Roma 3:1-31

  • “Maromak mak loos” (1-8)

  • Ema Judeu no ema Gregu hotu iha sala nia okos (9-20)

  • Ema bele sai laran-loos liuhusi sira-nia fiar (21-31)

    • Ema hotu labele haleno Maromak nia glória (23)

3  Entaun, saida mak halo ema Judeu diʼak liu fali ema seluk? No sirkunsizaun* iha folin saida?  Tuir loloos, iha buat diʼak barak. Primeiru mak tanba Maromak fó liafuan sagradu ba ema Judeu sira.+  Maibé oinsá se ema Judeu balu la hatudu fiar? Neʼe katak ema labele ona tau fiar ba Maromak ka lae?  Lae duni! Maski ema hotu bosok-teen,+ maibé Maromak mak loos,+ hanesan hakerek nanis ona: “Ita-nia liafuan sira sei hatudu katak Ita mak loos, no kuandu sira duun Ita kona-ba buat ruma Ita sei hatudu sai katak sira sala.”+  Maibé, kuandu ita ema halo hahalok aat, neʼe halo ema haree katak Maromak nia dalan sira mak loos. Se nuneʼe, Maromak halo buat neʼebé la iha justisa kuandu nia kastigu ita ka? Ema balu hanoin nuneʼe.*  Maibé neʼe la loos! Se Maromak halo buat neʼebé la iha justisa, oinsá mak nia sei tesi-lia ba mundu neʼe?+  Maibé se haʼu-nia lia-bosok hatudu katak Maromak nia liafuan mak loos no halo ema hahiʼi nia, entaun tanbasá mak Maromak tesi-lia ba haʼu nuʼudar sala-naʼin ida?  Tanbasá mak ita la koʼalia hanesan ema balu neʼebé duun matak ita katak ita dehan: “Mai ita halo buat neʼebé aat atu nuneʼe bele hamosu buat diʼak”? Ema sira hanesan neʼe merese duni atu simu sira-nia kastigu.+  Neʼe duni, ita hanoin oinsá? Ita diʼak liu fali ema seluk ka? Lae duni! Tanba ita hatudu ona ho klaru katak ema Judeu no ema Gregu sira hotu mak iha sala nia okos,+ 10  hanesan hakerek nanis ona: “La iha ema laran-loos, ida deʼit mós la iha;+ 11  la iha ema ida neʼebé bele komprende didiʼak, la iha ema ida neʼebé buka Maromak. 12  Ema hotu laʼo sees ona ba dalan seluk, sira hotu sai folin-laek ona; la iha ema ida mak hatudu laran-diʼak, ida deʼit mós la iha.”+ 13  “Sira-nia garganta hanesan rate neʼebé nakloke, sira lohi ho sira-nia nanál.”+ “Liafuan husi sira-nia ibun mak hanesan samea kiʼik nia venenu.”+ 14  “Sira-nia ibun nakonu ho liafuan hotar no liafuan odi.”+ 15  “Sira* halai lalais atu oho ema.”*+ 16  “Sira-nia dalan mak sempre halo aat ba malu no haterus malu 17  no sira la hatene dalan dame nian.”+ 18  “Sira la hatene atu hamtaʼuk Maromak.”+ 19  Agora ita hatene katak buat hotu neʼebé Ukun-Fuan fó sai, ida-neʼe fó sai ba sira neʼebé moris tuir Ukun-Fuan. Atu nuneʼe ema hotu nia ibun bele nonook no mundu tomak merese atu simu kastigu husi Maromak.+ 20  Tan neʼe, la iha ema ida mak bele sai ema laran-loos iha Maromak nia oin hodi halo tuir Ukun-Fuan,+ tanba liuhusi Ukun-Fuan mak ita hatene* kona-ba sala.+ 21  Maibé agora, ema bele sai laran-loos iha Maromak nia oin maski nia ketak husi Ukun-Fuan+ hanesan fó sai nanis ona iha Ukun-Fuan no iha Profeta sira-nia liafuan.+ 22  Sin, ema bele sai laran-loos iha Maromak nia oin liuhusi sira-nia fiar ba Jesus Kristu, no neʼe ba sira hotu neʼebé iha fiar. Tanba ema Judeu no ema Gregu hanesan deʼit.+ 23  Ema hotu halo ona sala no labele haleno Maromak nia glória.+ 24  Maibé Maromak haree sira nuʼudar ema laran-loos tanba folin neʼebé Kristu Jesus selu ona atu salva sira.+ Neʼe mak prezente neʼebé Maromak fó tanba ninia laran-diʼak neʼebé boot+ no la presiza selu.+ 25  Maromak fó Jesus nuʼudar sakrifísiu ida atu nuneʼe ema bele hadame malu ho Maromak*+ liuhusi fiar ba Jesus nia raan.+ Ida-neʼe atu hatudu katak Maromak mak loos, tanba nia hatudu pasiénsia* hodi fó perdua ba sala sira neʼebé ema halo iha tempu uluk. 26  Neʼe mós atu hatudu sai ninia hahalok loos+ iha tempu agora, atu nuneʼe nia bele fó sai katak ema neʼebé tau fiar ba Jesus mak ema laran-loos.+ 27  Se nuneʼe, ita iha razaun atu gaba an ka? Lae duni. Tanbasá?+ Tanba ukun-fuan fiar nian hatudu ho klaru katak la iha razaun atu ema gaba an. 28  Tanba ita hatene katak Maromak haree ema ida nuʼudar ema laran-loos tanba fiar, laʼós tanba moris tuir ukun-fuan.+ 29  Nia laʼós Maromak ba ema Judeu deʼit, loos ka lae?+ Nia mós Maromak ba ema husi nasaun seluk, loos ka lae?+ Loos duni, nia mós Maromak ba ema husi nasaun seluk.+ 30  Tanba Maromak ida deʼit,+ nia sei haree ema neʼebé hetan sirkunsizaun nuʼudar ema laran-loos+ tanba sira-nia fiar, no nia mós sei haree ema neʼebé la hetan sirkunsizaun nuʼudar ema laran-loos+ liuhusi sira-nia fiar. 31  Entaun, ita halakon ukun-fuan tanba ita-nia fiar ka lae? Lae duni! Tuir loloos, ita hatudu katak ukun-fuan mak loos.+

Nota-rodapé

Ka “Haʼu koʼalia tuir ema nia liafuan”.
Orj., “Sira-nia ain”.
Orj., “fakar raan”.
Ka “ita iha koñesimentu neʼebé loos”.
Ka “atu nuneʼe bele hamoos ema nia sala”.
Ka “toleránsia”.