Skip to content

Skip to table of contents

 LISAUN ESTUDU 1

“Keta laran-taridu, tanba haʼu mak ó-nia Maromak”

“Keta laran-taridu, tanba haʼu mak ó-nia Maromak”

“Keta taʼuk, tanba haʼu hamutuk ho ó. Keta laran-taridu, tanba haʼu mak ó-nia Maromak. Haʼu sei hametin ó, sin, haʼu sei ajuda ó.”​—ISA 41:10.

KNANANUK 7 Jeová mak ita-nia kbiit

IHA LISAUN NEʼE *

1-2. (a) Oinsá liafuan iha Isaias 41:10 ajuda irmán ida naran Yoshiko? (b) Sé-sé deʼit mak bele hetan ajuda husi liafuan sira-neʼe?

IRMÁN neʼebé laran-metin naran Yoshiko rona informasaun neʼebé ladiʼak. Doutora neʼebé tau matan ba nia hatete katak nia sei moris ba fulan balu deʼit. Saida mak irmán Yoshiko halo? Nia hanoin kedas ninia eskritura favoritu iha Isaias 41:10. (Lee.) Tuirmai, ho kalma nia hatete ba doutór katak nia la taʼuk, tanba Jeová kaer metin ninia liman. * Liafuan sira husi eskritura neʼe ajuda nia atu tau fiar tomak ba Jeová. Eskritura neʼe mós bele ajuda ita atu sente kalma nafatin bainhira hasoru susar sira. Atu komprende, mai ita haree uluk razaun tanbasá Maromak haruka Isaias hakerek liafuan sira-neʼe.

2 Foufoun, Jeová haruka Isaias hakerek liafuan sira-neʼe atu fó kmaan ba ema Judeu neʼebé ikusmai sei sai dadur iha rai-Babilónia. Maibé, Jeová hakarak atu liafuan sira-neʼe laʼós deʼit ajuda ema Judeu, maibé ajuda mós ninia atan sira hotu toʼo ohin loron. (Isa 40:8; Rom 15:4) Ohin loron, ita moris iha tempu neʼebé mosu “problema barak neʼebé susar atu tahan” no liafuan sira neʼebé temi iha livru Isaias bele fó kmaan mai ita.​—2 Tim 3:1.

3. (a) Promesa saida deʼit mak temi iha ita-nia eskritura tinan nian ba 2019 husi Isaias 41:10? (b) Tanbasá mak ita presiza promesa sira-neʼe?

3 Iha lisaun neʼe, ita sei koʼalia kona-ba Jeová nia promesa tolu iha Isaias 41:10 neʼebé bele hametin ita-nia fiar: (1) Jeová sei hamutuk ho ita, (2) nia mak ita-nia  Maromak, no (3) nia sei ajuda ita. Ita presiza Jeová nia promesa * sira-neʼe tanba hanesan ho Yoshiko, ita mós hasoru susar oioin iha ita-nia moris. Ita mós presiza tahan hasoru problema oioin neʼebé akontese iha mundu. Governu mós fó-terus ba ita balu. Mai ita koʼalia kona-ba promesa ida-idak.

“HAʼU HAMUTUK HO Ó”

4. (a) Ita sei koʼalia kona-ba promesa primeiru saida? (Haree mós nota-rodapé.) (b) Iha dalan oinsá mak Jeová fó sai ninia sentimentu ba ita? (c) Oinsá mak Maromak nia liafuan sira-neʼe kona Ita rasik?

4 Jeová nia promesa primeiru neʼebé fó kmaan ba ita mak: “Keta taʼuk, tanba haʼu hamutuk ho ó.” * Jeová hatudu ida-neʼe hodi fó atensaun tomak ba ita no hadomi ita. Jeová mós fó sai ninia sentimentu no domin ba ita, liuhusi liafuan sira tuirmai neʼe: “Haʼu haree ó hanesan buat folin-boot, ó hetan ona glória, no haʼu hadomi ona ó.” (Isa 43:4) Jeová laran-metin ba ita no la iha buat ida mak bele hapara Jeová atu hatudu domin ba ninia atan sira. (Isa 54:10) Ita sei hetan aten-brani tanba Jeová mak ita-nia belun no nia hadomi ita. Nia sei proteje ita, hanesan nia proteje ninia belun, Abram (Abraão). Jeová hatete ba nia: “Keta taʼuk, Abram. Haʼu sei proteje ó.”​—Gén 15:1.

Ho ajuda husi Jeová, ita bele sai aten-brani no tahan hasoru susar naran deʼit ho susesu, maski susar sira haree hanesan mota ka ahi nia lakan (Haree parágrafu 5-6) *

5-6. (a) Oinsá mak ita hatene katak Jeová hakarak ajuda ita atu tahan problema oioin? (b) Ita bele aprende saida husi Yoshiko nia ezemplu?

5 Ita hatene katak Jeová hakarak ajuda ita ida-idak atu tahan hasoru problema oioin, tanba nia promete ba ninia povu: “Bainhira ó laʼo liu bee sira, haʼu sei hamutuk ho ó, no bainhira ó hakur mota sira, sira sei la halo ó mout. Bainhira ó laʼo liu ahi, neʼe sei la han ó, no ahi nia lakan sei la han ó.” (Isa 43:2) Liafuan sira-neʼe katak sá?

6 Jeová la promete katak nia sei halakon problema sira neʼebé halo ita-nia moris susar, maibé nia sei la husik “mota sira” katak problema sira halo ita mout. No Jeová sei la husik “ahi nia lakan”  katak terus oioin, lori buat aat neʼebé permanente. Nia fó garantia katak nia sei hamutuk ho ita hodi ajuda ita atu “laʼo liu” problema sira-neʼe. Saida mak Jeová sei halo? Nia sei ajuda ita sai kalma atu nuneʼe ita bele laran-metin nafatin ba nia iha situasaun oioin inklui mós mate. (Isa 41:13) Yoshiko, neʼebé uluk temi ona, mós sente ida-neʼe. Ninia oan-feto hatete: “Ami hakfodak tanba amá nafatin kalma. Ami bele haree katak Jeová fó nia dame. Amá koʼalia kona-ba Jeová no ninia promesa sira ba enfermeira no pasiente sira toʼo loron neʼebé nia mate.” Ita bele aprende saida husi Yoshiko nia ezemplu? Bainhira ita tau fiar ba Maromak nia promesa katak nia sei hamutuk ho ita, ita mós sei sai aten-brani no sai forte atu tahan problema sira.

“HAʼU MAK Ó-NIA MAROMAK”

7-8. (a) Ita sei koʼalia kona-ba promesa segundu saida, no “laran-taridu” signifika saida? (b) Tanbasá mak Jeová hatete ba ema Judeu sira: “Keta laran-taridu”? (c) Liafuan saida husi Isaias 46:3, 4 mak halo ema Judeu sira sente kalma?

7 Promesa segundu neʼebé Isaias hakerek mak: “Keta laran-taridu, tanba haʼu mak ó-nia Maromak.” Laran-taridu neʼebé temi iha eskritura neʼe katak sá? Iha lian orijinál liafuan “laran-taridu” fó ideia katak “kontinua haree ba kotuk tanba taʼuk buat ruma” ka “hateke bá-mai ho pániku hanesan ema ruma iha situasaun neʼebé perigu”.

8 Tanbasá mak Jeová hatete ba ema Judeu sira neʼebé sei sai dadur iha rai-Babilónia atu labele “laran-taridu”? Tanba nia hatene katak ema hotu neʼebé hela iha neʼebá sei sai taʼuk. Saida mak sei halo sira sai taʼuk? Kuandu ema Judeu nia tempu nuʼudar dadur ba tinan 70 besik atu remata, Média-Pérsia nia tropa neʼebé forsa boot sei ataka rai-Babilónia. Jeová sei uza tropa neʼe atu halo ninia povu livre. (Isa 41:2-4) Kuandu ema Babilónia no povu husi nasaun seluk haree katak sira-nia inimigu besik daudaun ona, sira koko atu aten-brani nafatin hodi hatete ba malu: “Sai forte bá.” Sira mós halo estátua barak liután, no hein katak estátua sira-neʼe bele proteje sira. (Isa 41:5-7) Maibé iha tempu neʼebé hanesan, Jeová halo kalma ema Judeu sira-neʼe hodi hatete: “Oh Izraél, ó mak haʼu-nia atan [ó la hanesan ho ó-nia viziñu] . . . Keta laran-taridu, tanba haʼu mak ó-nia Maromak.” (Isa 41:8-10) Jeová hatete: “Haʼu mak ó-nia Maromak.” Jeová uza liafuan sira-neʼe atu ninia atan sira neʼebé laran-metin bele hatene katak nia la haluha sira, nia nafatin sira-nia Maromak no sira mak ninia povu. Nia hatete ba sira: “Haʼu sei lori imi . . . no salva imi.” Ita bele fiar katak liafuan sira-neʼe hametin duni ema Judeu sira.​—Lee Isaias 46:3, 4.

9-10. Tanbasá mak ita la presiza taʼuk? Fó toʼok ezemplu.

9 Ohin loron, ema barak iha mundu sai laran-taridu tanba mundu nia situasaun sai aat ba daudaun. Tuir loloos, problema sira-neʼe mós kona ita. Maibé ita la presiza taʼuk. Jeová hatete ba ita: “Haʼu mak ó-nia Maromak.” Tanbasá mak liafuan sira-neʼe bele ajuda ita sai kalma nafatin?

10 Hanoin toʼok ezemplu neʼe: Mane naʼin-rua, naran Jim no Ben, saʼe aviaun no bainhira aviaun semo, mosu anin makaʼas. Aviaun nakdoko makaʼas, no pilotu fó avizu: “Halo metin imi-nia sintu.  Aviaun sei nakdoko makaʼas ba tempu balu.” Jim sai laran-taridu. Maibé tuirmai pilotu hatutan tan: “Keta laran-taridu, haʼu mak imi-nia pilotu no haʼu bele kontrola situasaun.” Maibé Jim doko ulun hodi hatudu katak nia la simu pilotu nia liafuan, nia hatete: “Oinsá haʼu bele fiar nia?” Maski nuneʼe, nia haree Ben kalma tebes. Jim husu ba nia: “Tanbasá ó kalma tebes?” Ben oin-midar no hatete: “Tanba haʼu koñese didiʼak pilotu neʼe. Nia mak haʼu-nia aman!” Tuirmai Ben hatete: “Haʼu sei esplika kona-ba haʼu-nia aman ba ó. Bainhira ó koñese nia no hatene ninia matenek atu lori aviaun, ó mós sei sente kalma.”

11. Lisaun saida mak ita aprende husi ezemplu kona-ba Ben no Jim?

11 Lisaun saida mak ita aprende husi ezemplu neʼe? Hanesan Ben, ita bele sente kalma tanba ita koñese didiʼak Jeová, ita-nia Aman iha lalehan. Ita hatene katak nia sei ajuda ita atu tahan hasoru problema neʼebé susar tebes durante loron ikus sira-neʼe. (Isa 35:4) Ita tau fiar ba Jeová, tan neʼe mak ita bele kalma nafatin maski ema barak iha mundu sai taʼuk tebes. (Isa 30:15) Ita mós halo buat neʼebé hanesan ho Ben hodi fó sai ba ema seluk tanbasá sira bele fiar Maromak. Tuirmai sira mós bele tau fiar katak Jeová sei ajuda sira atu hasoru susar oioin.

‘HAʼU SEI HAMETIN NO AJUDA Ó’

12. (a) Ita sei koʼalia kona-ba promesa terseiru saida? (b) Liafuan Jeová nia “liman” fó-hanoin saida ba ita?

12 Promesa terseiru neʼebé Isaias hakerek mak: “Haʼu sei hametin ó, sin, haʼu sei ajuda ó.” Antes neʼe, Isaias esplika ona kona-ba oinsá Jeová hametin ninia povu hodi hatete: “Jeová . . . sei mai ho kbiit, nia sei ukun ho ninia liman.” (Isa 40:10) Baibain Bíblia uza liafuan  “liman” atu koʼalia kona-ba kbiit. Entaun, liafuan Jeová “sei ukun ho ninia liman” fó-hanoin ita katak nia mak Liurai neʼebé iha kbiit boot. Iha tempu antigu nia uza ninia forsa atu apoia no defende ninia atan sira, no ohin loron nia mós kontinua hametin no proteje sira neʼebé tau fiar ba nia.​—Deut 1:30, 31; Isa 43:10.

La iha armas neʼebé bele hetan susesu hodi kontra Jeová nia liman neʼebé fó protesaun (Haree parágrafu 12-16) *

13. (a) Jeová kaer metin ninia promesa atu hametin ita, liuliu iha situasaun saida? (b) Promesa saida mak halo ita nakonu ho forsa no fiar an?

13 Jeová kaer metin ninia promesa “haʼu sei hametin ó”, maibé liuliu bainhira inimigu fó-terus ita. Ohin loron, iha rai balu, ita-nia inimigu koko makaʼas atu hapara ita-nia serbisu haklaken ka bandu ita-nia organizasaun. Maski nuneʼe, ita la sai laran-taridu demais ho sira-nia ataka. Jeová fó garantia katak nia sei halo ita nakonu ho forsa no fiar an. Nia promete katak “armas naran deʼit neʼebé ema halo hodi kontra ó sei la hetan susesu”. (Isa 54:17) Promesa neʼe fó-hanoin ita kona-ba pontu importante tolu.

14. Tanbasá mak ita la hakfodak se Maromak nia inimigu ataka ita?

14 Primeiru, ita hatene katak ema sei odi ita tanba ita mak Kristu nia dixípulu. (Mt 10:22) Jesus fó sai nanis katak ninia dixípulu sira sei hetan terus durante loron ikus sira. (Mt 24:9; João 15:20) Segundu, Isaias fó sai profesia katak ita-nia inimigu sei odi ita no mós sei uza armas oioin atu kontra hasoru ita. Armas sira-neʼe inklui lia-bosok oioin kona-ba ita no fó-terus makaʼas ba ita. (Mt 5:11) Jeová sei la hanetik inimigu sira atu uza armas sira-neʼe hodi kontra hasoru ita. (Éf 6:12; Apok 12:17) Maski nuneʼe, ita la presiza taʼuk. Tanbasá?

15-16. (a) Ita presiza hanoin-hetan pontu importante terseiru saida? Oinsá mak Isaias 25:4, 5 apoia ida-neʼe? (b) Saida mak Isaias 41:11, 12 esplika kona-ba rezultadu husi ema sira neʼebé kontra ita?

15 Haree toʼok pontu terseiru neʼebé ita presiza hanoin-hetan. Jeová hatete katak “armas naran deʼit” neʼebé ema uza atu kontra hasoru ita sei “la hetan  susesu”. Hanesan moru neʼebé proteje ita husi anin-fuik, Jeová mós proteje ita bainhira “ukun-naʼin aat sira sai hirus”. (Lee Isaias 25:4, 5.) Ita-nia inimigu sei nunka susesu atu halakon ita-nia moris ba nafatin.​—Isa 65:17.

16 Jeová mós hametin ita-nia fiar ba nia hodi fó esplikasaun neʼebé klaru kona-ba saida mak sei akontese ba ema hotu neʼebé “hirus” ita. (Lee Isaias 41:11, 12.) Maski ita-nia inimigu kontra makaʼas ita, maibé rezultadu mak Maromak nia povu nia inimigu hotu “sei lakon no mate”.

OINSÁ ATU HAMETIN ITA-NIA FIAR BA JEOVÁ

Ita bele hametin ita-nia fiar ba Jeová hodi lee beibeik kona-ba nia iha Bíblia (Haree parágrafu 17-18) *

17-18. (a) Oinsá mak lee Bíblia ajuda ita hametin ita-nia fiar ba Maromak? Fó toʼok ezemplu. (b) Oinsá mak hodi medita kona-ba eskritura ba tinan 2019 bele ajuda ita?

17 Ita bele hametin ita-nia fiar ba Jeová hodi koñese nia diʼak liután. Dalan ida deʼit atu koñese didiʼak Jeová mak hodi lee Bíblia no hanoin kleʼan kona-ba buat neʼebé ita lee. Iha Bíblia, ita bele lee kona-ba oinsá Jeová proteje ninia povu iha tempu antigu. Ida-neʼe sei ajuda ita fiar katak nia sei tau matan ita.

18 Hanoin toʼok liafuan furak sira neʼebé Isaias uza atu esplika oinsá Jeová proteje ita. Nia kompara Jeová nuʼudar bibi-atan ida no Jeová nia atan sira nuʼudar bibi-oan. Isaias esplika kona-ba Jeová: “Nia sei halibur bibi-oan sira ho ninia liman, no nia sei koʼus sira iha ninia hirus-matan.” (Isa 40:11) Kuandu ita rasik sente Jeová nia liman neʼebé forte hakoʼak ita, ita sente seguru no kalma. Atu ajuda ita kalma nafatin maski hasoru problema oioin, atan laran-metin no matenek hili Isaias 41:10 nuʼudar eskritura ba tinan 2019: “Keta laran-taridu, tanba haʼu mak ó-nia Maromak.” Hanoin kleʼan kona-ba liafuan sira-neʼe. Ida-neʼe sei hametin ita bainhira ita hasoru susar oioin.

KNANANUK 38 Nia sei halo ó forsa

^ par. 5 Eskritura ba tinan 2019 fó ita razaun tolu tanbasá ita bele kalma nafatin hodi tahan hasoru problema oioin neʼebé akontese iha mundu ka iha ita-nia moris. Lisaun neʼe sei esplika kona-ba razaun tolu neʼe no sei ajuda ita atu la laran-taridu demais no tau fiar liután ba Jeová. Hanoin kleʼan kona-ba eskritura tinan nian. Se bele dekór ida-neʼe. Neʼe sei hametin ita hodi bele tahan hasoru susar oioin iha futuru.

^ par. 3 ESPLIKASAUN BA FRAZE: Jeová nia promesa mak deklarasaun neʼebé loos katak buat ruma sei akontese duni. Promesa neʼebé Jeová fó ba ita sei ajuda ita atu la hanoin demais kona-ba problema neʼebé bele mosu iha ita-nia moris.

^ par. 4 Liafuan “Keta taʼuk” temi dala tolu iha Isaias 41:10, 13, no 14. Versíkulu sira-neʼe mós temi dala barak liafuan “haʼu” (refere ba Jeová). Tanbasá mak Jeová haruka Isaias atu uza liafuan “haʼu” dala barak? Neʼe atu énfaze lia-loos importante ida katak ita bele sai kalma no la taʼuk bainhira ita tau fiar deʼit ba Jeová.

^ par. 52 ESPLIKASAUN BA DEZEÑU: Ema ida-idak iha família hasoru susar oioin, hanesan iha serbisu-fatin, problema saúde nian, iha serbisu haklaken no iha eskola.

^ par. 54 ESPLIKASAUN BA DEZEÑU: Polísia tama ba uma kuandu halaʼo hela reuniaun, maski nuneʼe irmaun-irmán sira la pániku.

^ par. 56 ESPLIKASAUN BA DEZEÑU: Halaʼo beibeik Adorasaun Família nian ajuda hametin ita atu tahan.