Eaha to roto?

Mau faaho'iraa ê

Tapura tumu parau

Ite no Iehova

Tahiti

E nehenehe oe e riro ei hoa no te Atua!

 HAAPIIRAA 10

Nafea e itehia ’i te haapaoraa mau?

Nafea e itehia ’i te haapaoraa mau?

Mai te peu e e hinaaro oe e riro ei hoa no te Atua, e tia ia oe ia faaohipa i te haapaoraa fariihia e te Atua. Ua parau Iesu e e haamori “te feia haamori mau” i te Atua ia au maite i te “parau mau.” (Ioane 4:23, 24) Hoê ana‘e iho ravea tano no te haamori i te Atua. (Ephesia 4:4-6) E aratai te haapaoraa mau i te ora mure ore e e aratai te haapaoraa hape i te haamouraa.—Mataio 7:13, 14.

E nehenehe oe e ite mai i te haapaoraa mau ma te hi‘opoa i te taata e pee ra i te reira. E Atua maitai o Iehova, te feia e haamori mau ra ia ’na, ei feia maitatai e tia ’i. Mai te hoê tumu anani e faahotu ra i te mau anani maitatai, e faariro atoa te haapaoraa mau i te taata ei taata maitai.—Mataio 7:15-20.

E faatura rahi te mau hoa o Iehova i te Bibilia. Ua ite ratou e no ǒ mai te Bibilia i te Atua ra. E vaiiho ratou i ta ’na parau ia aratai i to ratou oraraa, ia faaafaro i to ratou mau fifi e ia tauturu ia ratou ia haapii no nia i te Atua. (Timoteo 2, 3:16) Te tutava nei ratou i te pee i ta ratou e poro ra.

E faaite te mau hoa o Iehova i te here te tahi i te tahi. Ua faaite Iesu i to ’na here no te taata ma te haapii atu ia  ratou i te parau no nia i te Atua, ma te faaora i tei roohia i te ma‘i. E faaite atoa te feia e pee ra i te haapaoraa mau i to ratou here no vetahi ê. Mai ia Iesu, eita ratou e faahaehaa i te feia veve aore ra no te tahi atu pǔpǔ reo ê. Ua parau Iesu e e ite te taata i ta ’na mau pǐpǐ maoti te here ta ratou e faaite te tahi i te tahi.—Ioane 13:35.

E faahanahana te mau hoa o te Atua i te i‘oa o te Atua, Iehova. Ia ore te hoê taata e faahiti i to oe i‘oa, e riro anei oia ei hoa rahi no oe? Eita! E hoa ana‘e to tatou, e faahiti tatou i to ’na i‘oa e e parau tatou ia vetahi ê i te mau mea maitatai no nia i teie hoa. No reira, e faahiti te feia e hinaaro nei e riro ei hoa no te Atua i to ’na i‘oa e e paraparau ratou ia vetahi ê no nia ia ’na. Te hinaaro nei Iehova ia na reira tatou.—Mataio 6:9; Roma 10:13, 14.

Mai ia Iesu, e haapii te mau hoa o te Atua i te taata no nia i te Faatereraa arii a te Atua. Te Faatereraa arii a te Atua, o te faatereraa ïa i te ra‘i o te faariro i te fenua ei paradaiso. E faaite atu te mau hoa o te Atua i teie parau apî maitai no nia i te Faatereraa arii a te Atua ia vetahi ê.—Mataio 24:14.

Te tutava nei te mau Ite no Iehova ia riro ratou ei hoa no te Atua. Te faatura ra ratou i te Bibilia e te vai ra te here i rotopu ia ratou. Te faahiti ra e te faahanahana atoa ra ratou i te i‘oa o te Atua e te haapii ra ratou no nia i te Faatereraa arii a te Atua ia vetahi ê. Te pee ra te mau Ite no Iehova i te haapaoraa mau i te fenua nei i teie mahana.