Nehemia 5:1-19
5 Nahan kpa, Mbayuda mbagen kua kasev vev lu vaan tsung sha kwagh u ieren i anmgbianev vev.+
2 Mbagen lu kaan ér: “Se man ônov asev mba nomso man mba kasev se ngee iyenge. A gba u se zua a samuyia keng se ya se lu uma.”
3 Mbagen di lu kaan ér: “Se mba geman ishule yase man ikyon yase i wain kua uya asev tan ityumbu sha er se zua a samuyia yô, gadia kwaghyan ngu banen.”
4 Mbagenev di shi lu kaan ér: “Se tôô ishule yase kua ikyon yase i wain se ta ityumbu sha er se zua a inyaregh ki tan tor kpandegh yô.+
5 Nenge ase yô, se vea anmgbianev asev se mba iyol i môm, shi ônov asev kpa mba er ônov vev nahan. Nahan kpa gba u se gema ônov asev mba nomso man mba kasev se na ken kpan, man ônov asev mba kasev mbagen vande mban ikpan.+ Kpa se mba a tahav mbu yangen kwagh ne ga, sha ci u ishule yase man ikyon yase i wain cii ngi sha ikyev i mbagenev.”
6 M ongo mliam vem man akaa a ve ôr ne yô ishima vihim ker kpishi.
7 Nahan m hen sha akaa ne zulee, shi m zôhô a ashagbaaior kua imuetor m kaa a ve mer: “Hanmô wen ngu keren mtsera hen anmgbian u nan.”*+
Tsô m lôhô mkohol u vesen sha ci u kwagh u ve er la.
8 Maa m kaa a ve mer: “Se nôngo sha afatyô wase cii, se yam anmgbianev asev Mbayuda mba yange i tee akuraior la; nahan kpa ne hide ne tee anmgbianev eneve?+ Shi a gba u se hide se yam ve hen a vene?” Maa ve huan ving, ve kera fa kwagh u vea ôr ga.
9 Tsô m kaa a ve mer: “Kwagh u ne lu eren ne doo ga. Hemba doon u ne eren akaa a tesen ér ne mba cian Aôndo wase,+ sha er a hemba akuraior a a lu mbahyomov asev la u lahan se ga zee?
10 Bee kera yô, mo man anmgbianev av kua mbaeren mo tom, se mba nan ve injô i inyar kua samuyia a u keren mtsera sha mi shio. Nahan se de nen ieren i nan injô keren mtsera sha mi la.+
11 Nea lumun yô, hide nen ve a ishule ve nyian,+ kua ikyon ve i wain man i olev kua uya vev kua môm-ken-deri u inyar man u samuyia man u wain kua u mkure, u ne ngohol hen ve ér ka mtsera la.”*
12 Tsô ve kaa ér: “Se hide ve a hanma kwagh cii, se kera ker ma kwagh hen ve ga. Se er vough er u kaa nahan.” Maa m yila upristi ve va er ior mbara bum ér vea er kwagh u ve tende zwa la.
13 Shi m nduur ikyondo yam,* m kaa mer: “Hanma or u nan er sha ityendezwa ne ga cii kape Aôndo u mimi una nduur nan hen ya u nan kera kua hen akaa a nan kera je ne, shi kape una nduur nan nana hingir aveve je ne.” Nahan ior mbara cii ve kaa ér: “Amen!”* Shi ve wuese Yehova. Nahan ior er kwagh u ve tôndo zwa la.
14 Heela tseegh ga, hii sha iyange i i verem ér m lu gomna+ u tar u Yuda la, hii ken inyom i sha 20+ zan zan inyom i sha 32+ i Tor Artashaseta+ la cii, ka anyom 12 je la, iyange i môm mo shin anmgbianev av se ya kwaghyan u gba u a naan gomna la ga.+
15 Kpa ugomna mba ngise mba ve lu cii ve mo la yô, yange ve wa ior mbara ikyav sha u ngohol ushekel* mba azurufa 40 hanma iyange, sha ci u beredi man wain. Shi mbatomov vev kpa yange ve kighir ior. Kpa mo m er nahan ga,+ sha ci u m cian Aôndo.+
16 Heela tseegh ga, mo kpa yange m lu uwegh ken tom u maan girgar ne, mbatomov av cii yange ve kohol her sha u eren tom la; shi se lu a inya kpaa ga.+
17 Mbayuda mba yan kwagh sha tebul wam yange ve lu 150, kua imuetor man ior mba ve mough ken akuraior agen ve va hen a vese yô.
18 Hanma iyange yô m kaa* i wuam nombua kua iyôngo i dindim dindim ataratar man ikyegh,* shi ayange aa karen pue yô, m kaa i va se a hanma inja wain kpishi. Nahan cii kpa m sendegh mer i naan mo kwaghyan u gba u a naan gomna la ga, sha ci u ior vande tôôn ikyav kpishi.
19 Aôndo wam, umbur mo, er a mo doo doo* sha ci u akaa a m er sha ci u ior mban la cii.+
Ngeren mba shin kpe
^ Shin “ngu nan anmgbian u nan injô ngohol mtsera karen ikyaa inya.”
^ Ka kwagh u ve ngohol hanma uwer je la.
^ Zwa Heberu, “ikyum yam.”
^ Shin “I̱ lu nahan.”
^ Shekel môm yange a yuhwa i kuma ugeram 11.4. Nenge Ngeren u Seer u B14 la.
^ Shin “m na inyaregh.”
^ Zwa Heberu, “inyon.”
^ Shin “umbur mo sha kwagh u dedoo.”
