Fraze “Maromak nia liafuan” baibain refere ba Maromak nia mensajen. (Lucas 11:28) Maibé eskritura balu mós temi “Maromak nia Liafuan” ka “Liafuan” nuʼudar títulu ba ema ida.​—Apokalipse 19:13; João 1:​14.

 Mensajen husi Maromak. Dala barak profeta sira hatete katak profesia neʼebé nia hatoʼo mak Maromak nia liafuan. Porezemplu, Ahias, Jeú, no Elias hatoʼo “Jeová nia liafuan”. (1 Reis 14:18; 16:12; 2 Reis 9:36) Bainhira profeta Samuel atu fó-hatene Saul katak Maromak hili ona nia atu sai liurai, Samuel dehan: “Ó hamriik lai iha neʼe, atu nuneʼe haʼu bele fó sai Maromak nia liafuan ba ó.”​—1 Samuel 9:​27.

 Títulu. Bíblia mós temi “Liafuan” nuʼudar títulu ba Jesus Kristu, nuʼudar kriatura espíritu iha lalehan no mós nuʼudar ema iha rai. Haree toʼok razaun balu tanbasá ita bele fiar hanesan neʼe:

•   Ida neʼebé temi nuʼudar “Liafuan” iha ona antes Maromak kria buat seluk hotu. “Horiuluk kedas iha ida neʼebé hanaran Liafuan . . . Nia hamutuk ho Maromak horiuluk kedas.” (João 1:​1, 2) Jesus mak “oan primeiru husi kriasaun hotu . . . nia iha ona antes buat seluk hotu.”​—Koloso 1:​13-​15, 17.

•   “Liafuan” mai toʼo mundu nuʼudar ema. “Liafuan sai nuʼudar ema no hela iha ita-nia leet.” (João 1:​14) Kristu Jesus “husik buat hotu neʼebé nia iha no sai hanesan atan ida no sai ema”.​—Filipe 2:​5-7.

•   “Liafuan” mak Maromak nia Oan. Bainhira apóstolu João hakerek katak “Liafuan sai nuʼudar ema”, hanesan temi iha leten, nia hatutan tan: “Ita haree ona ninia glória, glória neʼebé oan-mane mesak deʼit mak simu husi aman.” (João 1:​14) João mós hakerek: “Jesus mak Maromak nia Oan-Mane.”​—1 João 4:​15.

•   “Liafuan” iha hahalok hanesan Maromak. “Liafuan neʼe hanesan maromak ida.” (João 1:1) Jesus “haleno Maromak nia glória no nia mak Maromak nia ilas loloos”.​—Ebreu 1:​2, 3.

•   “Liafuan” ukun nuʼudar liurai ida. Bíblia fó sai katak ida neʼebé hanaran Maromak nia Liafuan iha “koroa barak iha ninia ulun”. (Apokalipse 19:12, 13) Liafuan neʼe mós iha naran “Liurai ba liurai sira no Naʼi ba naʼi sira”. (Apokalipse 19:16) Bíblia mós temi Jesus nuʼudar “Liurai ba sira neʼebé ukun nuʼudar liurai no Naʼi ba sira neʼebé ukun nuʼudar naʼi”.​—1 Timóteo 6:​14, 15.

•   “Liafuan” halaʼo serbisu nuʼudar Maromak nia portavós. Bíblia temi títulu “Liafuan” atu refere ba ida neʼebé Maromak uza atu hatoʼo informasaun no matadalan sira. Jesus fó sai katak nia halaʼo knaar neʼe, hodi dehan: “Aman neʼebé haruka haʼu mai mak fó ona mandamentu kona-ba saida mak haʼu sei dehan no koʼalia. . . . Tan neʼe buat neʼebé haʼu koʼalia, haʼu koʼalia ida-neʼe tuir buat neʼebé Aman fó-hatene ona ba haʼu.”​—João 12:49, 50.