1, 2. Tanbasá mak ita presiza hanoin didiʼak oinsá ita prontu atu fó perdua ba ema seluk?

BÍBLIA ajuda ita atu hatene kona-ba Jeová nia haree ba ema nia sala no oinsá nia prontu atu fó perdua ba ita-nia sala. Iha lisaun uluk, ita aprende oinsá mak Jeová fó perdua ba David no Manassés. Tanba sira sente triste tebes kona-ba sala neʼebé sira halo, fó sai sira-nia sala, hakribi sira-nia hahalok aat, no arrepende an husi laran, Jeová simu fali sira hodi fó perdua ba sira.

² Agora, mai ita koʼalia kona-ba oinsá ita rasik bele prontu atu fó perdua ba ema seluk. Hanoin toʼok se ita mak família ho ema neʼebé mate tanba Liurai Manassés nia hahalok, karik ita sei sente oinsá? Ita bele fó perdua ba Manassés ka lae? Pergunta neʼe importante tebes tanba ita moris iha mundu neʼebé nakonu ho krime, violénsia, no ema neʼebé hanoin an deʼit. Entaun, tanbasá mak ema kristaun presiza hakaʼas an atu sai ema neʼebé prontu atu fó perdua? No kuandu ema hatudu hahalok aat ba ita, saida deʼit mak bele ajuda ita atu kontrola ita-nia sentimentu no hatudu hahalok neʼebé tuir Jeová nia hakarak hodi sai prontu atu fó perdua?

3-5. (a) Jesus konta ai-knanoik saida atu hatudu katak ita presiza sai prontu atu fó perdua? (b) Liuhusi ai-knanoik iha Mateus 18:21-35, Jesus hakarak hanorin saida ba ita?

³ Ita tenke sai prontu atu fó perdua ba ema neʼebé hakanek ita-nia laran maski ema neʼe parte husi kongregasaun ka laʼós. Hodi halo nuneʼe ajuda ita atu haburas nafatin dame ho ita-nia família, kolega, ema seluk, no Maromak Jeová. Bíblia hatudu katak ita tenkesér prontu atu fó perdua ba ema seluk maski sira halo sala beibeik hasoru ita. Atu ajuda ita komprende tansá ita tenke sai prontu atu fó perdua, Jesus konta ai-knanoik ida kona-ba atan ida neʼebé debe osan barak ba ninia naʼi.

 ⁴ Atan neʼe debe osan barak, folin hanesan ho osan neʼebé serbisu-naʼin presiza serbisu ba loron 60.000.000. Maibé ninia naʼi kasu tusan neʼe no hatete katak nia la presiza selu fali osan neʼe. Maski nuneʼe, kuandu atan neʼe sai husi ninia naʼi nia uma, nia hasoru ho maluk atan ida neʼebé debe nia osan ho folin kiʼik, neʼebé ema bele hetan hodi serbisu ba loron 100 deʼit. Maluk atan neʼe husu nia atu hein ba tempu uitoan tan atu bele selu fali ninia tusan neʼe, maibé atan neʼebé foin sai livre husi tusan boot lakohi kasu ninia maluk nia tusan kiʼik no hatama nia iha dadur laran. Kuandu ninia naʼi rona kona-ba buat neʼebé akontese, nia sai hirus no hatete ba atan neʼebé lakohi kasu ninia maluk nia tusan: “Ó la bele hanoin ó-nia maluk atan hanesan haʼu hanoin ó?” Depois, “hodi hirus, naʼi fó nia ba dadur-naʼin sira toʼo nia selu nia tusan hotu”.—Mt 18:21-34.

⁵ Liuhusi ai-knanoik neʼe, Jesus hakarak hanorin saida ba ita? Nia hatete: “Imi ida-ida la perdua ho laran imi-nia maun-alin karik, haʼu Aman iha lalehan sei halo mós nuneʼe ba imi.” (Mt 18:35) Nuʼudar ema sala-naʼin, ita halo sala beibeik no la konsege halo tuir Jeová iha dalan neʼebé perfeitu. Maski nuneʼe, Jeová prontu atu fó perdua ba ita no kasu ita-nia sala hodi la hanoin tan kona-ba neʼe. Tan neʼe, se ita hakarak Jeová atu simu ita, ita mós tenke fó perdua ba ema seluk. Iha Jesus nia diskursu iha foho, nia hatete: “Imi perdua karik ema sira-nia sala, imi Aman iha lalehan mós sei perdua imi-nia sala sira. Maibé imi la perdua karik ema seluk, imi-nia Aman mós sei la perdua imi-nia sala sira.”—Mt 6:14, 15.

6. Tanbasá mak dala ruma susar ba ita atu fó perdua ba ema seluk?

⁶ Karik ita hanoin: ‘Neʼe loos, maibé susar atu halo tuir.’ Sin, dala ruma susar ba ita atu fó perdua ba ema seluk tanba ida-neʼe envolve ita-nia sentimentu. Porezemplu, kuandu ema ida halo sala ruma hasoru ita, ida-neʼe bele halo ita sai hirus ka sente katak nia sai traidór ba ita. Dala ruma, ita mós sente katak nia tenke hetan kastigu, ka ita tenke selu fali aat ba nia. Karik ita mós sente katak ita sei nunka bele fó perdua ba ema neʼe. Se dala ruma ita sente hanesan neʼe, saida mak ita bele halo atu bele fó  perdua ba ema seluk hanesan Jeová hakarak ita atu halo?

7, 8. Kuandu ema ruma hatudu hahalok ladiʼak ba ita, saida deʼit mak bele ajuda ita atu fó perdua ba ema neʼe?

⁷ Kuandu ema ruma hatudu hahalok ladiʼak ba ita, ka kuandu ita rasik mak sente katak ema halo hanesan neʼe, ida-neʼe bele halo ita sai hirus tebes. Joven ida konta buat neʼebé akontese loron ida kuandu nia sai hirus tebes, hodi dehan: ‘Haʼu sai husi uma hodi jura katak haʼu sei nunka fila fali. Iha loron neʼe haree diʼak, no kuandu haʼu laʼo liuhusi fatin neʼebé haree kapás, ida-neʼe neineik-neineik halo haʼu sente kalma fali. Oras balu liu tiha, haʼu arrepende an kona-ba haʼu-nia hirus no fila fali ba uma.’ Hanesan esperiénsia neʼe hatudu, kuandu ita fó tempu ba ita-nia an atu sai kalma fali no haree ita-nia situasaun ho laran-malirin, ida-neʼe sei ajuda ita atu la hatán fali ho hirus iha dalan neʼebé ikusmai halo ita arrepende an.—Sal 4:4; Prov 14:29; Tgo 1:19, 20.

⁸ Maibé, oinsá se ita sente hirus nafatin kona-ba ema ruma nia hahalok? Se nuneʼe, ita presiza buka-hatene tanbasá ita sai hirus. Tanba nia hatudu hahalok neʼebé la tuir justisa, ka la respeitu ita? Ka tanba ita sente katak ema neʼe hakanek ita-nia laran ho neon? Ninia hahalok neʼe aat duni ka lae? Hodi buka-hatene tanbasá ita hirus, ida-neʼe sei ajuda ita atu hanoin kona-ba Bíblia nia matadalan no saida mak ita presiza atu halo. (Lee Provérbios 15:28; 17:27. *) Hodi halo hanesan neʼe bele ajuda ita atu sai prontu hodi fó perdua ba ema neʼe. Maski dala ruma susar atu halo ida-neʼe, maibé Bíblia ajuda ita atu “bele hatene loloos” ita-nia sentimentu no atu banati-tuir Jeová neʼebé prontu atu fó perdua ba ema seluk.—Ebr 4:12.

9, 10. (a) Kuandu ema halo sala ruma hasoru ita, ita presiza halo saida deʼit? (b) Hodi sai prontu atu fó perdua sei lori rezultadu saida?

⁹ Ita hasoru situasaun barak neʼebé bele halo ita sai hirus. Porezemplu, kuandu ita kaer karreta, dala ruma karreta ida seluk besik atu xoke ita-nia karreta. Iha situasaun neʼe, saida mak ita sei halo? Ema balu sai hirus toʼo baku xofér neʼebé atu xoke sira-nia karreta. Maibé ita nuʼudar ema kristaun, ita lakohi halo hanesan neʼe.

¹⁰ Iha situasaun hanesan neʼe, diʼak liu atu hanoin uluk antes atu sai hirus. Karik ita mós sala uitoan tanba ita la fó atensaun ba dalan. Karik ema neʼebé atu xoke ita, ema neʼe nia karreta iha problema ruma. Hodi hanoin hanesan neʼe bele ajuda ita atu hamenus ita-nia hirus ka laran-kanek, no sai prontu atu fó perdua. Eclesiastes 7:9 hatete: “Keta sente an lalais hodi sai hirus, tanba hirus mak buat neʼebé iha ema beik-teen sira-nia laran.” Tan neʼe, kuandu ema halo sala ruma hasoru ita, ita labele sente katak sira halo ida-neʼe ho neon. Dala barak ema halo hahalok hanesan neʼe tanba deʼit sira ema sala-naʼin, ka tanba ita mak hanoin sala kona-ba buat neʼebé akontese. Ita presiza hanoin-hetan katak ita la hatene tansá ema hatudu hahalok hanesan neʼe, no presiza sai prontu atu fó perdua ba ema ho domin. Hodi halo nuneʼe sei halo ita sente kontente liután.—Lee 1 Pedro 4:8.

11. Maski ema simu ita ho diʼak ka ladiʼak iha serbisu haklaken, ita presiza nafatin sente oinsá?

¹¹ Kuandu ita hasoru ema neʼebé hatudu hahalok ladiʼak ba ita iha serbisu haklaken, oinsá mak ita bele kontrola ita-nia an? Kuandu Jesus haruka ninia dixípulu naʼin-70 atu bá haklaken, nia haruka sira hatete ba família ida-idak neʼebé sira vizita: “Dame ba uma neʼe!” Jesus mós hatete: “Iha karik ema dame-naʼin ida iha neʼebá, imi-nia dame sei horik ho nia; lae karik, [imi-nia dame] sei fila fali ba imi.” (Lc 10:1, 5, 6) Ita kontente kuandu ema simu mensajen neʼebé ita  lori tanba ida-neʼe ba sira-nia diʼak. Maibé, dala ruma ita mós hasoru ema neʼebé hatudu hahalok ladiʼak hodi la simu ita. Se hanesan neʼe, ita sei halo saida? Jesus hatete katak dame neʼebé ita husu ba ema neʼe sei fila fali ba ita, katak dame tenkesér iha nafatin iha ita-nia laran. Tan neʼe, maski ema simu ita ho diʼak ka ladiʼak, kuandu ita husik uma ida-idak, ita presiza nafatin sente dame iha ita-nia laran. Se ita sai fali hirus ba ema seluk nia hahalok ladiʼak, neʼe katak ita la iha dame iha ita-nia laran.

12. Tuir Paulo nia liafuan iha Efeso 4:31, 32, ita presiza halo saida kuandu ema seluk halo hahalok ladiʼak mai ita?

¹² Ita presiza hakaʼas an atu sente dame nafatin iha situasaun hotu, laʼós deʼit iha serbisu haklaken. Klaru katak prontu atu fó perdua la dehan katak ita simu deʼit ema seluk nia hahalok sala, ka taka matan ba hahalok sala neʼe. Maibé, prontu atu fó perdua dehan katak ita labele rai hirus ba ema neʼebé halo sala. Iha parte seluk, ema neʼebé hanoin beibeik kona-ba ema seluk nia hahalok ladiʼak, sira husik ema seluk nia hahalok atu halakon sira-nia haksolok. Tan neʼe, keta husik hanoin ladiʼak mak kontrola ita. Hanoin-hetan katak ita la bele sente kontente kuandu ita rai hela hirus iha ita-nia laran. Sin, mai ita sai ema neʼebé prontu atu fó perdua!—Lee Efeso 4:31, 32, MF. *

13. (a) “Tau ahi-klaak lakan” iha ema nia ulun nia leten, neʼe katak sá? (b) Kuandu ita hatudu hahalok diʼak ba ema neʼebé trata aat ita, ida-neʼe bele lori rezultadu saida?

¹³ Dala ruma ita hasoru ema neʼebé trata aat ita. Maibé, karik ita bele ajuda ema neʼe atu hakarak hatene saida mak Bíblia hanorin. Apóstolu Paulo hatete: “‘Ó-nia funu-balun hamlaha karik, fó han nia; nia hamrook karik, fó hemu nia; basá hodi halo nuneʼe, ó sei tau ahi-klaak lakan iha nia ulun nia leten.’ Keta husik buat aat manán imi, maibé imi manán buat aat ho buat neʼebé diʼak.” (Rom 12:20, 21) Kuandu ita hatudu hahalok diʼak ba ema neʼebé trata aat ita, ida-neʼe bele book ema neʼe atu troka ninia hahalok no hatudu laran-diʼak. Liután neʼe, hodi hanoin ema neʼe nia diʼak no komprende ninia situasaun, ida-neʼe bele book nia atu hakarak hatene liután kona-ba Bíblia. Maski ema neʼe troka ka la troka ninia hahalok, maibé ita-nia hahalok diʼak bele book ema neʼe atu hanoin kona-ba hahalok neʼebé ita hatudu.—1 Ped 2:12; 3:16.

14. Maski ema halo sala boot ruma hasoru ita, tanbasá mak ita presiza sai prontu atu fó perdua?

¹⁴ Maibé iha mós ema balu neʼebé ita labele ransu malu. Porezemplu, ita labele ransu ho ema neʼebé kongregasaun hasai ona tanba ema neʼe halo sala boot no la arrepende an. Se ema hanesan neʼe mak hakanek ita-nia laran, karik susar tebes ba ita atu fó perdua ba ema neʼe. Maski ema neʼe ikusmai arrepende an, karik ita sente laran-kanek nafatin tanba sala neʼebé nia halo iha tempu uluk. Iha situasaun hanesan neʼe, ita presiza husu nafatin Jeová nia ajuda hodi prontu atu fó perdua ba ema neʼe. Tuir loloos, ita la bele hatene ho loloos ema seluk nia hanoin no sentimentu. Maibé Jeová hatene, no nia hatudu pasiénsia ba ema neʼebé halo sala. (Sal 7:9; Prov 17:3) Tan neʼe mak Bíblia hatete: “Keta selu aat ho aat ba ema; buka buat neʼebé loos iha ema hotu-hotu nia oin. Bele karik, husi imi-nia sorin, buka atu moris iha dame laran ho ema hotu-hotu. Doben sira, keta buka atu halo aat ba ema neʼebé halo aat ba imi, maibé saran buat hotu ba Maromak nia hirus, basá hakerek tiha, ‘Haʼu mak selu aat ba aat, Haʼu sei selu fali. Naʼi [Jeová] dehan nuneʼe.’” (Rom 12:17-19) Ita la hatene buat hotu neʼebé Jeová hatene, no Bíblia mós haruka ita atu labele tesi  lia ba ema seluk. (Mt 7:1, 2) Maibé ita bele fiar katak Jeová mak sei tesi lia ho justisa ba ema hotu.

15. Kuandu ema ruma halo sala hasoru ita, ita presiza hanoin-hetan saida?

¹⁵ Se ita sente susar atu fó perdua ba ema neʼebé halo sala ruma hasoru ita no depois arrepende an, ita presiza hanoin-hetan katak ema neʼe mós sala-naʼin no luta hasoru susar oioin husi Adão nia sala. (Rom 3:23) Jeová sente laran-sadiʼa ba ema sala-naʼin hotu. Tan neʼe, diʼak atu ita halo orasaun kona-ba ema neʼe. Hodi halo nuneʼe bele ajuda ita la hirus tan ba ema neʼe. Jesus mós haruka ita atu labele rai hirus ba ema neʼebé fó susar ba ita, hodi hatete: “Hadomi imi-nia funu-balun sira, harohan ba sira neʼebé hanehan imi.”—Mt 5:44.

16, 17. Kuandu katuas kristaun sira halo desizaun katak ema neʼebé halo sala boot arrepende an, ita presiza halo saida? Tanbasá?

¹⁶ Maromak Jeová fó responsabilidade ba katuas kristaun sira atu halo desizaun se ema neʼebé halo sala boot arrepende an ka lae. Maski katuas sira-neʼe la iha matenek hanesan Maromak, maibé ho espíritu santu nia ajuda, sira hakaʼas an atu halo desizaun neʼebé tuir matadalan husi Maromak nia Liafuan. Tan neʼe, kuandu katuas sira halo desizaun ruma hodi halo orasaun ba Jeová atu ajuda sira, ita bele fiar katak sira-nia desizaun haleno Jeová nia haree.—Mt 18:18.

¹⁷ Iha situasaun hanesan neʼe, ita presiza hatudu laran-metin hodi tau fiar ba Jeová nia dalan atu rezolve problema iha kongregasaun no simu katuas sira-nia desizaun. Tan neʼe, se katuas sira halo desizaun katak ema neʼebé halo sala boot arrepende an ona, ita sei fó perdua no hatudu nafatin domin ba ema neʼe ka lae? (2 Kor 2:5-8) Dala ruma la fasil atu halo ida-neʼe, liuliu kuandu ita rasik ka ita-nia família mak hetan susar husi ema neʼe nia hahalok sala. Maibé, hodi tau fiar ba Jeová no ninia dalan atu rezolve problema iha kongregasaun, ida-neʼe sei ajuda ita atu halo buat neʼebé loos hodi prontu atu fó perdua ho laran.—Prov 3:5, 6.

18. Se ita prontu atu fó perdua ba ema seluk, buat diʼak saida deʼit mak ita bele hetan?

¹⁸ Se ita prontu atu fó perdua ba ema seluk, ita bele hetan buat diʼak barak. Porezemplu, ita bele sente diʼak liután tanba ita la hirus ka la triste ona, no ita mós bele iha relasaun diʼak ho ema seluk. Maibé, se ita la prontu atu fó perdua, ida-neʼe bele halo ita-nia saúde sai fraku, halo ita estrese, no halo susar ba ita atu iha relasaun diʼak ho ema seluk. Maibé, bensaun boot liu neʼebé ita bele hetan hodi prontu atu fó perdua ba ema mak ita sei iha relasaun diʼak ho ita-nia Aman Jeová iha lalehan.—Lee Koloso 3:12-14.