia i tera tumu parau e te pahono i te mau uiraa atoa a to tamarii. Ma te na reira, te tauturu ra oe ia ’na ia ite nafea ia faaoromai ia pohe tei herehia.

Eita to tamarii e riaria ia aparau oe ia ’na no nia i te pohe. Ua hape ana‘e râ to ’na mana‘o, e titauhia ia faataa maitai i te parau mau. Ua na ô vetahi feia îite e mana‘o e rave rahi tamarii i raro a‘e ono matahiti e tamau noa te feia pohe i te ora. I roto i ta ratou mau hauti, ua pohe ana‘e hoê tamarii, e ora faahou mai oia i muri a‘e.

Ia paari rii a‘e ratou, e haamata te tamarii i te taa mea mauiui mau ia pohe te taata. Mea rahi ïa ta ratou uiraa, haapeapearaa peneia‘e atoa e mǎta‘u ratou, ia pohe iho â râ tei herehia. Mea faufaa roa ïa ia aparau no nia i te reira? Te faaite ra te taote i te pae feruriraa o Marion Haza te i‘oa: “Ia ite te tamarii eita e nehenehe e aparau no nia tera tumu parau i te fare, e riaria o ’na i te pohe.”

Eiaha e haapeapea roa ino no nia i ta oe e parau. Ia au i te tahi hi‘opoaraa, e hinaaro noa te tamarii ia “faaitehia ’tu te parau mau ma te mǎrû.” Ua ui ana‘e atu ta oe tamarii, ua ineine ïa oia i te faaroo i te pahonoraa.

 EAHA TE RAVE?

A aparau no nia i te pohe ia au i te tupuraa. Ia ite to tamarii ua pohe hoê manu i te pae purumu aore ra hoê animara ta outou i faaamu, a faaohipa i te mau uiraa ohie no te faaitoito ia ’na ia faaite i to ’na mana‘o. Ei hi‘oraa, e ani paha oe: “Te mauiui ra anei tera animara? Te toetoe aore ra te poia ra anei oia? Nafea ia ite ua pohe iho â te animara aore ra taata?”—Aratairaa Bibilia: Koheleta 3:1, 7.

A faaite i te parau mau. Ia pohe hoê taata ta outou i matau aore ra fetii, eiaha e faahiti i te mau parau mai teie te huru: “Ua haere oia.” E mana‘o paha te tamarii e ho‘i mai oia i te fare. A faaohipa i te mau parau ohie ia taa e eiaha e haavare atu. E na ô paha oe: “I to mama ruau poheraa, ua faaea o ’na i te huti i to ’na aho. Eita e nehenehe faahou e paraparau ia ’na, eita râ o ’na e moehia e tatou.”—Aratairaa Bibilia: Ephesia 4:25.

I te mea e nehenehe te tamarii e mana‘o e pohe atoa te tahi atu, a tamahanahana ia ’na ma te parau eita o ’na e faaruehia e to ’na utuafare

A tamahanahana i ta oe tamarii. E mana‘o paha oia e o ’na te tumu i pohe ai te taata. Eiaha e pahono noa: “E ere oe te tumu.” A ui atu râ: “No te aha oe e mana‘o ai mai tera?” A faaroo maitai i ta ’na pahonoraa, eiaha e haafaufaa ore i ta ’na e faaite atu no nia i to ’na huru. I te mea e nehenehe te tamarii e mana‘o e pohe atoa te tahi atu, a tamahanahana ia ’na ma te parau eita o ’na e faaruehia e to ’na utuafare.

A turai i to tamarii ia paraparau. Eiaha e taiâ i te paraparau no te mau taata herehia tei pohe noa ’tu aita oia i farerei a‘enei ia ratou. E faahiti paha oe ta oe e haamana‘o ra no nia i te tahi fetii piri e e faatia atoa paha i te tahi mau ohipa arearea no nia ia ratou. E taa to tamarii aita i anihia eiaha ia aparau aore ra ia mana‘o ia ratou. Ia ore râ o ’na ia hinaaro ia paraparau, e nehenehe e faataa i te tahi atu taime no te na reira. E ite iho â oe eaha te taime maitai a‘e no ’na.—Aratairaa Bibilia: Maseli 20:5.

E tauturu te pene 34 e 35 o te buka Écoute le grand Enseignant i to tamarii ia taa eaha ta te Bibilia e haapii ra no nia i te pohe. A pata i nia PUBLICATIONS > LIVRES & BROCHURES