Lumilitaw na ito ang pangalan ng isang lugar na may malaking imbakang-tubig kung saan nagtanong si Saul tungkol sa kinaroroonan nina David at Samuel. (1Sa 19:21, 22) Ang Secu ay malapit sa Rama, ngunit hindi alam sa ngayon kung saan ang eksaktong lokasyon nito. Sa halip na gumamit ng pangalang pantangi na “Secu,” mas pinapaboran ng ilang iskolar, bilang pagsunod sa ilang manuskritong Griego at Latin, ang mga pananalitang gaya ng “ang giikan sa [mataas na dako ng] hantad na burol.”​—JB, AT.