Aver yem sha atineakaa

Aver yem sha itinekwagh i vesen i sha uhar

Aver yem sha mver u atineakaa

Mbashiada mba Yehova

Tiv

Ka Unô Ve Eren Ishima i Yehova Nyiana?

 Ityough ki sha 24

Se Mba Zough a Inyaregh Ki Eren Tom Wase u Se Eren sha Tar Cii la Hana?

Se Mba Zough a Inyaregh Ki Eren Tom Wase u Se Eren sha Tar Cii la Hana?

Tar u Nepal

Tar u Togo

Tar u Ingila

Nongo wase ka u gber Ubibilo man ityakerada igen umiliôn umiliôn hanma inyom shi u na ior i, a u wan ve ishe shio. Ka se maa Ayou a Tartor man ubranci asev, shi se nenge sha mi kpaa. Ka se nenge sha mbamishen man mba eren tom shin Betel, shi aahe ka una er yô, se na mba a er ve la iwasen. Sha nahan yô, alaghga u pine wer, ‘Se mba zough a inyaregh ki eren akaa la cii hana?’

Se mba lehe ior iwasen shin se mba sen môm ken upue shin karen ior a gbande sha ishi ser ve er iyua ga. Er ka se vihi inyaregh kpishi sha u eren tom wase u ivangeli la nahan kpa, se mba sônon inyaregh ga. Mgber u sha uhar u magazin u i yer ér Iyoukura la, yange ôr kwagh anyom kar hemba deri môm hegen, ér se na jighjigh ser ka Yehova a lu suen tom wase ye, nahan “mayange se zamber ior ser ve na se iwasen ga,” shi mayange je se mba a er nahan ga!—Mateu 10:8.

Uiyua mba ior ve eren sha asema a ve la, mba wasen se u eren ityom yase. Ior kpishi ka ve wuese tom wase u tesen mbagenev Bibilo la, nahan ve er iyua sha u suen u. Mbashiada ayol a ve kpa mba ne shighe ve man inyaregh vev, kua akaa ve agen kpaa saan saan sha u eren ishima i Aôndo, tar sha won cii, shi mba eren tom u Aôndo sha agee a ve kpaa. (1 Kroniku 29:9) Ka se ver mbaakwati mba eren iyua shimi ken Iyou i Tartor, ape mba ve soo u eren iyua la vea er yô. Se mba hembe zuan a inyaregh hen mba ve lu mbanyarev ga yô, er kwasecôghol u lu icankwase, u yange haa ideri ihiar tseegh shin akwati u inyar ve Yesu wuese iyua na la kpishi la nahan. (Luka 21:1-4) Nahan hanma shighe cii yô, hanma or nana fatyô u ‘veren kwagh’ sha u nana na “er nan we ken ishima i nan la nahan” yô.—1 Mbakorinte 16:2; 2 Mbakorinte 9:7.

Se na jighjigh ser Yehova una za hemen u mgbeghan mba ve soo u ‘civir un sha inyaregh vev’ la ér ve sue tom u Tartor, sha er awashima na una kure yô.—Anzaakaa 3:9.

  • Er nan ve nongo wase u lu kposo a ukwaghaôndo mbageneve?

  • Se mba eren tom a uiyua mba i eren la nena?