1-2. (a) Saida mak Jeová haree bainhira ema rihun ba rihun halibur hamutuk atu komemora Naʼi nia Han-Kalan? (Haree foto iha livru oin) (b) Ita sei koʼalia kona-ba saida iha lisaun neʼe?

IMAJINA toʼok saida mak Jeová haree bainhira ema rihun ba rihun iha mundu tomak halibur hamutuk atu komemora Naʼi nia Han-Kalan. Nia la haree deʼit ba ema-lubun boot, maibé nia haree ema ida-idak neʼebé tuir komemorasaun neʼe. Porezemplu, nia haree ema sira neʼebé tinan-tinan tuir komemorasaun neʼe ho laran-metin. Entre sira iha mós ema balu neʼebé mai maski ema kontra sira makaʼas. Ema balu fali la tuir beibeik reuniaun sira seluk, maibé sira tuir Memoriál tanba sira haree katak neʼe mak buat neʼebé importante. Jeová mós haree ema sira neʼebé tuir Memoriál ba dala primeiru, tanba karik sira hakarak hatene kona-ba reuniaun neʼe.

² Jeová kontente atu haree ema barak tuir Memoriál. (Lc 22:19) Maibé, Jeová la hanoin deʼit kona-ba ema naʼin-hira mak tuir Memoriál. Nia hanoin liu kona-ba razaun tanbasá sira tuir komemorasaun neʼe. Buat neʼebé importante ba Jeová mak sira-nia motivu. Iha lisaun neʼe, ita sei koʼalia kona-ba pergunta importante ida: Tanbasá mak ita presiza tuir Memoriál tinan-tinan no mós tuir reuniaun sira seluk semana-semana neʼebé Jeová arranju ona ba sira neʼebé hadomi nia?

3-4. (a) Tanbasá mak ita tuir reuniaun sira? (b) Bainhira tuir reuniaun, neʼe hatudu saida kona-ba ita? (c) Tuir buat neʼebé 1 Korinto 11:23-26 hatete, tanbasá importante atu la falta Memoriál?

³ Ita tuir reuniaun kongregasaun nian tanba neʼe mak parte ba ita-nia adorasaun. Ita mós tuir tanba ita simu  hanorin husi Jeová. Ema neʼebé foti an hanoin katak sira la presiza simu hanorin ruma. (3 João 9) Ita la hanesan neʼe. Ita hakarak tebes atu simu hanorin husi Jeová no ninia organizasaun.​—Isa 30:20; João 6:45.

⁴ Bainhira ita tuir reuniaun sira, ita hatudu katak ita haraik an, hakarak no prontu atu simu hanorin. Iha kalan neʼebé ita komemora Jesus nia mate, ita tuir komemorasaun importante neʼe laʼós deʼit tanba ita sente katak neʼe mak ita-nia obrigasaun maibé tanba ita ho haraik an halo tuir Jesus nia mandamentu: “Kontinua halo ida-neʼe hodi hanoin haʼu.” (Lee 1 Korinto 11:23-26.) Reuniaun neʼe hametin ita-nia esperansa ba futuru no fó-hanoin ita katak Jeová hadomi tebes ita. Maibé, Jeová hatene katak ita presiza hetan anima no hametin fiar laʼós deʼit dala ida iha tinan ida nia laran. Tan neʼe mak nia arranja reuniaun semana-semana nian no hakarak ita atu tuir reuniaun sira-neʼe. Hahalok haraik an book ita atu halo tuir. Ita uza oras balu semana-semana hodi prepara no tuir reuniaun sira-neʼe.

5. Tanbasá mak ema haraik an hatán ba Jeová nia konvite?

⁵ Tinan-tinan, ema haraik an barak simu Jeová nia konvite atu hetan hanorin husi nia. (Isa 50:4) Sira gosta tebes tuir Memoriál, no sira komesa tuir reuniaun sira seluk. (Zac 8:20-23) Ita hotu gosta tebes atu hetan hanorin no matadalan husi Jeová, “[ita-nia] ajuda-naʼin no salvadór”. (Sal 40:17) Tuir loloos, la iha buat ida mak lori ksolok liu ka importante liu duké simu hanorin husi Jeová no ninia Oan-Mane Jesus neʼebé nia hadomi tebes.​—Mt 17:5; 18:20; 28:20.

6. Oinsá mak haraik an ajuda mane ida atu tuir Memoriál?

⁶ Tinan-tinan, ita hakaʼas an atu konvida ema barak hodi tuir Memoriál kona-ba Jesus nia mate. Ema haraik an barak hetan benefísiu tanba simu ita-nia konvite. Hanoin toʼok ezemplu ida. Tinan balu liubá, mane ida simu konvite Memoriál, maibé nia hatete ba irmaun neʼebé fó konvite katak nia labele tuir Memoriál. Maibé, iha kalan Memoriál, irmaun hakfodak hodi haree mane neʼe laʼo tama Reuniaun-Fatin. Mane neʼe admira tebes tanba ema simu nia ho laran-diʼak no neʼe book nia atu tuir reuniaun sira semana-semana. Tuir loloos, nia falta deʼit reuniaun tolu durante tinan ida nia laran. Saida mak ajuda nia atu halo desizaun hodi tuir reuniaun semana-semana? Nia foti desizaun neʼe tanba nia laran-maus. Irmaun neʼebé konvida nia hatete: “Nia mak ema neʼebé haraik an”. Ita fiar katak Jeová mak dada mane neʼe atu adora Nia, no mane neʼe agora hetan ona batizmu.​—2 Sam 22:28; João 6:44.

7. Oinsá mak buat neʼebé ita aprende husi reuniaun sira no lee husi Bíblia ajuda ita atu sai haraik an?

⁷ Buat neʼebé ita aprende husi reuniaun sira no lee husi Bíblia bele ajuda ita sai haraik an. Iha semana balu antes Memoriál, baibain ita-nia reuniaun sira tau fokus ba Jesus nia ezemplu no haraik an neʼebé nia hatudu hodi fó ninia moris nuʼudar sakrifísiu. No durante loron balu antes Memoriál, diʼak atu lee Bíblia kona-ba Jesus nia mate no ninia moris-hiʼas. Buat neʼebé ita aprende husi reuniaun sira-neʼe no lee iha Bíblia bele aumenta ita-nia agradese ba Jesus nia sakrifísiu. Neʼe book ita atu banati-tuir ninia hahalok haraik an no halo tuir Jeová nia  hakarak, maski iha tempu neʼebé susar.​—Lc 22:41, 42.

8. Oinsá mak Jesus hatudu aten-brani?

⁸ Ita mós hakaʼas an atu banati-tuir Jesus hodi hatudu aten-brani. Hanoin toʼok kona-ba Jesus nia aten-brani durante loron balu antes nia mate. Nia hatene katak lakleur tan ninia inimigu sira sei hamoe, baku, no fó kastigu-mate ba nia. (Mt 20:17-19) Maski nuneʼe, nia prontu atu mate. Bainhira tempu toʼo ona, nia koʼalia ba ninia apóstolu sira neʼebé laran-metin, neʼebé hamutuk ho nia iha Getsémani, hodi dehan: “Hamriik ona. Mai ita bá. Haree bá! Traidór mai ona.” (Mt 26:36, 46) No bainhira ema-lubun neʼebé lori armas mai kaer nia, nia hakat ba oin, fó koñese ninia an, no haruka soldadu sira atu husik ninia apóstolu sira bá. (João 18:3-8) Jesus hatudu ezemplu diʼak kona-ba aten-brani! Ohin loron, ema Kristaun kose-mina sira no bibi seluk hakaʼas an atu banati-tuir Jesus hodi hatudu aten-brani. Oinsá?

9. (a) Tanbasá mak ita presiza aten-brani atu tuir beibeik reuniaun sira? (b) Oinsá mak ita-nia ezemplu bele book irmaun-irmán neʼebé iha komarka tanba sira-nia fiar?

⁹ Bainhira hasoru susar, karik ita presiza aten-brani atu tuir beibeik reuniaun sira. Irmaun-irmán balu tuir reuniaun maski sira sente triste, laran-kraik, ka iha problema saúde. Ema balu ho aten-brani tuir reuniaun sira maski sira-nia família ka governu kontra makaʼas. Hanoin toʼok kona-ba oinsá mak ita-nia ezemplu bele book ita-nia irmaun-irmán sira neʼebé iha komarka tanba sira-nia fiar. (Ebr 13:3) Bainhira sira rona katak ita kontinua serbí Jeová maski hasoru terus, neʼe hametin sira atu kontinua hatudu fiar, aten-brani, no laran-metin. Apóstolu Paulo mós iha esperiénsia hanesan. Kuandu nia tama komarka iha Roma, nia sente haksolok bainhira rona katak ninia maluk fiar-naʼin sira serbí Maromak ho laran-metin. (Flp 1:3-5, 12-14) Lakleur depois Paulo sai livre ka antes nia sai livre, nia hakerek karta ba ema Ebreu sira. Iha karta neʼe nia anima ema Kristaun laran-metin sira atu “kontinua hadomi malu hanesan maun-alin” no labele haluha atu tuir reuniaun sira.​—Ebr 10:24, 25; 13:1

10-11. (a) Sé-sé deʼit mak ita presiza konvida ba Memoriál? (b) Éfeso 1:7 fó razaun saida atu konvida ema?

¹⁰ Ita hatudu aten-brani bainhira ita konvida ita-nia família, kolega serbisu, no viziñu sira atu tuir Memoriál. Tanbasá mak ita konvida sira? Ita hafolin tebes buat neʼebé Jeová no Jesus halo ona ba ita, tan neʼe ita hakarak tebes atu konvida ema seluk hodi tuir Memoriál. Ita hakarak sira atu aprende oinsá sira mós bele hetan benefísiu husi Jeová “nia laran-diʼak neʼebé boot” liuhusi Jesus nia sakrifísiu.​—Lee Éfeso 1:7; Apok 22:17.

 ¹¹ Bainhira ita hatudu aten-brani hodi halibur hamutuk, ita mós hatudu hahalok folin-boot seluk, hahalok neʼebé Maromak no ninia Oan-Mane hatudu iha dalan neʼebé perfeitu.

12. (a) Oinsá mak reuniaun sira hametin ita-nia domin ba Jeová no Jesus? (b) 2 Korinto 5:14, 15 anima ita atu halo saida hodi banati-tuir Jesus?

¹² Ita-nia domin ba Jeová no Jesus book ita atu tuir reuniaun sira. No buat neʼebé ita aprende iha reuniaun sira hametin liután ita-nia domin ba Jeová no ninia Oan-Mane. Reuniaun sira fó-hanoin beibeik ita kona-ba buat neʼebé sira halo ona mai ita. (Rom 5:8) Memoriál fó-hanoin ita liuliu kona-ba sira-nia domin boot ba ita, inklui mós ba sira neʼebé seidauk hafolin Jesus nia sakrifísiu. Ita koko atu banati-tuir Jesus liuhusi dalan neʼebé ita halaʼo ita-nia moris tanba ita agradese tebes. (Lee 2 Korinto 5:14, 15.) Liután neʼe, ita-nia laran book ita atu hahiʼi Jeová tanba nia fó Jesus nia sakrifísiu. Dalan ida atu hahiʼi nia mak hodi hatoʼo komentáriu husi laran iha ita-nia reuniaun sira.

13. Oinsá mak ita bele hatudu domin boot ba Jeová no ninia Oan-Mane? Esplika toʼok.

¹³ Ita bele hatudu domin boot ba Jeová no ninia Oan-Mane hodi prontu atu halo sakrifísiu ba sira. Dala barak, ita halo nuneʼe hodi bele tuir ita-nia reuniaun sira. Kongregasaun barak halo reuniaun ida iha loron baileet, tempu neʼebé ema barak foin sai serbisu no karik sente kole. No reuniaun seluk halo iha findesemana, tempu neʼebé ema baibain deskansa. Jeová haree ka lae bainhira ita tuir reuniaun maski ita kole? Nia haree duni! Tuir loloos, se ita kole maibé ita hakaʼas an atu tuir reuniaun, Jeová sei hafolin liután domin neʼebé ita hatudu ba nia.​—Mc 12:41-44.

14. Oinsá mak Jesus hatudu ezemplu kona-ba hatudu domin neʼebé la hanoin an deʼit?

¹⁴ Jesus hatudu ezemplu ba ita kona-ba oinsá hatudu domin neʼebé la hanoin an deʼit. Nia prontu atu mate ba ninia dixípulu sira. Nia mós tau uluk sira-nia diʼak duké ninian rasik iha ninia moris loroloron nian. Porezemplu, nia hasoru ninia dixípulu sira maski nia isin-kole ka neon-susar. (Lc 22:39-46) Nia tau fokus ba buat neʼebé nia bele halo ba ema seluk,  laʼós ba buat neʼebé nia bele hetan husi sira. (Mt 20:28) Bainhira ita iha domin boot ba Jeová no ba ita-nia maluk fiar-naʼin, ita sei hakaʼas an atu tuir Naʼi nia Han-Kalan no mós tuir kongregasaun nia reuniaun sira.

15. Ita hakarak liu mak atu ajuda sé?

¹⁵ Ita mak ema Kristaun loos neʼebé sai família boot ida, no ita kontente atu uza tempu barak hodi konvida ema foun atu hamutuk ho ita. Maibé, ita hakarak liu mak atu ajuda “ita-nia maluk fiar-naʼin” neʼebé para ona atu tuir reuniaun sira no haklaken. (Gal 6:10) Ita hatudu domin hodi anima sira tuir reuniaun, liuliu Memoriál. Hanesan Jeová no Jesus, ita kontente tebes bainhira sira fila fali ba Jeová, ita-nia Aman no Bibi-Atan.​—Mt 18:14.

16. (a) Oinsá mak ita anima malu? Ita-nia reuniaun lori benefísiu saida mai ita? (b) Tanbasá agora mak tempu diʼak atu hanoin-hetan Jesus nia liafuan iha João 3:16?

¹⁶ Durante semana balu tuirmai, hakaʼas an konvida ema barak atu tuir Memoriál neʼebé halaʼo iha sesta kalan, 19 Abríl 2019. (Haree kaixa “Ita sei konvida sira ka lae?”) Durante tinan neʼe nia laran, mai ita hakaʼas an anima malu hodi tuir reuniaun hotu neʼebé Jeová arranja ona ba ita. Nuʼudar mundu nia rohan besik daudaun, ita presiza tuir reuniaun hodi bele ajuda ita hatudu nafatin haraik an, aten-brani, no domin. (1 Tes 5:8-11) Ho laran tomak, mai ita hatudu sai oinsá ita sente tanba Jeová no ninia Oan-Mane hadomi tebes ita!​—Lee João 3:16.