Nehemia 6:1-19
6 Nahan Sanbalati man Tobia+ man Geshem Orarabia,+ kua mbahyomov asev mbagenev mbara cii, mba ongo ér m hide m maa girgar la m bee+ shi aan kpa kera nga ga yô (shin er m lu a zer ikpande-ihinda sha ihindagar la hen shighe ne ga nahan kpaa),+
2 fese je Sanbalati man Geshem tindi loho hen a mo ér: “Va se ver shighe u se zua hen agar a a lu shin Pev u Lun Gburumaa u Ono la.”+ Kpa ve lu keren gbenda u bulan mo.
3 Nahan m tindi mbatyomov hen a ve m kaa mer: “M ngu eren zegetom ave, nahan me fatyô u van ga. M undu tom m va hen ven mer tom la u tile?”
4 Shi ve hide ve tindim a loho shon ne môm kwa nyiin, man hanma kwa yô m na ve mlumun shon môm.
5 Tsô Sanbalati hide tindi ortom na hen a mo sha kwa taan a loho shon ne môm, shi lu a washika u ivegher ken uwe.
6 I nger ker ér: “I ungwa ken akuraior, shi Geshem+ kpa ngu ôron, ér we man Mbayuda ne mba wan ishima u hemban ato.+ Ka nahan man ne lu maan girgar ne ye. Man sha kwagh u i lu ôron la yô, ka u u hingir tor ve.
7 Shi u tsua uprofeti u ver sha u ve yôô kwagh wou ken Yerusalem cii ér, ‘Tor ngu ken Yuda!’ Nahan yô ka u a za ôr tor akaa ne. Yô va, se lam sha kwagh ne imôngo.”
8 Nahan kpa m hide m tindi un a loho ne mer: “Akaa a u lu ôron ne cii kwagh môm er nahan ga; ka we u lu henen a ken ishima you nahan ye.”
9 Gadia ve cii ve lu nôngon ér vea ta se mciem iyol, ve lu kaan ér: “Ave aa kpe ve sha tom ne, nahan a kera er u ga.”+ Yô, m ngu sônon mer, Aôndo, taver mo ave.+
10 Maa m za hen ya u Shemaia wan u Delaia wan u Mehetabel, hen shighe la lu duen ken won ga. A kaa a mo ér: “De se ver shighe u se zua hen iyou i Aôndo u mimi ken atô tempel yô, shi se wuhe ihinda i tempel kpaa, gadia mba van vea va wua u. Mba van tugh vea va wua u.”
11 Kpa m kaa a na mer: “Doo u or er mo nahan nana yevese? Or er mo nahan nana fatyô u nyôron ken tempel shi lun uma heree?+ Me nyôr ker ga!”
12 Maa m mase kaven er lu Aôndo tindi un ga yô. Kpa lu ôron kwaghôron u profeti u bo ne sha iyol yam sha ci u Tobia man Sanbalati+ na un inyaregh ér a er nahan.
13 Yange i kimbi un inyaregh ér a tam mciem iyol shi a na m er isholibo, sha er vea zua a ityôkyaa i vihin mo iti nahan vea heem yô.
14 Aôndo wam, de hungur a kwagh u Tobia+ man Sanbalati man akaa a yange ve er a mo la ga, shi umbur kwagh u profeti u kwase Noadia man uprofeti mbagenev mba yange ve lu nôngon hanma shighe ér vea tam mciem iyol la cii.
15 Yange i maa girgar la cii i bee ken uwer u Elul* ayange 25, i maa un ayange 52.
16 Mbahyomov asev cii mba ongo kwagh ne, shi akuraior a a wa ndor a vese la cii nga nengen a kwagh ne yô, kunya kôr ve a ayol a ve kpishi,*+ nahan ve mase kaven er lu sha iwasen i Aôndo wase man se er tom ne zan zan se kar been yô.
17 Sha ayange la, ashagbaaior+ a ken Yuda a shi tindin Tobia a uwashika, shi Tobia kpa a tindin ve a mi.
18 Mbayuda kpishi yange ve bum ér vea lu ken bem a na, sha ci u lu wankem u Shekania wan u Era,+ shi wan na u nomso Yehohanan kpa za vôso wan u Meshulam,+ wan u Berekia.
19 Shi yange ve shi ôron mo akaa a dedoo sha iyol na, shi ve hide ve za ôr un kwagh u mo di m ôr yô. Tobia maa a gba tindin a uwashika mba tan mo mciem iyol.+
Ngeren mba shin kpe
^ Nenge Ngeren u Seer u B15 la.
^ Shin “ve hee kpishi.” Zwa Heberu, “sha ashe a ve yô ve nenge ér ve gba kputu.”
