Fetela kwa tshedimosetsong

Fetela go diteng

“Disang Letsomane la Modimo”

“Disang Letsomane la Modimo”

 “Tlang Mo go Nna, . . . Mme ke Tla lo Lapolosa”

“Disang Letsomane la Modimo”

“Ka metlha lo iketleeditse go re sekegela tsebe le go re kgothatsa ka mafoko a a tswang mo Baebeleng.”—Pamela.

“Re lebogela dilo tsotlhe tse lo re direlang tsone. Ruri seno se botlhokwa thata mo go rona.”—Robert.

PAMELA le Robert ba ne ba tlhotlheletsega go kwala mafoko ano go bontsha gore ba anaanela bagolwane ba Bakeresete ba ba leng mo diphuthegong tsa bone. Ba bangwe mo gare ga batlhanka ba Modimo mo lefatsheng lotlhe le bone ba lebogela thuso le tlhokomelo e ba nnang ba e newa ke ba ba “disang letsomane la Modimo.” (1 Petere 5:2) Eleruri, batho ba ga Jehofa ba lebogela dilo di le dintsi tse bagolwane ba ba direlang tsone le tsela e ba di dirang ka yone.

‘Ba na Le mo Gontsi go go Dira’

Bagolwane ba Bakeresete ba neilwe maikarabelo a mantsi. (Luke 12:48) Ba baakanyetsa dipuo tsa dipokano tsa phuthego le go nna le seabe mo tirong ya go rera dikgang tse di molemo tsa Bogosi Jwa Modimo phatlalatsa. Ditiro tsa bone di akaretsa go etela badumedi ka bone ka maeto a bodisa. Bagolwane ba ipha nako ya go thusa ba ba tshwanelwang ke go tlhokomelwa ka tsela e e kgethegileng—bagodi le ba bangwe—mme ba dira jalo ba sa tlhokomologe gore ba tshwanetse go tlhokomela bomoya jwa ba malapa a bone le go ba tlamela mo nameng. (Jobe 29:12-15; 1 Timotheo 3:4, 5; 5:8) Bagolwane bangwe ba thusa mo tirong ya go aga Diholo Tsa Bogosi. Ba bangwe ba direla mo Dikomiting Tsa Puisano le Dikokelo kgotsa ke maloko a Ditlhopha Tse di Etelang Balwetse. Mme bontsi jwa bone bo ithaopela go bereka kwa dikopanong tse dinnye le tse dikgolo. Ee, bagolwane ba na le “mo gontsi go go dira mo tirong ya Morena.” (1 Bakorintha 15:58) Ga go gakgamatse go bo bagolwane bano ba ba dirang ka natla jaana ba anaanelwa thata ke batho ba ba ba neetsweng go ba tlhokomela!—1 Bathesalonika 5:12, 13.

Bagolwane ba ka metlha ba etelang Bakeresete ka bone kwa gae kgotsa gongwe le gongwe kwa ba leng teng gore ba ba nonotshe semoyeng ba a kgothatsa eleruri. Thomas yo o goletseng mo legaeng le le se nang rre a re: “Fa e ne e se ka thuso e e lorato ya bagolwane le kgothatso ya bone, ga ke bone gore nka bo ke direla Jehofa ke le modiredi wa nako e e tletseng gompieno.” Basha ba le bantsi ba ba goletseng mo malapeng a motsadi a le mongwe fela ba bolela gore tlhokomelo e ba e neetsweng ke bagolwane e ba thusitse gore ba nne le kamano le Modimo.

Bagodi mo phuthegong le bone ba anaanela maeto a bodisa fela thata. Banyalani bangwe ba barongwa ba ba mo dingwageng tsa bo80 ba ne ba kwala jaana fa ba sena go etelwa ke bagolwane ba  babedi: “Re batla go lo bolelela gore re anaanetse loeto lwa lona fela thata. Fa lo sena go tsamaya, re ne ra bala gape ditemana tse lo neng lwa di tlotla le rona. Le ka motlha re ka se lebale mafoko a lona a kgothatso.” Motlholagadi mongwe wa dingwaga tse 70 o ne a kwalela bagolwane jaana: “Ke ntse ke rapelela thuso kwa go Jehofa mme o ne a nthomelela lona bakaulengwe ba babedi. Loeto lwa lona e ne e le tshegofatso ya ga Jehofa!” A o ile wa solegelwa molemo bosheng jaana ke go etelwa ke bagolwane ba phuthego ya lona? Ee ruri, rotlhe re anaanela maiteko a bone a go disa letsomane le ba le neilweng gore ba le tlhokomele!

Badisa ba ba Etsang Modimo le Keresete

Jehofa ke Modisa yo o lorato. (Pesalema 23:1-4; Jeremia 31:10; 1 Petere 2:25) Jesu Keresete le ene ke Modisa yo o tlhomologileng yo o re tlhokomelang ka dilo tsa semoya. E bile tota, o bidiwa “modisa yo o molemo” le “modisa yo mogolo.” (Johane 10:11; Bahebera 13:20; 1 Petere 5:4) Jesu o ne a tshwara jang batho ba ba neng ba batla go nna barutwa ba gagwe? O ne a ba laletsa jaana ka lorato: “Tlang mo go nna, lona lotlhe ba lo dirang ka natla le ba lo imelwang, mme ke tla lo lapolosa.”—Mathaio 11:28.

Gompieno bagolwane le bone ba leka go lapolosa le go sireletsa letsomane. Banna bano ba “nna jaaka lefelo la go iphitlhela phefo le lefelo la go iphitlhela pula ya matsubutsubu, jaaka melatswana ya metsi mo nageng e e se nang metsi, jaaka moriti wa lefika le legolo thata mo lefatsheng le le omileng.” (Isaia 32:2) Basireletsi bano ba ba pelonomi ba a lapolosa, ba tlotlwa ke letsomane e bile ba amogelwa ke Modimo.—Bafilipi 2:29; 1 Timotheo 5:17.

Tshegetso e e Molemo ya Basadi ba Bone

Batho ba Modimo ba anaanela bagolwane ba Bakeresete le tshegetso e e lorato e banna bano ba e newang ke basadi ba bone. Gantsi basadi bano ba tlhoka go itima dilo dingwe gore ba tshegetse banna ba bone. Ka dinako tse dingwe ba a bo ba le kwa gae fa banna ba bone ba dira dilo tsa phuthego kgotsa ba dira maeto a bodisa. Mo makgetlhong a mangwe fa go tlhaga bothata bongwe jo bo tlhokang go baakanngwa ka potlako mo phuthegong ba fetola dithulaganyo tsa bone tse ba di dirileng ka kelotlhoko. Michelle a re: “Le fa go ka nna jalo, fa ke bona kafa monna wa me a tshwaregileng ka teng a baakanyetsa dipokano kgotsa a dira maeto a bodisa, ke nna ke gopotse gore o dira tiro ya ga Jehofa, mme ke leka go mo tshegetsa ka mo nka kgonang ka teng.”

Cheryl yo le ene a nyetsweng ke mogolwane o ne a re: “Ke a itse gore bakaulengwe le bokgaitsadi mo phuthegong ba tlhoka bagolwane ba ba ka buang le bone, mme ke batla gore ba ikutlwe ba gololesegile gore ba bue le monna wa me nako nngwe le nngwe fa ba mo tlhoka.” Basadi ba ba nang le tshegetso ba ba jaaka Michelle le Cheryl, ba itima dilo dingwe ka go rata, e le gore banna ba bone ba kgone go tlhokomela dinku tsa Modimo. Basadi ba bagolwane ba a anaanelwa ka ntlha ya go rata go tshegetsa ga bone.

Le fa go ntse jalo, mogolwane yo o dirang ka natla ga a tshwanela go tlhokomologa dilo tse mosadi wa gagwe le bana ba di tlhokang, tsa semoya le tse dingwe. Mogolwane yo o nyetseng o tshwanetse go nna motho “yo go se nang se a latofadiwang ka sone, monna wa mosadi a le mongwe, a na le bana ba ba dumelang ba sa latofadiwe ka botlhapelwa le gone e se ba ba sa laolesegeng.” (Tito 1:6) O tshwanetse a tlhokomela lelapa la gagwe ka tsela e e siameng e Dikwalo di laelang balebedi ba Bakeresete gore ba dire ka yone.—1 Timotheo 3:1-7.

Mogolwane yo o dirang ka natla o tsaya mosadi wa gagwe yo o mo tshegetsang a le tlhwatlhwakgolo! Eno ke tsela e bagolwane ba ba nyetseng ba ba lorato ba ikutlwang ka yone. Ke fela jaaka Baebele e re: “A motho o bone mosadi yo o molemo? O bone selo se se molemo.” (Diane 18:22) Bagolwane bano ba bontsha gore ba anaanela basadi ba bone go tswa pelong ka se ba se buang le ka ditiro. Kwa ntle ga go rapela ka tlhoafalo le go ithuta mmogo ka tsela e e monate, banyalani bano ba Bakeresete ba seegela nako kwa thoko gore ba itumelele dilo tse di jaaka go tsamaya fa lotshitshing lwa lewatle, go tsamaya mo sekgweng kgotsa go iphokisa phefo mo phakeng. Ee, bagolwane ba itumelela go tlhokomela basadi ba bone ka lorato.—1 Petere 3:7.

Bagolwane ba ba disang letsomane la Modimo ka bopelotshweu ba lapolosa batho ba ga Jehofa semoyeng. Ruri ke “dimpho tse e leng banna,” tshegofatso mo phuthegong!—Baefeso 4:8, 11-13.