Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Ka Unô Ve Eren Ishima i Yehova Nyiana?

 Ityough ki sha 15

Mbatamen Mba Eren Tom ken Tiônnongo Nena?

Mbatamen Mba Eren Tom ken Tiônnongo Nena?

Tar u Finland

U tesen ior

U taver ior asema

U pasen ivangeli

Se mba a mbahemenev mba kwaghaôndo ken nongo wase mba i kimbin ve sha uwer ga. Kpa, er yange i eren shighe u i hii veren nongo u Kristu la nahan, ka i tsua mba ve kom u lun mbakuran la “sha u [ve] koso nongo u Kristu u Aôndo.” (Aerenakaa 20:28) Mbatamen mban ka nomso mba ve vie ken jijingi, mba ve hemen ken atôônanongo shi ve kuran a ‘er i kighir ve a kighir ga, kpa í lu sha asema a ve; í lu sha ci u mtsera u dang ga, kpa í lu sha gbashima je’ yô. (1 Peteru 5:1-3) Ka ityom i nyi ve eren sha ci wase?

Mba kor se shi mba nengen sha a vese. Mbatamen ka ve wa atôônanongo kwagh ken Ruamabera, shi ve wase a sha u a za hemen u lun kôôsôô a Yehova. Er mbatamen ve fe ér tom u Aôndo a we ve sha ikyev ne ka u vesen yô, mba kighir ior mba Aôndo ga, kpa ka ve na i kpe se iyol shi i saan se iyol kpaa. (2 Mbakorinte 1:24) Er orkuranilev ka nan nenge sha hanma iyôngo i nan sha gbashima nahan, kape mbatamen kpa ka ve nôngo sha u vea fa mba ken tiônnongo asange asange je la.—Anzaakaa 27:23.

Mba tesen se er se er ishima i Aôndo yô. Hanma kasua yô, mbatamen ka ve hemen mbamkombo mba tiônnongo sha er vea taver jighjigh wase u nan yô. (Aerenakaa 15:32) Shi nomsombaiorov mba ve lu a ishima i tseen ne ka ve hemen ken tom u ivangeli, ve eren tom ne a vese imôngo shi ve tsaase se sha igbenda kposo kposo i eren tom shon.

Mba taver hanmô wase ishima. Mbatamen ka ve za hen uya asev, gayô ve tema a vese hen Iyou i Tartor ve wa se kwagh ken Ruamabera shi ve sur se asema kpaa, nahan ve wase se u seer lun a Yehova kôôsôô.—Yakobu 5:14, 15.

Dugh ityom i mbatamen ve eren ken atôônanongo la sha yô, shi mbatamen kpishi mba eren ityom i uke shi mba nengen sha icombor ve, man akaa ne cii ka a tôô ve shighe. Anmgbianev mba ve eren tom sha gbashima mban kuma u se na ve icivir.—1 Mbatesalonika 5:12, 13.

  • Ka tom u nyi mbatamen mba ken tiônnongo ve erene?

  • Ka sha igbenda i nyi nahan mbatamen ka ve tese ér kwagh wase asange asange gba ve ishima?