Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Ka Unô Ve Eren Ishima i Yehova Nyiana?

 Ityough ki sha 25

Mba Maan Ayou a Tartor sha Ci u Nyi, man Ka I Maa A Nena?

Mba Maan Ayou a Tartor sha Ci u Nyi, man Ka I Maa A Nena?

Tar u Bolivia

Tar u Najeria, Iyou i Tartor i tse, man i he

Tar u Tahiti

Se mba yer iyou i se nyer mbamkombo ker la ser Iyou i Tartor, sha ci u ityesen i vesen i ken Bibilo i i timen sha mi ken iyou la har sha kwagh u Tartor u Aôndo. Man ka Tartor u Aôndo yange u lu itinekwagh i Yesu pasen kwagh sha mi ye.—Luka 8:1.

Ayou a Tartor ka ajiir a hen ningir wase a i kohol her i civir Aôndo sha mimi yô. Ayou a Tartor ka ajiir a Mbashiada mba Yehova ve kohol her, ve dugh ve za pasen loho u dedoo hen ningir ve yô. (Mateu 24:14) I maa Ayou a Tartor sha igbenda kposo kposo shi nga igbanger kwaghmôm ga, kpa a cii nga akuma akuma. Shi ayou ne kpishi, nga a lu sha ci u atôônanongo imôngo. Ken anyom a a sember karen ne, se maa Ayou a Tartor a he udubu imôngo (aluer i er ayenge yô, se mba maan Ayou a Tartor ataan hanma sev) sha ci u atôônanongo a ase a a lu seer a seer la. Er nan ve se fetyô u eren kwagh ne.—Mateu 19:26.

Mba maan Ayou a Tartor sha uiyua mba i eren sha ci u maan Ayou a Tartor la. Ken hanma Iyou i Tartor yô, i ver akwati u eren iyua shimi, i nger sha mi ér Kingdom Hall Construction Worldwide (Tom u Maan Ayou a Tartor Tar sha Won Cii). Ka i tindi a uiyua mba i er la hen ubranci asev sha er atôônanongo a a soo u maan shin sôron Iyou i Tartor yô, a na a injô a u pinen a mtsera sha mi shio yô.

Mbatomov mba ve ne ayol a ve sha u maan Ayou a Tartor la ka ior mba mlu ve a lu kwaghmôm ga yô, shi mba kimbin ve sha tom u ve eren la ga. Ken ityar kpishi, i ver Iniongo i Maan Ayou a Tartor. Iniongo i maan Ayou a Tartor man mbagenev mba ve ne ayol a ve u za wasen tom la ka ve mough hen tiônnongo ugen ve yem hen ugen, a lu ken ajiir a icaa je kpaa, ve za nenge sha tom u i lu eren her la, shi ve tsaase Mbashiada mba hen ijiir la ken tom shon. Ken ityar igen yô, i ver Ukômatii mba Nengen sha Tom u Kwaghmaan hen Haregh sha u ve nengen sha tom u maan Ayou a Tartor shin hiden sôron a i vande maan la hen ma haregh. Mbatamen mba ve fe tom u maan kwagh tsembelee yô, ka ve hemen atôônanongo sha avegher a tom la cii, shi anmgbianev mbagenev mba eren ityomaveegh, ka ve na ayol a ve sha u wasen tom ne. Hanma ijiir i i lu maan Iyou i Tartor cii yô, anmgbianev mba ken tiônnongo u i lu maan un Iyou i Tartor la ka ve hemba iyenge ken mba ve ne ayol a ve sha u wasen tom shon la. Ka jijingi u Yehova kua tom u ior nav ve eren a ishima i môm la ka u na ve kwagh a fatyô u lun nahan ye.—Pasalmi 127:1; Mbakolose 3:23.

  • Mba yer ajiir a ase a se civir Aôndo her la ér Ayou a Tartor sha ci u nyi?

  • Er nan ve se fetyô u maan Ayou a Tartor sha ityar kposo kposo?