Aver yem sha atineakaa

Aver yem sha mver u atineakaa

Mbashiada mba Yehova

Tsua Zwa Tiv

 Ityough ki sha 26

Se Wase Tom u Nengen sha Iyou i Tartor Yase Nena?

Se Wase Tom u Nengen sha Iyou i Tartor Yase Nena?

Tar u Estonia

Tar u Zimbabwe

Tar u Mongolia

Tar u Puerto Rico

Hanma Iyou i Tartor i Mbashiada mba Yehova yô, ka i yila i í suur sha icighanti u Aôndo. Sha nahan yô, se nenge ser tom u veren ishima sha iyou ne sha u i lu wang shi i doo ashe, shi sôron i la, ka kwagh u icivirigh, shi ka kwagh u hange hange ken mcivir wase u wang ne kpaa. Hanma or cii nana fatyô u eren tom ne.

Na iyol you u esen Iyou i Tartor shighe u i dugh mkombo yô. Hanma shighe u i dugh mkombo yô, anmgbianev mba nomso man mba kasev ka ve ese Iyou i Tartor saan saan. Shi se mba sôron i tsembelee sha ashighe ashighe. Ortamen shin diakon ka nan dondo kwagh u i nger sha kwatakerada, u ú tese er a er tom ne la, nahan nan nenge sha tom u sôron Iyou i Tartor la tsembelee. Shighe u i gbe u a er tom u sôron Iyou i Tartor yô, anmgbianev ka ve na ayol a ve u eren tom u ú lu la, er u esen shin kiren i̱, shin ovur ihyundu shin sôron akaateman veren vough shin ôôn ahungwa shi haan icigh ki yangen angev shimi, shin kiren uwindou man ajingi, shin nanden ihyôghonov, gayô sôron i̱ ken won shi huran tembe nahan. Ka a hemba kpa i tsua iyange i môm ken inyom, i er tom u vesen u sôron Iyou i Tartor. Ka sea eren tom ne yô, mbayev asev kpa se na ve ityom, nahan ve hen u tesen icivir sha ijiir yase i se civir Aôndo her la.—Orpasenkwagh 5:1.

We kpa na iyol you sha u wasen nyityô tom i í gbe u a er sha u sôron Iyou i Tartor cii. Hanma inyom yô, ka i yenge Iyou i Tartor iyol tsembelee, ken atô man ken won cii. Ka a yengen i iyol a faan kwagh u a vihi yô, i gba u a sôron i hanma shighe, sha u i lu sha ashe tsembelee yô. Kwagh ne ngu a wase se se kera vihi inyaregh dang dang ga. (2 Kroniku 24:13; 34:10) Doo u Iyou i Tartor i se civir Aôndo wase ker la ia lu wang shi a nengen sha mi tsembelee. Aluer se mba eren tom ne yô, se lu tesen ser Yehova doo se ishima shi ijiir i se civir un her la kpa gba se kwagh. (Pasalmi 122:1) Shi kwagh ne ngu a na ior mba hen haregh wase ve lu a mnenge u dedoo sha kwagh wase.—2 Mbakorinte 6:3.

  • Gba u se de ser ijiir i se civir Aôndo her la i lu sha ashe côv côv ga sha ci u nyi?

  • Ka akaa a nyi ka i er sha u nengen ér Iyou i Tartor ngi sha ashe wang-na?