Aver yem sha atineakaa

Aver yem sha mver u atineakaa

Mbashiada mba Yehova

Tsua Zwa Tiv

 Ityough ki sha 28

Ka Nyi i Lu hen Ijiir Yase I sha Intanet La?

Ka Nyi i Lu hen Ijiir Yase I sha Intanet La?

Tar u France

Tar u Poland

Tar u Russia

Yesu yange kaa a mbadondon un ér: ‘Iwanger yen i̱ wanger sha ishigh ki iorough, sha u ve̱ nenge aeren a en a dedoo man ve̱ civir Ter wen u A lu Sha yô.’ (Mateu 5:16) Sha nahan yô, se mba eren tom a iwabuter, kua Intanet sha inja. Ijiir yase i sha Intanet i www.jw.org la ka ijiir i í pase kwagh u Mbashiada mba Yehova ve ne jighjigh a mi kua ityom i ve eren la yô. Ka nyi nahan u nenge a mi hen ijiir nee?

Mbamlumun mba Bibilo i ne sha mbampin mba ior kpishi ve pinen la. U fatyô u zuan a mbamlumun sha mbampin mba hange hange mba ior ve pinen la. I na mbalumun sha mbampin mbara nahan ataratar ken antakerada u a lu a itinekwagh ér U Soo u Fan Mimi Kpa?, u i ver sha Intanet ken ijô i kuman er 400 nahan la. Shi u fatyô u zuan a Bibilo i i yer ér New World Translation la ken ijô kpishi man ityakerada i wasen ior u henen Bibilo, kua takerada u Bibilo Tese Ér Nyi Jimi? la man mbamgber mba Iyoukura man Awake! mba hev hen ijiir yase i sha Intanet la. I ver ngeren mban kpishi sha gbenda u u fatyô u ôron ve shin ungwan ve sha Intanet, gayô kuran ve za ungwan a ungwa yô. Shi u fatyô u kuran ve sha gbenda u i yer ér PDF la shin u i yer ér EPUB la. U fatyô u gberen ukôpi kpuaa ken zwa u orgen u nan kpa nan soo u ôron ityakerada ne yô, za nan nan. I ver uvidio kpishi mba tesen iliam i sha ave i mbaakondoato hen ijiir ne. U fatyô u kuran avur a Bibilo a i ôr a inja er mba eren a er iniumbe nahan la hen ijiir ne, kua anumbe a i er sha akaa a ken Bibilo kua ityogholough mbi doon ungwan, mbi u fatyô u ungwan shighe u ú lu memen yô.

Akaa a mimi a i pase sha kwagh u Mbashiada mba Yehova yô. Akaa agen a i ver hen ijiir yase i sha Intanet ne yô, ka abaver man icer i vidio i tiônôô, i i sember veren sha Intanet, sha kwagh u tom u Mbashiada mba Yehova u pasen kwagh sha tar cii la, man mbamzeyol mba ve tagher a mi la, kua iwasen i ve ne mba aahe a bende a ve la. Shi u fatyô u fan kwagh u mbamkohol mba a va er ken hemen la, shi u nenge a mbaadereshi mba ubranci asev kpaa.

Akaa ne cii na yô, se mba tan iwanger i mimi ne aren ken akighir a tar. Ior mba ken hanma veghertar cii, kua mba ken veghertar u a hembe ndôhôr shi a lu ica hiinii, i yer ér Antarctica la je kpa mba zuan a mtsera hen ijiir yase i sha Intanet ne. Msen wase yô, ka u “kwaghôron u Ter a̱ samber fefa” zan zan a tser tar cii, sha ci u icivir i Aôndo.—2 Mbatesalonika 3:1.

  • Ijiir i sha Intanet i www.jw.org la ngi wasen ior kpishi u henen mimi u Bibilo nena?

  • Ka nyi u soo u za keren hen ijiir yase i sha Intanet laa?