Nehemia 4:1-23
4 Yange Sanbalati+ ungwan ér se mba hiden maan girgar la nahan maa, ishima gba vihin un tsung, doo un ga kpishi. Tsô a gba nahan Mbayuda tar.
2 A ôr kwagh sha ishigh ki anmgbianev nav, kua ikyumutya i Samaria a kaa ér: “Ka nyi Mbayuda mba lun a mpe iyol ga mban ve lu erene? Vea fatyô u eren kwagh ne ayol a vee? Vea fatyô u nan iniava? Vea fatyô u been kwagh ne ken iyange i mômô? Vea fatyô u dughun awen a hian shin alôgh a a lu mtuhwem mtuhwem ne maan kwagh a mini?”+
3 Tsô Tobia+ Oramon+ u tile dondo vea na la kaa ér: “Aluer icôngo je kpa unde sha girgar u sha awen u ve lu maan la yô una yôhôr a haa inya.”
4 Aôndo wase, ungwa er ve lu lahan se yô,+ shi na ilyahan la i hide sha ityouv vev,+ shi na ve hingir kwagh u yan ishar sha mi ken tar u a yem a ve uikyangen ker la.
5 De cirin ibo ve shin koughun asorabo a ve sha ishigh you kera ga,+ gadia ve tuhwa mbamaankwagh.
6 Nahan se za hemen u maan girgar la, i maa girgar la cii i zua, tav gba hen atôatô, shi ior cii za hemen u eren tom la a ishima ve i môm.
7 Tsô Sanbalati man Tobia+ man Mbaarabia+ man Mbaamon kua Mbaashedodi+ mba ongo ér tom u sôron girgar u Yerusalem la ngu zan hemen, shi mba kondon aan a a pev la yô, ishima vihi ve ker kpishi.
8 Nahan ve zua zwa ér vea va ta num sha Yerusalem shi vea va a anzughul ker.
9 Kpa se er msen hen Aôndo wase, shi se ver ior mba kuran se tugh man atetan sha u ve de eren se kwagh ga yô.
10 Nahan kpa, ior i Yuda lu kaan ér: “Mbatomov* vôr, shi alôgh kpa ngee, mayange se fatyô u maan girgar ne ga.”
11 Mbahyomov asev di lu kaan ér: “Cii ve ve fa shin ve nenge a vese nahan, se nyôr ken atô ve se wua ve, nahan tom la ua tile.”
12 Hanma shighe u Mbayuda mba ve lu ikyua a ve la vea va yô, ve zer kaan a vese kwa kimbir kimbir* ér: “Vea va hanma vegher cii vea va ta num sha a vese.”
13 Nahan m ver nomso hen ajiir a hemban gban pev a a lu ken igbar ken ijime i girgar la, m ver ve sha icombor ve, ve kôr usanker kua awange man mbaada vev.
14 M nengen er mciem gba ve iyol yô, fese je m mough sha m kaa a ashagbaaior+ man imuetor kua ior cii mer: “De cie nen ve ga.+ Umbur nen kwagh u Yehova u a hembe cii shi a te ihindi iyol la;+ nahan nôngo nen kwagh sha ci u anmgbianev enev man ônov enev mba nomso man mba kasev, kua kasev enev man uya enev.”
15 Tsô mbahyomov asev za ungwa ér se fa kwagh u ve lu eren la, shi ve fa er Aôndo u mimi vihi awashima ve la yô. Nahan se cii se hide se za hemen a tom u maan girgar la.
16 Hii sha iyange la je, ior av mbagen ve eren tom,+ mbagen di ve tile ve kôr awange man ipyerutya kua mbaada shi ve hua urigambautyaav mba iyôôgh. Shi mbavesen+ tile ken ijime lu suen mba hen ya u Yuda
17 mba ve lu maan girgar la cii. Mbatôônikyav kôr ikyagh ki tswamegh uwegh môm lu eren tom uwegh môm.
18 Shi hanma ormaankwagh kpa yange nan kange sanker ken iwenge nan lu maan kwagh, shi ortôngon korough+ tile vea mo.
19 Maa m kaa a ashagbaaior kua imuetor man ior cii mer: “Tom ne ngee shi u gba ikyôr, shi se samber sha girgar ne se mba ica a ayol a ase.
20 Nahan zum u ne ongo korough ku gbe imo yô, va kohol nen hen ape se lu ne. Aôndo wase una nôngo kwagh sha ci wase.”+
21 Se mbagen se za hemen u eren tom, mbagen di kôr awange, i hii sha use zan zan asan a va kar duen.
22 Hen shighe la m kaa a ior mer: “Hanma or nana tsaan ken Yerusalem vea ortom u nan, vea kuran se tugh, vea gema a eren tom atetan.”
23 Nahan mo man anmgbianev av kua mbatomov av+ man mbakuran mba ve lu vea mo la cii, se musan akondo a ase ga, shi hanmô wase kôr ikyagh ki tswamegh ki nan ken uwegh ku iyanegh.
