Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Ka Unô Ve Eren Ishima i Yehova Nyiana?

 Ityough ki sha 14

Ka Makeranta u Nyi I Ver sha Ci u Upania?

Ka Makeranta u Nyi I Ver sha Ci u Upania?

Tar u Amerika

Makeranta u Gileadi, hen gar u Patterson, kpentar u New York

Panama

I fa Mbashiada mba Yehova a imakeranta i tesen kwagh u Hemen u Aôndo la ica i gba hegen. I ver imakeranta i doon tsung sha ci u mba ve eren tom u pasen kwagh u Tartor hanma shighe la, sha er vea fatyô u ‘kuren u doo doo’ yô.—2 Timoteu 4:5.

Makeranta u Henen Tom Pania. Pania u keke ka nana pasen kwagh hanma shighe inyom i môm ia been yô, i lôhô nan ér nana za makeranta ne ayange ataratar, u alaghga a er u ken ma Iyou i Tartor i i lu ikyua a nan yô. Awashima u makeranta ne ka u wasen pania la nana seer kporom ikyua a Yehova, shi nana hemba fan igbenda i eren tom u pasen kwagh la cica cii, shi nana za hemen u eren tom ne sha jighjigh.

Makeranta u Mbapasen Ivangeli i Tartor. I ver makeranta u i eren u iwer ihiar ne sha u tsaase upania mba ve vie tsembelee, mba ve kegh iyol u undun ijiir ve, moughon yemen hanma ijiir i kwagh a hembe gban sha a ve la. Ka ve dondo ikyav i Yesu Kristu, u a lu Orivangeli u hemban cii a ver la, sha u kaan ér, “Mo ne, tindim.” (Yesaia 6:8; Yohane 7:29) Cii ve ve mough ve yem ijiir i i lu ica a ijiir ve yô, adooga a gba u vea gema mlu ve, shi vea seer panden akaa ken uma. Alaghga mtseenem man mdôhôrom kua kwaghyan man aeren a ityôô a hen ijiir igen, a a kaha kposo a kwagh u ve vande hoghor a mi la. Adooga je yô, a hingir hange hange u vea hen zwa ugen kpaa. Makeranta ne ka u wase anmgbianev mba lun kwav mba nomso man mba kasev, kua mba ve vese ayol a ve, mba ve lu anyom hii 23 zan zan 65 la cii, ve lu a aeren a Orkristu, a i gbe u vea lu a mi ken tom ve la, man mfe u una na Yehova man nongo na u hemban eren tom a ve la.

Makeranta u Henen Bibilo u Watchtower u Gileadi. Inja i ishember i “Gileadi” la ken zwa Heberu yô ér, “Shiada.” Hii shighe u i ver makeranta u Gileadi ken inyom i 1943 la je, i tindi mba ve bee makeranta ne, ve hingir mbamishen, ve hembe iorov 8,000 la “ken ikighir i tar” sha u ve za er shiada yô, shi tom ve la za ikyura kpishi kpaa. (Aerenakaa 13:47) Shighe u mbabeen makeranta ne za nyôr ken tar u Peru hiihii la, tiônnongo môm tsô kpa lu ker ga. Kpa hegen atôônanongo nga ken tar la hemba 1,000. Shighe u mbamishen asev hii tom ken tar u Japan la, Mbashiada lu ker kuma pue kpaa ga. Kpa hegen Mbashiada hemba iorov 200,000 ken tar la. Ka i tese kwagh ken Gileadi iwer itian, shi i hen Mkaanem ma Aôndo kpa kpoghuloo. Ka i lôhô mba ve lu ikpur mba pania shin mbamishen mba eren tom u pasen kwagh, shin anmgbianev mba ve lu shin afishi a branci, shin mba ve lu eren tom u ningir sha la, ve za makeranta ne i za tsaase ve tsembelee, sha u ve sue tom u pasen kwagh u i eren sha tar cii la yô.

  • Ka nyi i lu awashima u Makeranta u Henen Tom Pania la?

  • I ver Makeranta u Mbapasen Ivangeli i Tartor la sha ci u unô?