Eaha to roto?

Mau faaho'iraa ê

Tapura tumu parau

Ite no Iehova

Tahiti

E nehenehe oe e riro ei hoa no te Atua!

 HAAPIIRAA 18

Ia riro oe ei hoa no te Atua e a muri noa ’tu!

Ia riro oe ei hoa no te Atua e a muri noa ’tu!

E tia ia tutava oe ia ite mai i te hoê hoa e ia vai noa tera auhoaraa. E haamaitai-rahi-hia ta oe mau tutavaraa ia riro e ia vai noa mai oe ei hoa no te Atua. Ua na ô Iesu i tei tiaturi ia ’na: “Na te parau mau e faatiamâ ia outou.” (Ioane 8:32) Eaha ïa te auraa o tera parau?

E nehenehe oe e tiamâ i teie nei â. E nehenehe oe e tiamâ mai i te mau haapiiraa hape e te mau haavare i haapararehia e Satani. E nehenehe oe e tiamâ mai i te hepohepo ta te mau mirioni taata tei ore i ite no nia ia Iehova e faaruru ra. (Roma 8:22) Ua tiamâ atoa te mau hoa o te Atua i te “mǎta‘u i te pohe.”—Hebera 2:14, 15.

E nehenehe oe e fana‘o i te tiamâraa i roto i te ao apî a te Atua. Auê ïa tiamâraa faahiahia mau ta oe e fana‘o a muri a‘e! I roto i te paradaiso i te fenua nei, e tiamâ mai tatou i te tama‘i, te ma‘i, e te taparahiraa taata. E tiamâ mai tatou i te veve e te poia. E tiamâ mai tatou i te ruauraa e te pohe. E tiamâ mai tatou i te mǎta‘u, te haavîraa, e te parau-tia ore. Te parau ra te Bibilia no nia i te Atua: “Te heheu nei oe i to rima, e te haamâha nei i te hiaai o te mau mea ora atoa nei.”—Salamo 145:16.

 E ora te mau hoa o te Atua e a muri noa ’tu. E ô faufaa roa te ora mure ore ta te Atua e horoa ’tu na te feia atoa e imi i to ’na auhoaraa. (Roma 6:23) A feruri na i te auraa no oe te ora mure ore!

E taime roa to oe no te rave e rave rahi mea. E hinaaro paha oe e haapii i te faata‘i i te hoê upaupa. E hinaaro paha oe e haapii i te peni i te hoho‘a aore ra e riro mai ei tamuta. E hinaaro paha oe e haapii no nia i te mau animara aore ra te mau raau tupu. Aore ra e hinaaro paha oe e ratere e e mataitai e rave rau fenua e nunaa. E nehenehe oe e rave i teie mau mea atoa ia noaa ia oe te ora mure ore!

E taime roa to oe no te faahoa ’tu i e rave rahi taata. I te oraraa e a muri noa ’tu, e nehenehe oe e faahoa i e rave rahi taata tei riro ei hoa no te Atua. E nehenehe oe e ite i to ratou aravihi e to ratou mau huru maitatai, e e hoa atoa ïa ratou no oe. E here oe ia ratou e e here mai ratou ia oe. (Korinetia 1, 13:8) I te oraraa e a muri noa ’tu, e taime roa to oe no te faahoa i te taata atoa o te fenua! Te mea maitai roa ’‘e, e riro to oe auhoaraa e te Atua i te piri roa i te roaraa o te mau senekele. Ia riro mau â oe ei hoa no te Atua e a muri noa ’tu!