Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Ka Unô Ve Eren Ishima i Yehova Nyiana?

Yange I Hide i Fa Akaa a Mimi a ken Bibilo, a Ior Kera Fa A Ga Ica i Gba la Nena?

Yange I Hide i Fa Akaa a Mimi a ken Bibilo, a Ior Kera Fa A Ga Ica i Gba la Nena?

 ITYOUGH KI SHA 3

Yange I Hide i Fa Akaa a Mimi a ken Bibilo, a Ior Kera Fa A Ga Ica i Gba la Nena?

Mbahenen Bibilo, kwavanyom u 1870 la

Iyoukura i hiihii, i yange i gber ken inyom i 1879 la

Iyoukura i ainge

Bibilo yange i tsengaôron ér Yesu una kpeen kera yô, mbatesen mba aiev vea due ken atô u Mbakristu mba ngise mbara, vea nzughul a mimi u Bibilo. (Aerenakaa 20:29, 30) Shighe kar yô, lu kwagh u er vough je la. Yange ve nungwa atesen a Yesu sha mbamhen mba kwaghaôndo u mbafanaôndoga la, nahan kwaghaôndo u a aiegh hingir u duen. (2 Timoteu 4:3, 4) Se er nan nyian ve, se fa wang ser, se mba a mkav u vough sha kwagh u Bibilo i tese jim jim laa?

Shighe va kuma u Yehova una pase mimi. Yehova yange tsengaôron ér sha ‘shighe u mkur la, mfe una seer.’ (Daniel 12:4) Ken inyom i 1870 la, asande a ior a yange lu keren mimi yô nenge ér ucôôci kpishi mba tesen kwagh u Ruamabera a kaa ga. Sha nahan yô, ve hii u keren ér vea fa kwagh u Bibilo i tese jim jim la, nahan Yehova wase ve ve zua a mkav u Bibilo.

Nomso mba kwagh u mimi gba ve ishima la time ken Bibilo zulee. Ior asev mba yange ve hii u keren ér vea fa kwagh u Bibilo i tese jim jim, mba i yilan ve ér Mbahenen Bibilo la, yange ve hen Bibilo sha gbenda u se kpa se henen i̱ nyian ne. Yange ve time sha atineakaa a ken Bibilo sha adondo adondo. Vea tagher a ma ijiir ken Bibilo i i taver ve u kaven yô, ve ôr avur agen sha u a wase ve u kaven kwagh u ijiir shon i lu ôron yô. Vea zuan a iwanger i i zough sha kwagh u Icighanruamabera a tese yô, ve nger kwagh u ve zough a mi la shin inya. Er ve de ér avur a Bibilo agen a̱ ta ve iwanger sha agen yô, ve fa akaa a mimi a ior kera fa ga ica i gba la, er mimi u sha kwagh u iti i Aôndo man Tartor, man awashima na sha ci u uumace kua tar ne, man mlu u mbakpenev kua ishimaverenkeghen i mnder u shin ku la nahan. Mimi u ve ker ve zua a mi la pase ve tuhwa, ve kera lu ken ikyangenev mbi aeren man atesen a aiegh kpishi, a ior tesen la ga.—Yohane 8:31, 32.

Mba ker ken inyom i 1879 yô, Mbahenen Bibilo kav ér shighe kuma u vea pase ior mimi ken igbar ve. Nahan ken inyom shon la je, ve hii u gberen magazin u Iyoukura U Yôôn Tartor u Yehova, u se gberen her zan zan nyian ne. Hegen ne se mba pasen ior akaa a mimi a ken Bibilo ken ityar i hemban 230, kua ken ijô i hemban er 600 nahan. I gbe je mba a zua a mfe u mimi kpishi er i zough a mi hegen nahan ga!

  • Shighe u Kristu kpe kera la, yange i er a mimi u Bibilo nena?

  • Ka nyi yange i wase se ve se fa mimi u Mkaanem ma Aôndo u ior kera fa ga ica gba laa?