Mika 1:1-16
1 Ka kwagh u Yehova ôr a Mika,*+ or u ken Morasheti sha ashighe a Yotam+ man Ahashi+ man Hesekia+ tema tor ken Yuda,+ ken mpase u sha mnenge u Aôndo tese un sha kwagh u Samaria man Yerusalem je ne:
2 “Ungwa nen, ne ior cii!
We tar kua akaa a a lu shin a we la cii, kegh nen ato,Kegh nen ato, Yehova Ter u Hemban Cii la a ôr ne akaa a yange ne er la+—Ka Yehova u a tem ken icighan tempel na la.
3 Nenge! Yehova ngu moughon hen ijiir na;Una sen una va ndyar ajiir a taven a shin tar.
4 Iwo ia sough shin angahar a na,+Shi upev vea pavEr ikpayough i i kende sha usu,Man er mngerem ma i hee ma lu senen nahan.
5 Akaa ne cii aa er sha ci u ihyembeato i Yakob,Man sha ci u asorabo a ya u Iserael.+
Ka nyi Yakob a hembe ato sha mini?
Ka Samaria gaa?+
Man ka nyi i lu ajiir a taven a Yuda?+
Kera ka Yerusalem gaa?
6 Me er Samaria una hingir tihi u alôgh sha tar,Una hingir ijiir i lôôn ikyon i wain;Me haa awen a na shin pev,Shi me er atô a ayoughough a na aa due sha.
7 A hembe ieev nav mbi a gbe la cii avur avur,+Shi akaa a a er gbaga a zough a mi la cii, a nande a ken usu.+
Me tim akombo a na cii kera.
Sha ci u yange zua a akaa ne ken injar i i na un sha gbaga u eren la,Shi akaa ne aa hingir injar i mbaagbaga.”
8 Sha nahan yô, me gber kwelegh shi me ngor mliam;+Me zende angahar gbiling man dyelegh.+
Kwelegh wam una lu er u aniwaav mba ken toho nahan,Shi ijungwen yam ia lu er i ukonkofi nahan.
9 Gadia ivav na ia fatyô u been ga;+I samber zan zan nyôr ken Yuda.+
Bouange samber zan zan nyôr sha hundagar u ior av ken Yerusalem.+
10 “De yôôn nen kwagh ne ken Gati ga;U vaan tsô kpa de vaan nen ga.
Viligh nen iyol shin vuulevu ken Bete-afera.*
11 Ne mba ne tem ken Shafir la, per nen dyelegh man a kunya iyol.
Mba ve tem ken Saanan la mba a due ga.
Kwelegh una lu ken Bete-esel, nahan una kera wase ne ga.
12 Gadia mba ve tem ken Maroti la kegh kwagh u dedoo,Kpa gema ka kwagh u bo a dugh hen Yehova a yem hen hundagar u Yerusalem ye.
13 Ne mba ne tem ken Lakishi la,+ zer nen ikyekyeutya sha anyinya.
Lu ne ne hii eren isholibo i wankwase u Shion la ye,Gadia lu ken a ven i zua a mbahembanato ken Iserael ye.+
14 Nahan Moresheti-gati una yemen yô, u na un uiyua.
Yange ior i Akeshibi+ tsugh ator a Iserael.
15 Ne mba ne tem ken Mareshaa la,+ m ngu van a or u nan hembe ne yô.+
Icivir i Iserael ia yem zan zan a nyôr Adulam.+
16 Kpur nen ityough shi hondo nen ice kera sha ci u ônov enev mba ve doo ne ishima la.
Kpur nen ityough er igyuve nahan,Sha ci u i kura ve hen a we i yem a ve uikyangen.”+
