Nehemia 1:1-11
1 Mkaanem ma Nehemia*+ wan u Hakalia: Yange m lu ken Shushan*+ iyou i taver* ken uwer u Kiselev* ken inyom i sha 20 la.
2 Hen shighe la Hanani,+ anmgbian wam ugen mough vea ior mbagen ken Yuda ve va nyôr. Maa m pine ve er asande a Mbayuda a yange hide ken uikyangen la a lu yô,+ kua er akaa a lu zan hemen ken Yerusalem la kpaa.
3 Ve kaa a mo ér: “Asande a mba yange ve due ken uikyangen mba ve lu ken kpentar* la cii nga ken mlu u vihin man u kunya kpishi.+ Girgar u Yerusalem yôhôr ngu her nahan,+ ihindagar na kpa hia ngi her.”+
4 M ongo akaa ne yô, m shar inya m gba vaan shi zungwen ayange kpishi, m lu hôron kwaghyan+ shi eren msen sha ishigh ki Aôndo u sha.
5 M kaa mer: “Aye Yehova, we Aôndo u sha, u ta ihindi iyol shi u ngu Aôndo u kuren uityendezwa ou. U tesen mba u doo ve ishima shi ve kuran atindi a ou la dooshima gbem.+
6 Ma u shi bugh ashe ma u nenge shi ma u kegh ato ma u ongo msen u mo wanakiriki wou m lu eren hen a we nyian tugh man tetan,+ sha kwagh u mbayev ou Iserael ne, man er m lu pasen akaabo a ior i Iserael ve er u la. Se er u isholibo, mo kua ya u terem cii.+
7 Mimi je se er u kwagh u vihin kpishi,+ sha ci u se dondo atindi a ou man akaawan a ou kua ajiraôron a ou a yange u na sha ikyev i wanakiriki wou Mose la ga.+
8 “Yô ma u shi umbur mkaanem ma yange u ôr a* wanakiriki wou Mose la, wer: ‘Aluer ne er kwaghbo yô, me sambe ne ken akuraior.+
9 Kpa aluer ne hide hen a mo, ne kura atindi a am shi ne wa a ikyo kpaa yô, ior enev vea̱ sambe vea̱ za lu sha ikighir i sha je kpaa, ka sha her je me za kohol ve,+ me hide a ve hen ijiir i m tsough mer iti yam i lu her la ye.’+
10 Mban ka mbayev ou man ior ou mba u paa ve sha agee a ou a vesen man uwegh ough ku ageegh yô.+
11 Yehova, yô ma u shi kegh ato a msen u wanakiriki wou kua msen u mbayev ou mba ve cie iti you sha mimi la, shi ma u ne kwagh ma a ze a wanakiriki wou ma i doo nyian, sha er mhôônom ma a kôr or ne a mo yô.”+
Yange m lu or u toon tor kwaghman.+
